Amós 1 - Ñawpaq Testamento Apurímac Llaqtanchispaq Este nisqa Lawpaq

Señor Dios Israel nacionpa muyuriqninpi nacionkunata juzgananmanta

¹ Judá *nacionpin *rey Uzías gobiernasharan. Israel nacionpitaqmi Joaspa wawan Jeroboam gobiernasharan. Chay tiempopin Amosqa Tecoa llaqtapi ovejakunata michiq karan. Paymanmi Señor Diosqa ishkay wataraq terremoto pasananpaq faltashaqtin Israel nacionta imas pasananmanta huk visionpi rikuchiran.

² Chaymi Diosmanta willakuq *profeta Amosqa khaynata niran: —Señor Diosmi Sión moqomanta qaparimun. Paymi Jerusalén llaqtamanta rayo hina t'oqyaspa waqyakamun. Michiqkunapa michinanku pastokunapas ñaq'erunmi. Carmelo orqopa puntanpas ch'akipunmi, nispa.

³ Señor Diosmi khaynata nin: —Damasco llaqtayoq runakunaqa ancha-anchatapunin huchallirukunku. Chayraykun paykunataqa mana perdonaspa castigasaq. Damasco llaqtayoq runakunaqa Galaad llaqtapi tiyaq runakunatan trilladorawan hinaraq saruchakuspanku ñak'arichiranku. [Nota: Chay trilladoraqa tablamantan karan. Chay tablapa pachanpitaqmi fierrochakuna hinallataq uchuy rumichakuna clavasqa karan, saynapi allinta erananpaq.]

⁴ Chaymi rey Hazaelpa wasintapas ninawan ratayachisaq. Chay ninan rey Ben-adadpa *palacio wasintapas ruphanqa.

⁵ Damasco llaqtapa punkunkunapa cerrojonkunatan p'akisaq. Avén nisqa qeshwa pampa uraypi tiyaq runakunatan destruisaq. Saynallataqmi Bet-edenpi gobiernaq runatapas destruisaq. Siria nacionniyoq runakunatataqmi Kir nisqa lawman presochaspa apachisaq, nispa. Saynataqa Señor Diosmi nin.

⁶ Señor Diosqa khaynatan nillantaq: —Gaza llaqtayoq runakunaqa ancha-anchatapunin huchallirukunku. Chayraykun paykunataqa mana perdonaspa castigasaq. Chay Gaza llaqtayoq runakunaqa llaqtantin runakunatan presochaspa aparanku. Hinaspan Edom nacionniyoq runakunaman *esclavo kanankupaq venderanku.

⁷ Chayraykun Gaza llaqtapa enteron muyuriqninpi murallasqa perqankunata ninawan k'anaykusaq. Hinaqtinmi chay ninaqa palacio wasinkunatapas ruphanqa.

⁸ Asdod llaqtapi tiyaq runakunataqa destruisaqmi. Ascalón llaqtapi gobiernaqtapas chinkachisaqmi. Ecrón llaqtapi tiyaq runakunatapas castigasaqmi. Filistea nacionpi chay kinsantin llaqtakunapi puchuq runakunatapas wañuchisaqmi, nispa. Saynataqa Señor Diosmi nin.

⁹ Señor Diosqa khaynatan nillantaq: —Tiro llaqtapi tiyaq runakunaqa ancha-anchatapunin huchallirukunku. Chayraykun paykunataqa mana perdonaspa castigasaq. Chay Tiro llaqtayoq runakunaqa wawqentin hina kawsanankupaq contrato ruwasqankutan qonqarunku. Chaymi llaqtantin runakunata presochaspa aparanku. Hinaspan Edom nacionniyoq runakunaman esclavo kanankupaq venderanku.

¹⁰ Chayraykun Tiro llaqtapa enteron muyuriqninpi murallasqa perqankunata ninawan k'anaykusaq. Hinaqtinmi chay ninaqa palacio wasinkunatapas ruphanqa, nispa.

¹¹ Señor Diosqa khaynatan nillantaq: —Edom nacionniyoq runakunaqa ancha-anchatapunin huchallirukunku. Chayraykun paykunataqa mana perdonaspa castigasaq. Chay Edom nacionniyoq runakunaqa Israel nacionniyoq runakunatan, karu familianku kashaqtinkupas, mana llakipayaspa *espadawan wañuchinankupaq qatikacharanku. Chay Edom nacionniyoq runakunaqa ancha phiñasqallañan Israel nacionniyoq runakunapaqqa karanku. Chay phiñakuyninkutaqa manan hayk'aqpas qonqarankuchu.

¹² Chayraykun Temán llaqtataqa ninawan k'anaykusaq. Hinaqtinmi chay ninaqa Bosra llaqtapa palacionkunata ruphanqa, nispa.

¹³ Señor Diosqa khaynatan nillarantaq: —Amón nacionniyoq runakunaqa ancha-anchatapunin huchallirukunku. Chayraykun paykunataqa mana perdonaspa castigasaq. Amón nacionniyoq runakunaqa allpankuta linderonkuta hatunyachinankupaqmi, Galaad lawpi wiksayoq warmikunapa wiksankuta kuchuspan khallaranku.

¹⁴ Chayraykun Rabá llaqtapa enteron muyuriqninpi murallasqa perqankunata ninawan k'anaykusaq. Hinaqtinmi chay ninaqa palacio wasinkunatapas ruphanqa. Chaykunaqa pasanqa sasachakuy p'unchawpi hinallataq guerrapi ancha qaparqachay kashaqtinmi.

¹⁵ Reyninkupas hinallataq autoridadninkunapas huk law nacionmanmi preso apasqa kanqaku, nispa. Saynataqa Señor Diosmi nin.