San Lucas 7 - Qheshwa Biblia DC

Jesús thañichin capitampa uywasqanta

¹ Chay imasta runasman parlayta tukuspa Jesusqa Capernaumman yaykorqa.

² Chaypitaj tiyarqa uj capitán; paypa munasqa uywasqantaj onqosqa kasharqa wañoj jinaña.

³ Capitanqa Jesusmanta parlajta uyarispa, kacharqa judiosmanta kurajkunata, mañakuspa Jesusta pusamunankuta uywasqanta thañichinampaj.

^4-5 Jesusman qayllaykuspataj maytapuni mañarqanku rinanta: Allimpuni kanman kay capitanta yanapanaykeqa; imaraykuchus payqa munakun ayllunchejta, sinagogatapis ruwachipuwanchej, nispa.

⁶ Jesustaj paykunawan rerqa. Wasi qayllapiña kashajtinkutaj, capitanqa kausaqesninta kachamorqa Jesusman ninankupaj: Señor, ama qhasi mana kajta jamuychu, noqaqa mana allin runachu kani wasiyman yaykunaykipaj.

⁷ Chaynejta mana munarqanichu qanman jamuyllatapis. qanqa uj simillata niy, uywasqaytaj thañikaponqa.

⁸ Noqapis kamachejniyoj kani, jinallatataj soldadostapis kamachini. Ujninta nini rinanta, paytaj rin. Wajta, jamuy nini, jamuntaj. Uywasqaytapis uj imata ruway nini chayqa, ruwan.

⁹ Chayta uyarispa Jesusqa t'ukorqa; chantá paywan rejkunaman kutirispataj, nerqa: Cheqamanta, kay runaj feninta jinaqa, mana Israel ayllupipis tarerqanichu.

¹⁰ Kachasqa runastaj wasiman kutipuspa, onqosqa kamachitaqa thañisqataña tariparqanku.

Jesús kausarichin Nainmanta viudaj wawanta

¹¹ Chaymanta Jesús risharqa Naín llajtaman; yachachisqasnintaj ashkha runas ima paywan risharqanku.

¹² Llajta qayllapitaj tinkorqa uj wañusqata p'ampaj apashajkunawan. Ayaqa, viudaj uj k'ata wawan karqa. Ashkha runastaj llajtamanta paywan risharqanku.

¹³ Señortaj viudata waqashajta rikuspa, khuyaspataj, nerqa: Ama waqaychu.

¹⁴ Qayllaykuspataj aya apanata llankharerqa; wantojkunataj sayaykorqanku. Jesustaj wañusqaman nerqa: Wayna, qanta niyki, sayariy.

¹⁵ Wañusqataj tiyaykamuspa parlarerqa. Jesustaj waynataqa kausashajta mamanman qoporqa.

¹⁶ Chayta rikuspataj tukuyninku mancharikorqanku. Diosta yupaychayta qallarerqanku nispa: Jatun profeta noqanchej ukhupi rikhurin. Dios ajinata ayllunta watukoj jamun.

¹⁷ Chay ruwasqantaj uyarikorqa tukuynin Judeapi, muyuriynintimpi ima.

Juan Bautistaj kachasnin

^18-19 Kay tukuy imasmanta Juanman yachachisqasnin willamorqanku. Paykunamanta iskay yachachisqasninta wajyaspataj, Juanqa kacharqa Señorta tapojta: Qanchu kanki pichus jamunan karqa chayqa, chayrí wajtachu suyasqayku?

²⁰ Chantá Jesusman rispataj paykunaqa nerqanku: Juan Bautista kachamuwayku qanta tapojta: Qanchu kanki pichus jamunan karqa chayqa, chayrí wajtachu suyasqayku?

²¹ Chay kikimpacha ashkha runasta thañicherqa nanaykunasninkumanta, onqoykunasninkumantapis. supayniyojkunatapis thañichillarqataj. Chanta ashkha ciegostapis qhawaricherqa.

²² Juampa kachasninman kutichispataj nerqa: Kutipuychej, Juanman willamuychej imastachus rikusqaykichejta, uyarisqaykichejta ima: Ciegos rikunku, suchus puririnku, leprayojkuna llimphuchasqas kanku, joq'aras uyarinku, wañusqas kausarimunku, wajchasmampis evangelio willakun.

²³ Kusikuyniyojtaj kanqa pichus noqarayku mana misk'ajqa.

²⁴ Kachas ripusqankutawantaj, Jesusqa Juanmanta runasman willayta qallarerqa, nispa: Imatataj ch'in pampapi rikumorqankichej? Wayraj kuyuchisqan soqosotachu?

²⁵ Astawanqa, imata rikorqankichej? Uj sumaj p'achayoj runatachu? Qankuna yachankichej, sumajta p'achallisqas kajkunaqa, kusisqa kausajkunapis reyespa palaciosnimpi kashanku.

²⁶ Chantaqa, imatapunitaj rikumorqankichej? Uj profetatachu? Arí niykichej, profetamantapis astawanraj.

²⁷ Paymantaqa escribisqaña karqa: Kayqa, kachamuni willajniyta ñaupaqeykita, paytaj ñaupaqeykipi ñanta wakichipusonqa.

²⁸ Niykichej, tukuy warmismanta nacejkunamanta mana ujllapis Juanmanta aswan kuraj kanchu; chaywampis, Diospa reinompi aswan juch'uy kajqa, paymanta aswan kurajraj.

²⁹ Kayta uyarispataj tukuy runa, cobrajkuna ima, Diosqa cheqampuni nerqanku, Juampa bautismonwan bautizachikuspa.

³⁰ Fariseostaj leymanta yachachejkuna ima qhesacharqanku, imatachus Dios paykunanejta ruwayta munasqanta, mana Juanwan bautizachikuspa.

³¹ Señortaj nerqa: Imamantaj rijch'achisaj kay runaspa miraynintari? Pimantaj rijch'akunkuri?

³² Paykunaqa rijch'akunku wawas plazapi tiyaraspa qhaparinakojkunaman, nispa: Qenata tocapuyku, manataj tusunkichejchu; llakiy takiykunata takipuyku, manataj waqankichejchu.

³³ Juan Bautistaqa jamorqa t'antata mana mikhoj, nitaj vinota ujyaj, qankunataj supayniyoj ninkichej.

³⁴ Runaj Churin jamojtintaj, mikhusqanrayku, ujyasqanraykutaj ninkichej: Kay runaqa anchata mikhun, anchata vinota ujyan, juchasapaswan rejsinakoj, impuestota cobrajkunawan ima, nispa.

³⁵ Diospa yachaynenqa ruwasqasnimpi rejsichikun.

Jesusqa fariseo Simompa wasimpi

³⁶ Uj fariseo wajyarqa Jesusta paywan mikhunampaj. Wasinman yaykuspataj mikhoj tiyaykukorqa.

³⁷ Chantá llajtapi kaj, uj juchasapa warmitaj, fariseoj wasimpi Jesús kasqanta yachaspa, apamorqa q'apaj jawina perfumeta, yuraj rumi yuritupi.

³⁸ Paypa qhepampi, chakisnin qayllapi tiyaykukuspa waqayta qallarerqa; waqayninwantaj chakisninta joq'ochaspa chujchasninwan ch'akicherqa. Chakisninta much'araspataj perfumewan jich'aykorqa.

³⁹ Kayta rikuspataj, Jesusta wajyaj fariseoqa umachakorqa: Sichus kay runa cheqamanta profeta kanman chayqa, rejsinmanchá pichus, imayna laya juchasapa warmichus llankhaykusqanta.

⁴⁰ Jesustaj chayman kutichispa nerqa: Simón, ujta nisqayki. Paytaj nerqa: Niway ari, Maestro, nispa.

⁴¹ Uj qolqe manoj runaman, iskay runas manu karqanku. Ujnin kajqa phishqa pachaj denario qolqe manu karqa; ujnintaj phishqa chunka.

⁴² Mana imaynamanta kutichipuyta atejtinkutaj, iskayninkuta khuyaspa, manaña mañakaporqachu. Kunan niway ari, mayqentaj chay iskayninkumanta astawan munakonqari?

⁴³ Simontaj kuticherqa: Pichus aswan manu karqa, chay kasqanta yuyani. Paytaj nerqa: Arí, cheqamanta ninki, nispa.

⁴⁴ Warmiman kutirispataj Simonman nerqa: Rikushankichu kay warmita? Wasiykiman yaykumorqani, manataj yakullatapis jaywariwarqankichu chakisniypaj; payrí, waqayninwan chakisniyta joq'ochan chujchanwantaj ch'akichin.

⁴⁵ Mana much'awarqankichu; payrí yaykumuytawan chakisniyta much'aspa mana sayk'unchu.

⁴⁶ Umayta aceitewan mana jawiwarqankichu; payrí, chakisniyta q'apaj, perfumewan jawiwan.

⁴⁷ Chaynejta niyki, ashkha juchasnin pampachasqa kasqanta, imaraykuchus anchata munakorqa; pisi perdonasqarí, pisita munakun.

⁴⁸ Warmimantaj nerqa: Juchasniyki pampachasqasña kanku.

⁴⁹ Tukuy paywan khuska mikhojkunataj, paykuna ukhu niyta qallarerqanku: Pi runataj kay, juchastapis pampachajri?

⁵⁰ Jesustaj warmiman nerqa: Creesqayki salvasunki, sonqo junt'asqa ripuy, nispa.