Cantares 1 - Ñawpaq Testamento Apurímac Llaqtanchispaq Este nisqa Lawpaq

¹ Salomonpa suma-sumaq takin.

Primer kaq taki Warmipa takisqan

² ¡Ay, sumaq simiykiwanyá much'aykuway! Munakuyniykiqa vinomantapas aswan más mishk'iraqmi.

³ Perfumeykikunapa q'apayninqa anchapas sumaqmi. Sutiykipas mishk'i q'apaq perfume hinan. Chayraykun sipaskunaqa munakusunkiku.

⁴ ¡Reynilláy, apuraymanyá pusakuway! ¡Cuartoykimanyá pusakuway! Qanwanqa anchallatañan kusikusaqku. Qanpa munakuyniykitaqa vinomantapas aswan mastaraqmi yuyarisaqku. Chaychá sipaskunaqa anchata munakusunkiku.

Takiqkunapa takisqanku Warmipa takisqan

⁵ Jerusalén llaqtayoq warmikuna, qawariwaychis. Noqaqa yana warmicha kashaspaypas ancha sumaqchan kani. Noqaqa Cedarpi carpakuna hinaraqmi yanay-yanacha kani. Noqaqa Salomonpa wasinpi cortinakuna hinaraqmi yanay-yanacha kani.

⁶ Amayá yanacha kasqaytachu qawawaychis. Noqataqa intin kankaruwan. Wawqeykunan noqapaq phiñarukunku. Paykunaqa uvas chakrankuta cuidapunaypaqmi obligawaranku. Chayraykun uvas chakrayta hina cuerpoytaqa mana cuidaranichu.

⁷ Tukuy sonqoywan munakusqalláy, willaykuway: ¿maypitaq ovejaykikunatari michinkí? ¿Maypitaq chawpi p'unchawtari ovejaykikunata samachinkí? ¿Imanaqtintaq noqari michiqmasiykikunapa ovejankunapa chawpinpi yanqa purishaní? ¿Imanaqtintaq noqatari amigoykikunapa michisqanpi yanqa purichiwankí?

Michiq amigokunapa takisqan

⁸ Qanqa llapallan warmikunamantapas ancha suma-sumaq warmin kanki. Sichus mana yachankichu munakusqayki maypis kasqanta chayqa, ovejakunapa yupinta qatipay. Michiqkunapa hatusninpa cercanpiyá cabrachaykikunata michiy.

Qaripa takisqan

⁹ Ancha munakusqay warmi, qanqa Faraonpa carretanta chutaq sumaq-sumaq yegua hinan kanki.

¹⁰ ¡Ima sumaqmi uyaykiqa areteykikunapa chawpinpiqa! ¡Mayna sumaqmi kunkaykipas collarniykikunapa chawpinpiqa!

¹¹ Qanpaqqa qorimanta aretekunatan qolqewan adornaykuspa ruwachipusqayki.

Warmipa takisqan

¹² Mesaman rey tiyaykuqtinmi, noqapa perfumeyqa muyuriqninpi mishk'illataña q'aparin.

¹³ Noqapaqqa munakusqay qariqa ñuñuykunapa chawpinpi apakachasqay ch'uspachapi perfumasqa mirra hinan.

¹⁴ Noqapaqqa munakusqay qariqa En-gadi lawpi uvas huertakunapa chawpinpi wiñaq alheña t'ika hinan.

Qaripa takisqan

¹⁵ ¡Ancha munakusqay warmi, ancha sumaq buenamoza warmin kanki! Ñawiykikunapas ishkay urpikuna hinaraqmi.

Warmipa takisqan

¹⁶ Ancha khuyakusqalláy, ¡qanqa ancha sumaqmi kanki! Camanchisqa sumaq verdellaña pastokunan kanqa.

Qaripa takisqan

¹⁷ Wasinchispa vigankunataqmi cedrokuna kanqa. Wasinchispa techontaqmi cipreskuna kanqa.