San Lucas 5 - Qheshwa Biblia DC

Ashkha challwasta jap'inku

¹ Jesús uj kuti Genesaret qocha cantopi kashajtin, maytapuni runas payman k'iskikamorqanku. Diospa palabranta uyarinankupaj.

² Chaypi rikorqa iskay botesta. Challwiristaj botesninkumanta llojsispa challwa jap'ina ch'ipasta t'ajsasharqanku.

³ Jesusqa Simompa botenman yaykuspa, mañarqa ithirichinanta aswan qocha ukhunejman; chay botepi tiyaykukuspataj, chaymanta yachacherqa ashkha runasman.

⁴ Parlayta tukuspataj Simonman nerqa: Apay boteykita aswan chaupiman, chantá wijch'uykuychej ch'ipasniykichejta challwata jap'inaykichejpaj.

⁵ Simontaj kutichispa nerqa: Maestro, tukuy tutantin llank'ayku, nitaj uj challwallatapis jap'ikuychu; chaywampis, palabraykiman jina ujtawan wijch'uykusaj ch'ipata.

⁶ Ajinata ruwaspataj, may chhika challwata jap'erqanku, ch'ipasninkupis llik'ikunayasharqaña.

⁷ Waj botepi challwiri masisninkutataj wajyarqanku, jamuspa yanapanankupaj. Jamuspataj iskaynin botesman junt'acherqanku; chay jawataj botesqa chinkaykoj jinaña kasharqanku.

⁸ Chayta rikuspa Simón Pedroqa, Jesusman qonqoriykukuspa nerqa: Señor ithirikuy noqamanta, imaraykuchus juchasapa runa kani, nispa.

⁹ Ashkha challwata jap'isqankurayku, Pedroqa mayta t'ukorqa, jinallatataj paywan kajkunapis.

¹⁰ Kikillantataj Zebedeoj churisnin Santiagowan, Juanwan t'ukorqanku; paykunaqa Pedroj challwiri masisnin karqanku. Jesustaj Simonman nerqa: Ama mancharikuychu, kunanmantaqa runastañataj challwata jina jap'inki.

¹¹ Paykunataj botesta qocha cantoman aysaspa, tukuy imatataj saqerparispa Jesuswan rerqanku.

Jesús thañichin lepra onqoyniyojta

¹² Uj llajtapi Jesús kashajtin, chaypi uj runa leprawan onqosqa kasharqa; paytaj Jesusta rikuytawan qonqoriykukuspa k'umuykorqa pampakama, mañakorqataj: Señor, munanki chayqa, atinki llimphuchawayta, nispa.

¹³ Jesustaj makisninwan llankharispa nerqa: Arí munani, llimphuchasqa kay. Onqosqa runataj chay kikimpacha lepranmanta thañikaporqa.

¹⁴ Jesustaj nerqa: Ama ni piman willankichu; sacerdotellaman qhawachikoj riy; llimphuchasqa kasqaykimantataj ofrendata qoy, Moisespa kamachisqanman jina; chaywantaj thañisqaña kasqayki yachakunampaj.

¹⁵ Jesusmanta willaykunastaj astawan astawan uyarikorqa; may ashkha runastaj jamorqanku uyarej, onqoykunasninkumanta thañikapuyta munaspa.

¹⁶ Chaywampis Jesusqa ch'inkunaman rej Diosmanta mañakoj.

Jesús thañichin tunuyasqa runata

¹⁷ Uj kuti, Jesús yachachinankama, wakin fariseos leymanta yachachejkunawan chaypi tiyasharqanku. Paykunaqa jamusqanku tukuynin Galilea ranchosmanta, Judeamanta, Jerusalenmanta ima. Señorpa atiynintaj Jesuswan karqa onqosqasta thañichinampaj.

¹⁸ Wakin runastaj phullupi wantumorqanku uj tunuyasqa runata. Chay runatataj wasi ukhuman pusaykuyta munarqanku Jesuspa ñaupaqenman.

¹⁹ Manataj ni maynejta yaykuyta aterqankuchu, ashkha runa k'iskikamusqanrayku; chayrayku wicharerqanku wasi pataman, tejasta orqhospataj, chaynejta chaupiman phullupi uraykucherqanku Jesuspa ñaupaqenman.

²⁰ Creesqankuta rikuspa Jesusqa onqosqaman nerqa: Runa, juchasniykeqa pampachasqasña kanku.

²¹ Chantá leymanta yachachejkuna, fariseoswan, paykuna ukhupi unanchaspa nisharqanku: Pitaj kay runa Diospa contranta parlajri? Manachu Dioslla juchastaqa pampachayta atin?, nispa.

^22-23 Yuyasqankuta yachaspataj Jesús kuticherqa: Imaraykutaj chay jinata yuyashankichejri? Kikillampuni, juchasniykimanta perdonasqaña kanki niypis, sayarikuy puririytaj niypis.

²⁴ Kunan rikunkichej Runaj Churin atiyniyoj kasqanta, kay pachapi juchasta pampachanampaj. Tunuyasqa runamantaj nerqa: Qanta niyki; jatarikuy, phulluykita oqharispa ripuy wasiykiman.

²⁵ Kikimpachataj chay runaqa, paykunaj rikunankuta sayarispa, phullunta oqharispa wasinman riporqa Diosta yupaychaspa.

²⁶ Tukuyninkutaj t'ukuspa Diosta yupaycharqanku, mancharisqastaj nerqanku: Mana jayk'aj rikusqanchejta rikunchej kunanqa, nispa.

Jesús wajyan Leví sutiyoj runata

²⁷ Chaymanta llojsiytawan Jesús rikorqa uj impuesto cobraj runata, Leví sutiyojta. Cobranan chaypi tiyakushajtintaj Jesús nerqa: Qhatiway, nispa.

²⁸ Chantá Levitaj sayariytawan, tukuy imanta saqerpayaspa Jesusta qhaterqa.

²⁹ Levitaj wasimpi wakicherqa jatun mikhuyta Jesuspaj; ashkha cobrajkunataj, wajkunawan khuska mikhoj tiyaykorqanku.

³⁰ Fariseostaj leymanta yachachejkunawan thutorqanku Jesuspa yachachisqasnimpaj, nerqankutaj paykunaman: Imaraykutaj mikhunkichej ujyankichejtaj cobrajkunawan juchasapaswan imari, nispa.

³¹ Jesustaj kuticherqa: Walej kajkunaqa jampejta mana wajyanankuchu tiyan, manachayqa onqosqaslla.

³² Mana cheqan sonqoyoj runasta wajyajchu jamorqani Diosman kutirinankupaj, manachayqa juchasapasllata.

Ayunomanta

³³ Chaypacha, Jesusta taporqanku: Imaraykutaj Juampa yachachisqasnin, fariseospatapis ashkha kutita ayunanku, Diosmantataj mañakunku, qampa yachachisqasniykirí mikhunku ujyankutaj?

³⁴ Jesustaj kuticherqa: Qankunarí atiwajchejchu casamientopi kajkunata mana mikhuchiyta, casarakoj paykunawan kashajtin?

³⁵ Chayamonqa tiempo maypachachus casarakoj qhechusqa kanqa. Chaypachamá ayunanqanku.

³⁶ Nillarqataj kay rijch'anachinata: Mana pipis mosoj p'achata llik'ispa mauk'a p'achaman siranmanchu: imaraykuchus mosoj kajqa mauk'ata llik'enqa; manataj walejchu mauk'api mosojqa.

³⁷ Manataj pipis mosoj vinota mauk'a qara botasman jich'anmanchu; imaraykuchus mosoj vinoqa botasta phatachenqa; vinotaj suronqa, iskayninkutaj usonqanku.

³⁸ Chayrayku mosoj vinotaqa jich'anqanku, mosoj qara botasman; chay jinapeqa mana usonqankuchu iskaynimpis.

³⁹ Mana pipis unayniyoj vinota ujyajqa munanmanchu mosoj vinotaqa, unayniyojpuni aswan sumaj, nispa.