San Lucas 3 - Qheshwa Biblia DC

Juan Bautistaj predicasqan

¹ Chunka phishqayoj watapi, kamachej Tiberio kamachishajtin; Poncio Pilato Judeapi kamachej karqa. Herodestaj Galileapi; wauqen Felipetaj Itureapi, Traconitepiwan; Lisaniastaj Abiliniapi.

² Chaypacha Anás, Caifaswan kuraj sacerdotes kashajtinku, Diospa palabran Zacariaspa wawan Juanman jamorqa, ch'in pampapi kashajtin.

^3-4 Tukuy Jordán mayu muyuynintimpitaj Juanqa predicarqa Diosman kutirina bautismomanta, juchas pampachasqa kanampaj, profeta Isaiaspa librompi escribisqaman jina: Uj runaj qhaparisqan ch'innejpi uyarikun: Señorpa ñanninta wakichiychej, purinasnintataj cheqanyachiychej.

⁵ Tukuy wayq'o junt'asqa kanqa; pampachakonqataj tukuy orqo, tukuy moqo; wist'u ñankuna cheqanchasqas kanqa; rumirara ñankunapis pampachasqas.

⁶ Tukuy runastaj Diospa salvacionninta rikonqanku.

⁷ Juanwan bautizachikoj llojsimojkunamantaj nerqa: Katarikunaj miraynin! Pitaj yachachisorqachej Diospa jamoj k'ajaj phiñakuyninmanta ayqeytari?

⁸ Allinta kausaychej ari, rikuchispa juchamanta kutirikusqaykichejta; ama qankunapuralla ninakuychejchu: Tatanchejqa Abraham nispa. Noqa niykichej, Diosqa kay rumismantapis atin oqhariyta Abrahampaj wawasta.

⁹ Hachaqa ñapis wakisqaña kashan sach'asta saphinmanta urmachinapaj. Chayrayku, tukuy sach'a mana allinta poqojqa, urmachisqa, ninapitaj lauranqa.

¹⁰ Runastaj taporqanku: Chantá imanasqaykutajri?, nispa.

¹¹ Juantaj kuticherqa: Pichus iskay p'achayoj kajqa, qochun mana kapojman, mikhunayoj kajpis ajinallatataj ruwachun.

¹² Jamullarqankutaj bautizachikoj impuestota cobrajkuna, Juantataj taporqanku: Maestro, imatataj kunan ruwasqayku?

¹³ Paytaj kuticherqa: Kamachisqaman jina maychus kajllata cobraychej, ama astawanqa.

¹⁴ Chantá wakin soldadospis tapullarqankutaj: Noqaykurí imanasqaykutaj?, nispa. Paytaj kuticherqa; Ama pimantapis ni imanta qhechuychejchu, nitaj pitapis qhasimanta tumpaychejchu. Pagollaykichejwan allin kakuychej.

¹⁵ Chayta uyarispataj runasqa suyasharqanku, sonqonkupi yuyaspa, manachu Juanqa Cristo?, nispa.

¹⁶ Juantaj kuticherqa tukuyman: Noqaqa cheqamanta yakuwan bautizaykichej. Qhepaytataj waj jamushan, Santo Espirituwan bautizaj, ninawantaj. Payqa noqamanta aswan atiyniyoj; chayrayku, ujut'asnimpa watusnillantapis mana phaskayta atiymanchu.

¹⁷ Jorcapis makimpiña kashan, erapi trigota wayrachispa pirwaman jallch'anampaj; pajantataj ruphachinampaj mana thasnukoj ninapi.

¹⁸ Ajinata kay yuyaykunaswan, wajkunaswan ima Juanqa runasman evangeliota willarqa.

¹⁹ Chantá kamachej Herodesqa, Juanwan k'amichikorqa Herodiasrayku; tukuy sajrata ruwasqanmanta ima. Herodiasqa Felipe wauqempa warmin karqa.

²⁰ Chay tukuy sajra ruwasqasninmantaj astawan yaparqa, Juanta carcelman wisq'achispa.

Jesús bautizachikun

²¹ Juanqa runasta bautizaytawan, Jesustapis bautizallarqataj. Jesús Diosmanta mañakushajtintaj cielo kicharikorqa.

²² Santo Espiritutaj paypa patanman uraykamorqa paloma jina. Cielomantataj Dios nimorqa: Qanmin munasqa Churiy kanki, qannejta sonqo junt'asqa kani.

Jesuspa ñaupa tatasnimpa sutisnin

²³ Jesusqa predicayta qallarishaspa, kinsa chunka watayoj jina karqa. Creejtaj kanku Elejpa wawan Josejpa churin kasqanta.

²⁴ Kaytaj Matatpa wawan, Levéj wawan, Melquej wawan, Janaj wawan, Joséj wawan,

²⁵ Matatiaspa wawan, Amospa wawan, Nahumpa wawan, Eslej wawan, Nagaejpa wawan,

²⁶ Maatpa wawan, Matatiaspa wawan, Semeejpa wawan, Josejpa wawan, Judaj wawan,

²⁷ Joanaj wawan, Resaj wawan, Zorobabelpa wawan, Salatielpa wawan, Nerej wawan,

²⁸ Melquej wawan, Adej wawan, Cosampa wawan, Elmodampa wawan, Erpa wawan,

²⁹ Josuéj wawan, Eliezerpa wawan, Jorimpa wawan, Matatpa wawan,

³⁰ Levéj wawan, Simeompa wawan, Judaj wawan, Joséj wawan, Jonampa wawan, Eliaquimpa wawan,

³¹ Meleaj wawan, Mainampa wawan, Matataj wawan, Natampa wawan,

³² Davidpa wawan, Isaejpa wawan, Obedpa wawan, Boozpa wawan, Salmompa wawan, Naasompa wawan,

³³ Aminadadpa wawan, Arampa wawan, Esrompa wawan, Farespa wawan, Judaj wawan,

³⁴ Jacobpa wawan, Isaacpa wawan, Abrahampa wawan, Tarej wawan, Nacorpa wawan,

³⁵ Serugpa wawan, Ragaujpa wawan, Pelegpa wawan, Heberpa wawan, Salajpa wawan,

³⁶ Cainampa wawan, Arfaxadpa wawan, Sempa wawan, Noejpa wawan, Lamejpa wawan,

³⁷ Matusalempa wawan, Enocpa wawan, Jaredpa wawan, Mahalaleelpa wawan, Cainampa wawan,

³⁸ Enospa wawan, Setpa wawan, Adampa wawan, Diospa wawan.