San Lucas 9 - Qheshwa Biblia DC

Jesús kachan yachachisqasninta

¹ Jesustaj chunka iskayniyoj yachachisqasninta tantaykuspa, paykunaman atiyta qorqa, kamachiytawan; tukuy laya sajra espiritusta wijch'unankupaj, onqosqastapis thañichinankupaj.

² Chantá kacharqa Diospa reinonmanta predicajta, onqosqastataj thañichejta.

³ Nerqataj: Ama imatapis ñan puriypaj apakuychejchu, ni tojnuta, ni wayaqata, ni t'antata, nitaj qolqeta, nillataj iskay p'achastapis.

⁴ Mayqen wasiman yaykuspapis, chaypi kakuychej ripunaykichejkama.

⁵ Mayllapipis mana wajyarisojtiykichejqa, ripuychej chay llajtamanta, chakisniykichejmanta jallp'ata thalarakuspa; ajinamanta sajra kasqankuta yachanankupaj.

⁶ Chaymanta llojsispataj, rerqanku tukuy ranchosta, salvacionmanta willaspa, tukuynejpitaj onqosqasta thañichispa.

Juan Bautistaj wañuyninmanta

⁷ Kamachej Herodesqa, tukuy imasta Jesús ruwasqanta yachaspa, mana imanakuyta aterqachu, imaraykuchus wakinkuna nisharqanku: Juan Bautista kausarimun wañusqakunamanta, nispa.

⁸ Wajkunataj, profeta Elías ujtawan rikhurimun, nerqanku. Wajkunatajrí nerqanku: Mayqen ñaupa profetachá kausarimun, nispa.

⁹ Herodestaj nerqa: Juantaqa noqa umanta qholucherqani; pitaj kay kanmanri, chay jinatapuni kay imasta paymanta uyarinaypajri? Chaynejta Herodesqa, payta rikuytapuni munasharqa.

Jesús phishqa waranqa runasman mikhuchin

¹⁰ Kutipuspataj apostolesqa Jesusman willarqanku tukuy imata ruwasqankumanta. Paykunata pusarikuspataj, Jesusqa Betsaida llajtapi uj ch'innejman rerqa.

¹¹ Runakunarí qhaterqanku chayta yachaspa; paykunamantaj Diospa reinonmanta parlarqa. Onqosqastataj thañicherqa.

¹² Inti yaykuynejtataj, chunka iskayniyoj apostolesnin qayllaykuspa nerqanku: Kachapullayña runasta, ripuchunku kay muyuypi ranchosman, wasisman ima wajyachikunankupaj, mikhunatapis rantikamunankupaj, imaraykuchus kaypeqa ch'impi kashanchej.

¹³ Paytaj kuticherqa: Qankuna qoychej ari mikhunataqa. Paykunataj kuticherqanku: Phishqa t'antawan, iskay challwallawan kapuwayku; noqayku riykuman chaypuni chay chhika runapaj mikhunata rantej.

¹⁴ Tukuyninkupitaj, phishqa waranqa jina qharis karqanku. Jesustaj nerqa yachachisqasninman: Runasta tiyaykuchiychej phishqa chunkamantakama.

¹⁵ Ajinata ruwarqanku, tukuyninkuta tiyaykuchispa.

¹⁶ Jesustaj chay phishqa t'antasta, iskay challwasta ima makimpi jap'ispa, patata qhawarispa Diosman graciasta qorqa. Partispataj jaywarqa yachachisqasninman runasman rak'inankupaj.

¹⁷ Tukuyninku mikhorqanku, sajsakorqankutaj. Puchoj t'antastataj oqharerqanku chunka iskayniyoj canastapi.

Pedro nin Jesusqa Cristo kasqanta

¹⁸ Uj kuti, Jesús mañakusharqa Diosmanta karunejpi. Paywan kasharqanku chay yachachisqasnin. Qayllaykojtinkutaj taporqa: Runasqa pi kasqaytataj ninkuri?, nispa.

¹⁹ Paykunataj kuticherqanku: Wakenqa ninku Juan Bautista kasqaykita. Wakintaj, Elías nisunku. Wakintajrí, mayqen profetachá kausarimpun, nisunku.

²⁰ Paytaj nerqa: Qankunarí, pi kasqaytataj ninkichej? Pedrotaj kutichispa nerqa: Qanqa Diospa Criston kanki.

Wañuyninmanta Jesús willan

^21-22 Chantá Jesusqa allinta kamacherqa amapuni kayta ni piman willanankuta, nispa: Runaj Churenqa anchata ñak'arinan tiyan, qhesachanqankutaj kuraj runas, jatun sacerdotes, leymanta yachachejkuna ima. Wañuchenqanku, kinsa p'unchayninmantaj kausarimonqa.

²³ Tukuy runamantaj nerqa: Pillapis qhepayta jamuyta munajqa, pay kikinta qhesachakuchun; cruzninta oqharispataj sapa p'unchay qhatiwachun.

²⁴ Tukuy kausayninta salvayta munajqa chinkachenqa; pichus kausayninta noqarayku chinkachejtajrí, salvanqa.

²⁵ Ima allintaj kanman runapaj, sichus mundontin paypata kanman, kausaynintataj chinkachinman chayri?

²⁶ Pillapis noqamanta, palabrasniymantawan p'enqakunman chayqa; paymantapis Runaj Churenqa p'enqakullanqataj, maypachachus lliphipej k'anchaynimpi jamuspa, chantá Tatampa k'anchaynimpiwan, ajllasqa angelespapiwan.

²⁷ Cheqamanta niykichej: Kaypi kajkunamanta wakenqa mana wañonqankuchu, Diospa reinonta rikunankukama.

Jesús waj jinaman tukun

²⁸ Kay nisqanmanta pusaj p'unchayninmantaj, Jesús wicharerqa orqoman Diosmanta mañakoj, pusariykukuspa Pedrota, Santiagota, Juantawan.

²⁹ Jinapi Diosmanta mañakushajtin, uyampa rijch'aynin waj jinaman tukorqa; p'achampis yuraj lliphipejman tukorqa.

³⁰ Iskay qharis rikhurimuspa parlasharqanku Jesuswan; paykunaqa karqanku Moisés, Eliaswan.

³¹ K'anchay ukhupitaj Jerusalempi Jesús wañunanmanta parlasharqanku.

³² Pedro, paywan kajkuna ima, puñuywan atichikushaspapis mana puñorqankuchu; rikorqankutaj Jesuspa k'anchayninta, chay iskay runas Jesuswan kajkunatawan.

³³ Moiseswan, Eliaswan karunchakusqankutawantaj, Pedro nerqa Jesusman: Maestro, walej kanman kaypi qhepakunanchej. Kinsa ch'ujllasta ruwasqayku: Ujta qampaj, ujta Moisespaj, ujtataj Eliaspaj. Chayta parlarqa, imatachus nisqanta mana yachaspa.

³⁴ Jinata parlanankamataj, phuyoqa paykunata pakaykorqa; mancharerqankutaj chay phuyu ukhupi rikhurispa.

³⁵ Phuyu ukhumantataj, Dios Tataj nisqan uyarikorqa: Kaymin munasqa Chureyqa, payta uyariychej.

³⁶ Chay parlamoj ch'inyapojtintaj, Jesusllataña rikorqanku. Ch'intaj paykunaqa kakorqanku, rikusqankumanta mana piman imatapis willaspa.

Supayniyoj waynata Jesús thañichin

³⁷ Q'ayantintaj, orqomanta uraykamusqantawan, ashkha runas payta taripaj jamorqanku.

³⁸ Paykunaj chaupinmantataj, uj runa qhaparispa nerqa: Maestro, qhawaripuway kay wawayta. Pay k'atalla kapuwan.

³⁹ Supaytaj jap'in, qhaparichintaj; sinch'ita thalaspataj siminmanta phosoqota ajtuchin. Mana kachariyta munaspa ñak'arichin.

⁴⁰ Nerqani yachachisqasniykita supayta qharqonankuta, manataj aterqankuchu.

⁴¹ Jesús kuticherqa: Ay, mana feniyoj sajra runaj miraynin! Mayk'ajkamataj qankunawan kasajri? Kayman pusamuy chay wawaykita.

⁴² Wayna qayllaykushajtintaj, supayqa chhallmaspa pampaman urmacherqa. Jesustaj k'amerqa sajra espirituta, waynataj thañikaporqa; tatanmantaj Jesusqa waynata kutichiporqa.

⁴³ Tukuy runastaj t'ukorqanku, Diospa chay jina jatun atiyninmanta. Chay jina kashajtinkutaj Jesusqa yachachisqasninman nerqa:

Jesús ujtawan willan wañuyninmanta

⁴⁴ Allinta uyarichej kayta, amataj qonqaychejchu. Runaj Churinta enemigosnin runaswan jap'ichenqanku.

⁴⁵ Paykunataj mana entienderqankuchu kay nisqantaqa, imaraykuchus paykunapajqa mana sut'ichu karqa, manchachikorqankutaj tapukuytapis.

Pitaj aswan kurajri?

⁴⁶ Chaymantataj, churanakuyta qallarerqanku, mayqenninkuchus kuraj kananmanta.

⁴⁷ Sonqonkupi yuyasqankuta yachaspataj, Jesusqa uj wawata oqharispa ladonman sayacherqa.

⁴⁸ Nerqataj: Pillapis kay wawata sutiypi jap'ejqa, noqata jap'iykuwan; jinallatataj, noqata jap'iwajpis kachamuwajniyta jap'in. Qankunamanta aswan juch'uy kajqa aswan jatun kanqa.

Mana contranchejpi kajqa noqanchejwan

⁴⁹ Juantaj kutichispa nerqa: Maestro, uj runata rikuyku sutiykipi supaykunata qharqojta. Paytataj jark'arqayku qharqonanta, mana noqanchejwan kasqanrayku.

⁵⁰ Jesustaj nerqa: Ama jark'aychejchu. Pichus mana contranchejpi kajqa noqanchejwan kashan.

Jesús k'amin Santiagota Juantawan

⁵¹ Jesusqa janaj pachaman rinan tiempo qayllamojtin, kallpachakorqa Jerusalenman rinampaj.

⁵² Kachastataj ñaupacherqa, paykunataj rerqanku Samariapi uj ranchoman uraykamunampaj wakichipunankupaj.

⁵³ Manataj samaritanosqa uyariyta munarqankuchu, Jerusalenman rishasqanta yuyaspa.

⁵⁴ Yachachisqasnin Santiagowan, Juanwantaj kayta rikuspa, nerqanku: Señor, munankichu kamachinaykuta cielomanta nina uraykamuspa paykunata q'olananta; [imaynatachus Elías ruwarqa ajinata?]

⁵⁵ Kutirispataj paykunata k'amerqa: [Qankunaqa mana yachankichejchu ima espiritumantachus kasqaykichejta.]

⁵⁶ [Runaj Churenqa, mana runaspa kausayninkuta chinkachejchu jamun, manachayqa salvaj.] Chaymantataj waj ranchoman riporqanku.

Jesuswan riyta munajkuna

⁵⁷ Rishaspataj, ñampi ujnin nerqa: Señor, qanta qhatisqayki maymanchus rishanki chayman.

⁵⁸ Jesustaj nerqa. Atojkunajtaqa qaqapi jusk'usnin tiyan, p'isqospis thapasniyoj; Runaj Churimpatarí, mana maypi umanta churaykuspa samarikunallampajpis kanchu.

⁵⁹ Wajmantaj nerqa: Qhatiway. Paytaj kuticherqa: Señor, ñaupajtaqa tataytaraj p'ampaykamusaj ari, nispa.

⁶⁰ Jesustaj payman nerqa: Saqey wañusqas wañusqasninkuta p'ampajta; qantaj rispa Diospa reinonmanta willamuy.

⁶¹ Chantá ujpis nillarqataj: Noqaqa qhatisqayki Señor, chaypajrí saqeway ari wasiypi kacharpayata ruwamunaypaj.

⁶² Jesustaj payman nerqa: Pillapis, llank'ashaspa aradoj manceranta jap'ispaña qhepata qhawajqa, mana Diospa reinompaj jinachu.