Números 1 - Qheshwa Biblia DC

Señorqa Moisesman kamachin israelitasta yupachinanta

^1-2 Israelitas Egiptomanta llojsimusqankumanta iskay kaj watapi, iskay kaj killapi ñaupaj kaj p'unchaypi, Sinaí ch'in pampapi parlarqa, Dioswan tinkukuna toldo ukhupi Moisés kashajtin Señorqa paywan kay jinata parlarqa: Tukuynin qharista israelitasmanta yupaychej ayllusninkuman jina, familiasninkuman jinataj, ajinamanta mashkhachus kasqankuta yachanapaj.

³ Chaykuna kananku tiyan iskay chunka watayojmanta pataman, qanwan Aaronwan sutisninkuta qelqaychej t'aqa t'aqasta maqanakuman llojsinankupaj jina.

⁴ Yanapachikuychejtaj sapa ayllumanta uj qhariwan, mayqenchus ayllupi kamachin chaywan.

⁵ Yanapajkuna qharispa sutisninkoqa kaykuna kanku: Rubén ayllumanta: Sedeurpa wawan Elisur.

⁶ Simeón ayllumanta: Zurisdaipa wawan, Selumiel.

⁷ Judá ayllumanta: Aminadabpa wawan Naasón.

⁸ Isacar ayllumanta: Zuarpa wawan Natanael.

⁹ Zabulón ayllumanta: Helompa wawan Eliab.

¹⁰ Josejpa wawasnimpa ayllusninmanta: Efraín ayllumanta, Amiudpa wawan Elisama; Manasés ayllumantataj Pedasurpa wawan Gamaliel.

¹¹ Benjamín ayllumanta: Gedeonejpa wawan Abidán.

¹² Dan ayllumanta: Amisadaipa wawan Ahiezer.

¹³ Aser ayllumanta: Ocrampa wawan Pagiel.

¹⁴ Gad ayllumanta: Reuelpa wawan, Eliasaf.

¹⁵ Neftalí ayllumanta: Enampa wawan Ahira.

¹⁶ Kaykuna karqanku israelitasta ajllasqasninku sapa ayllumanta kurajkuna, kamachinankupaj ayllusninkupi.

¹⁷ Chaymantataj Moiseswan Aaronwan wajyacherqanku, chay pikunachus ayllusninkumanta ajllasqas karqanku chaykunata.

^18-19 Tukuy israelitastawan tantacherqanku iskay kaj killapi ñaupaj kaj p'unchaypi. Chaypitaj sutisninkuta qelqarqanku ima ayllumantachus kasqankuta, mayqen ayllumantachus kasqankutapis. Iskay chunka watayojmanta patamantaj tukuy qharis yupasqas karqanku, Moisesman Señor kamachisqanman jina. Chay jinata Moisesqa yuparqa Sinaí ch'in pampapi.

^20-21 Ayllusninkuman jina, wasi ayllusninkuman jina, tatasninkoj sutisninman jinataj, yupasqasña kasqankumanta tukuy qharispa sutisninkuta qelqarqanku iskay chunka watayojmanta pataman, tukuyninkupitaj karqanku Israelpa kuraj wawan Rubempa ayllunmanta kajkuna, pichus maqanakuman riyta atejkunamanta qharisqa tawa chunka sojtayoj waranqa phishqa pachajniyoj.

^22-23 Simeompa ayllunmanta yupasqas karqanku phishqa chunka isq'onniyoj waranqa kinsa pachajniyoj.

^24-25 Gadpa ayllunmanta yupasqas karqanku tawa chunka phishqayoj waranqa sojta pachaj phishqa chunkayoj.

^26-27 Judá ayllumanta yupasqas karqanku qanchis chunka tawayoj waranqa, sojta pachajniyoj.

^28-29 Isacar ayllumanta kajkuna yupasqas karqanku phishqa chunka tawayoj waranqa tawa pachajniyoj.

^30-31 Zabulón ayllumanta kajkuna yupasqas karqanku phishqa chunka qanchisniyoj waranqa tawa pachajniyoj.

^32-35 Josejpa ayllusninmanta yupasqas karqanku: Efraín ayllumanta tawa chunka waranqa phishqa pachajniyoj; Manasés ayllumantataj kinsa chunka iskayniyoj waranqa iskay pachajniyoj.

^36-37 Benjamín ayllumanta kajkuna yupasqas karqanku, kinsa chunka phishqayoj waranqa tawa pachajniyoj.

^38-39 Dan ayllumanta kajkuna yupasqas karqanku sojta chunka iskayniyoj waranqa qanchis pachajniyoj.

^40-41 Aser ayllumanta kajkuna yupasqas karqanku tawa chunka ujniyoj waranqa phishqa pachajniyoj.

^42-43 Neftalí ayllumanta kajkuna yupasqas karqanku phishqa chunka kinsayoj waranqa tawa pachajniyoj.

⁴⁴ Ajinata yuparqanku Moiseswan Aaronwan, chunka iskayniyoj aylluntinmanta sapa ayllumanta ujtakama yanapajkunapiwan.

⁴⁵ Israelitastaqa yuparqanku iskay chunka watayojmanta pataman, maqanakuman rinankupaj jinaña karqanku chaykunata.

⁴⁶ Tukuynimpi chay yupasqas karqanku sojta pachaj kinsayoj waranqa phishqa pachaj phishqa chunkayoj.

Levitas imatachus ruwanankumanta

⁴⁷ Levitasqa tukuy aylluntin waj aylluswan khuskan mana yupasqaschu karqanku.

^48-49 Señorqa Moisesman nisqa: Maypachachus tukuynin israelitasta yupashanki chaypachaqa ama yupankichu ni mayqenta Leví ayllumanta kajta.

⁵⁰ Tukuynin levitasmanqa ninki Dioswan tinkukuna toldota qhawanankuta, chay uhqupi imasninchus kajkunata. Paykuna Dioswan toldota tukuy imasnintawan mayman rispapis apanqanku. Chaypi ruwanas kajtapis paykunalla ruwanqanku. Chantapis chay toldoj muyuynimpi paykuna muyurisqata jarakonqanku.

⁵¹ Maymanchus rinapajpis paykuna chay toldota phaskanqanku. Maymanchus chayaspataj paykuna watajmanta chay toldota sayarichenqanku. Pillapis mana levita kajqa chay toldoman qayllaykojtin wañuchisqa kanqa.

⁵² Israelitasqa soldados jina jarakonqanku sapa uj ayllu wiphalasninman jina.

⁵³ Levitasqa Dioswan tinkukuna toldoj muyuyninman jarakonqanku chay toldota waqaychanankupaj, jinamanta ama Diospa phiñakuynin israelitasman jamunampaj.

⁵⁴ Israelitas chayta ruwarqanku imaynatachus Señorqa Moisesman kamachisqanman jina.