Abdías 1 - Ñawpaq Testamento Apurímac Llaqtanchispaq Este nisqa Lawpaq

Edom nacionpa contranpi Señor Dios kasqanmanta

¹ Kay willakuytan Diosmanta willakuq profeta Abdías *visionpi Señor Diosmanta chashkiran. Hinaspan Edom *nacionniyoq runakunapa contranpi khaynata niran: Noqanchisqa uyariranchismi Señor Diospa willakuynintaqa. Payqa huk willakuqtan nacionkunaman khaynata ninanpaq mandaramun: —Hakuchi; Edom nacionpa contranpi guerrapi peleamusunchis, nispa. Señor Diosmi Edom naciontaqa khaynata nin:

² —Noqaqa nacionkuna ukhupin qantaqa uchuy nacionman tukuchisqayki. Chaymi qanqa ancha despreciasqa kanki.

³ Qantaqa paytukusqa kayniykin engañarusunki. Qanqa qaqakunapa raqranpi hinan tiyashanki. Qanqa chay altokunapin tiyashanki. Hinaspan sonqoykipi khaynata piensanki: ¿Pitaq noqatari kaymanta pampaman wikch'uykuwanman? nispa.

⁴ Sichus anka hinaña altoman oqarikuwaq chaypas, sichus ch'askakunapa kasqanpiña thapaykitapas ruwakuwaq chaypas, noqaqa chaymantan wikch'uykamusqayki. Saynataqa noqa Señor Diosmi nini.

⁵ Sichus suwakuna tuta suwakusuqniyki hamunkuman chaypas, manan llapallan kaqniykikunatachu suwasunkikuman. Uvasta pallaqkuna hamuqkunapas wakin ramakunataqa saqetamunkumanmi. Ichaqa qantaqa enemigoyki runakuna hamuspankuqa q'alatan destruitamusunki.

⁶ Edom nacionniyoq Esaupa miraynin runakuna, qankunapa ancha valorniyoq kaqniykichiskunatapas k'uchun-k'uchun mashkaspankun q'alata suwarusunkiku.

⁷ Yanapanakunaykichispaq acuerdo ruwasqayki runakunan traicionarusunkichis. Paykunaqa tiyasqaykichis nacionmantan qarqosurankichis. Qankunawan hawkalla kaqkunapas contraykipin karunku. Confiasqaykichis amigoykichiskunapas trampatan churarusunkichis. Edom nacionniyoq runakunaqa mana yachayniyoq roqro uma runakunañan kanku.

⁸ Noqa Señor Diosmi khaynata nini: Noqaqa chay castiganay p'unchawmi Edom nacionpi yachayniyoq runakunata destruisaq. Noqaqa Esaupa mirayninkunaq tiyasqan orqokunapi chay yachayniyoq runakunatan destruisaq.

⁹ Temán llaqtayoq runakuna, allin preparasqa valiente soldadoykikunan manchakuymanta khatatatanqaku. Esaupa mirayninkunapa tiyasqan orqokunapiqa manañan pipas kawsashaqqa qepanqachu, nispa.

Edom nacionniyoq runakuna culpayoq kasqankumanta

¹⁰ Señor Diosqa nillarantaqmi khaynata: —Edom *nacionniyoq runakuna, qankunaqa Jacobpa miraynin karu familiaykichis runakunata maltratasqaykichisraykun wiñaypaq p'enqaypi kankichis. Saynallataqmi wiñaypaq chinkachisqa kankichis.

¹¹ Huk law nacionniyoq enemigo runakuna Jerusalén llaqtapa punkunta p'akimuqtinku hinallataq chay runakuna llaqtapa qapaq kayninta suwakuqtinkun, qankunaqa huk qawaylla-qawakurankichis. Saynallataqmi qankunaqa suwakusqankuta sorteaspa rakinakushaqtinkupas hinallataq qapaq kayninkuta apakushaqtinkupas paykuna hina comportakurankichis.

¹² Qankunaqa karu familiaykichis Judá nacionniyoq runakuna desgraciapi tarikushaqtinkupas manan kusikunaykichishchu karan. Paykuna ñak'ariypi tarikushaqtinkupas, manan burlakunaykichishchu karan. Nitaqmi paykuna destruisqa kashaqtinkupas, asipayanaykichishchu karan.

¹³ Jerusalén llaqtamanqa llakikuynin p'unchawpiqa manan haykunaykichishchu karan. Nitaqmi destruisqa kashaqtinkupas kusikunaykichishchu karan. Paykuna mana defendekuyta atishaqtinkuqa kapuqninkunatapas manan suwakunaykichishchu karan.

¹⁴ Manan ishkayman p'alqaq ñan patakunapipas suyapakunaykichishchu karan, ishkapakuq Judá nacionniyoq runakunata wañuchinaykichispaqqa. Nitaqmi ñak'ariy p'unchawpi ishkapakuspa puchuq runakunatapas enemigon runakunamanqa entreganaykichishchu karan, nispa.

Señor Dios nacionkunata juzgananmanta

¹⁵ Señor Diosqa khaynatan nillarantaq: —Llapallan *nacionkunata castiganay p'unchawqa ñan cercaña kashan. Imaynatan qankuna ruwarankichis, chay hinatan qankunatapas chay p'unchawqa ruwasqaykichis. Imayna mana allinkuna ruwasqaykiman hinan castigasqa kankichis.

¹⁶ Imaynan akllakusqay Israel nacionniyoq runakunapas sapaqchasqay ch'uya moqopi ñak'ariranku, chay hinatan Edom nacionniyoq runakunapas hinallataq huk law nacionniyoq runakunapas ñak'arinqaku. Paykunaqa wiñaypaqmi chinkachisqa kanqaku.

¹⁷ Ichaqa akllakusqay nacionmanta puchuq runakunataqmi Sión nisqa ch'uya moqoman ishkapakunqaku, librasqa kanankupaq. Chay Judá nacionpin Jacobpa miraynin runakunaqa allpankuta kaqmanta hap'ikapuspa tiyanqaku.

¹⁸ Jacobpa mirayninkunaqa hinallataq Joseypa mirayninkunapas nina hinaraqmi kanqaku. Esaupa mirayninkunataqmi ch'aphra hina kanqaku. Chaymi Esaupa miraynin runakunataqa chay nina lliwta ruphapunqa. Paykunaqa manan salvakuytaqa atinqakuchu. Saynataqa noqa Señor Diosmi nini.

¹⁹ Neguev lawpi tiyaq Israel nacionniyoq runakunan Esaupa miraynin runakunapa orqonkunata dueñochakunqaku. Sefelá nisqa lugarkunapi tiyaq Israel nacionniyoq runakunataqmi Filistea nacionniyoq runakunapa allpanta dueñochakunqaku. Saynallataqmi Israel nacionniyoq runakunaqa Efrainpa allpanta hinallataq Samaria llaqtayoq runakunapa allpanta dueñochakunqaku. Benjamín ayllu runakunataqmi Galaad lawpi allpakunata dueñochakunqaku.

²⁰ Israel nacionniyoq preso apasqa kaqkunamanta runakunataqmi Canaán nacionniyoq runakunapa allpanta hap'ikuspa dueñochakunqaku. Paykunaqa asta Sarepta llaqtakaman hap'ikunqaku. Jerusalén llaqtamanta Sefarad llaqtaman preso apasqa kaqkunataqmi Neguev lawpi kaq llaqtakunata dueñochakunqaku.

²¹ Paykunaqa llapallankun guerrapi venceqkuna hina Sión moqoman wichanqaku, saynapi Esaupa tiyasqan orqokunata gobiernanankupaq. Noqa Señor Diosmi chaypiqa gobiernasaq, nispa.