San Lucas 12 - Qheshwa Biblia DC

Fariseos puraj uyas kanku

¹ Runas tantakamorqanku waranqa waranqasmanta. Anchata k'iskikamuspataj sarunakusharqanku; ñaupajtataj yachachisqasninman nerqa: Qhawakuychej fariseospa levaduranmanta. Chayqa puraj uya kayninku.

² Mana imapis qhatasqa kanchu, mana sut'inchakojqa; nitaj pakasqa kajpis mana yachakojqa.

³ Chaynejta, tukuy imata laqhapi nisqaykichejqa, sut'i p'unchaypi uyarikonqa; imatachus wasi wisq'asqapi ningrillaman chhichiykusqaykichejpis, qhaparikonqa wasi patamantapacha.

Pitataj manchachikusunri?

⁴ Kausaqesníy, qankunaman niykichej: Ama manchachikuychejchu cuerpota wañuchejkunata; paykunaqa manaña imatapis ruwayta atinkuchu.

⁵ Noqa nisqaykichej pitachus manchachikunaykichejta. Manchachikuychej, pichus wañuchiytawankama, atiyniyoj kashan infiernoman wijch'unampaj, chayta. Arí, manchachikuychej payllata.

⁶ Manachu phishqa p'isqetusta vendenku iskay phisurayku? Chaywampis, ni ujnin qonqasqachu Diospa ñaupaqempeqa.

⁷ Yachaychej, umaykichejpi chujchasniykichejpis tukuynin yupasqas kashanku. Ama manchachikuychejchu, imaraykuchus qankunaqa astawan munasqas kankichej ashkha p'isqosmanta nisqaqa.

Jesucristota rejsinamanta

⁸ Noqataj niykichej: Pillapis runaspa ñaupaqempi rejsiwasqanta nenqa chayqa, Runaj Churimpis, Diospa angelesnimpa ñaupaqempi, payta rejsini nillanqataj.

⁹ Runaspa ñaupaqempi mana rejsej tukuwanqa chayqa, noqapis mana rejsisajchu Diospa angelesnimpa ñaupaqempi.

¹⁰ Pillapis Runaj Churimpa contranta rimanman chayqa, juchan pampachasqa kanqa. Pitajchus Santo Espíritoj contranta rimanman chayrí, chay juchaqa mana pampachasqachu kanqa.

¹¹ Sinagogasman, juezkunaman, kurajkunaman ima pusasojtiykichejqa, ama llakikunkichejchu imaynatachus kutichikunaykichejmanta, chayrí, imatachus ninaykichejmanta.

¹² Chay kikimpachaqa, Santa Espíritu yachachisonqachej imatachus parlanaykichejta.

Wampu qhapaj runa

¹³ Runakunamanta ujnin nerqa: Maestro, niripuway wauqeyman chayaqeta rak'inakunaykuta.

¹⁴ Jesustaj kuticherqa: Imanayasunkitaj runa, pitaj churawarqa juezta jina, qankunaman rak'inaypaj?

¹⁵ Chantá nillarqataj: Qhawakuychej, tukuy imasta munapayaymanta. Runaj kausaynenqa mana qhapaj kayllapichu kashan.

¹⁶ Chaypacha uj rijch'anachinamanta nerqa: Uj qhapaj runa karqa, jallp'asnintaj ashkhata poqorqa.

¹⁷ Yuyaynimpitaj payqa nisharqa: Imanasajtari? Manaña maymampis waqaychayta atinichu cosechasniytaqa.

¹⁸ Chantá nillarqataj: Kayta ruwasaj. Pirwasniyta urmachispa, aswan jatuchajta ruwasaj; chaypitaj tantasaj cosechasniyta, tukuy kapuyniytawan.

¹⁹ Almaymantaj nisaj: Almáy, kunanqa ashkhaña tiyapusunki kapuyniyki, sumaj jallch'asqa unay wataspaj; samarikullayña, mikhuy, ujyay, kusikuytaj, nispa.

²⁰ Diostaj payman nerqa: Wampu, kunan ch'isipacha almaykita mañaj jamonqanku; pipajtaj kanqa chay tantasqaykiri?

²¹ Ajinallataj, pichus payllapaj qhapajyajqa, Diospajqa mana imayoj.

Dios khuyakun wawasninta

²² Chantaqa yachachisqasninman nerqa: Chayrayku niykichej. Ama phutikuychejchu kausayniykichejmanta, imatachus mikhunaykichejmanta; nitaj imawanchus p'achallikunaykichejmantapis.

²³ Kausayqa astawan mikhunamantaqa, cuerpopis p'achamanta nisqaqa.

²⁴ Qhawariychej, p'isqosqa mana tarpunkuchu nitaj ruthunkuchu; nillataj jallch'ananku kanchu, nitaj pirwankupis; Diostaj paykunataqa mikhuchin. Manachu qankunaqa, aswan munasqas kankichej p'isqosmanta nisqaqa?

²⁵ Mayqentaj qankunamanta anchata llakikuspa, khuskan metrota jina sayayninman yapaykukunman?

²⁶ Aswan pisi kajllatapis ruwayta mana atinkichejchu chayqa, imaraykutaj phutikunkichej waj imasmantari?

²⁷ Qhawariychej lirio t'ikasta imaynatachus wiñasqankuta. Chaykunaqa mana llank'ankuchu nitaj phushkankuchu. Astawanqa niykichej, Salomompis tukuy qhapaj atiynimpi, manapuni ujnin t'ika jinallapis p'achallikorqachu.

²⁸ Sichus Dios chay jinata p'achallichin kunan campo qhorata, q'ayataj hornopi ruphajta chayqa, imayná mana qankunatapis p'achallichisonqachejchu pisi feniyoj runas?

²⁹ Qankunaqa ama llakikuychejchu imatachus mikhunaykichejmanta, nitaj ujyanaykichejmantapis. Ama ari chayraykoqa phutisqallapuni kaychejchu.

³⁰ Kay mundopi runasqa, kay tukuy imasta mask'anku. Tataykichejqa yachanña kay imasmanta pisichikusqaykichejta.

³¹ Astawanqa, Diospa reinonta mask'aychej, kay tukuy imatataj yapata jina Dios qosonqachej.

Kapuyniykichej janaj pachapi kachun

³² Juch'uy tropa ovejasníy, ama manchachikuychejchu, imaraykuchus Tataykichejmanqa allin rijch'an qankunaman reinonta qoy.

³³ Kapuyniykichejta vendeychej, wajchasman rak'inaykichejpaj; chantá ruwakuychej mana thantakoj wayaqata, waqaychaychejtaj kapuyniykichejta janaj pachapi, chaypeqa mana tukukonqachu; maymanchus suwa mana yaykunchu, nitaj thutapis k'utunchu, chayman.

³⁴ Maypichá kapuyniykichej kashan, chayllapitaj sonqoykichejpis kashan.

Wakichisqas kananchej

³⁵ Chumpisniykichej mat'isqas kachunku, k'anchanasniykichejpis jap'ichisqas.

³⁶ Qankunataj, runas patronninkuta casamientomanta kutimunanta suyajkuna jina kaychej; paykunaqa suyanku, chayamuspa wajyajtinkama kicharinankupaj.

³⁷ Kusikuyniyoj kanqanku chay kamachis, mayqenkunatachus patronnin chayamuspa qhawashajta taripajtin. Cheqamanta niykichej, chay patrón kikin chumpinta mat'ikonqa; mesapi tiyaykuchispataj, pay kikin mikhunata jaywanqa.

³⁸ Jinapeqa chaupi tutapis jamuchun; chayrí chhajchullatañapis. Paykunatataj rijch'ashajta taripanman chayqa, kusikuyniyoj kanqanku chay kamachisqa.

³⁹ Allinta yachanaykichej kaytaqa; sichus wasiyoj yachanman, ima horatachus suwa jamunanta chayqa, mana puñuspa suyanman, manataj suwachikunmanchu.

⁴⁰ Chaypaj qankunaqa wakichisqas kanaykichej tiyan, imaraykuchus mana yuyasqaykichej horapi Diospa Churenqa jamonqa.

Iskay laya kamachis

⁴¹ Chantá Pedro taporqa: Señor, kay rijch'anachinaqa noqallaykupajchu, chayrí tukuy runaspajchu?

⁴² Señortaj kuticherqa: Pitaj allin yuyayniyoj junt'aj mayordomo, mayqentachus patronnin churan wasi qhawajta, mikhuchinampajtaj tiempompi?

⁴³ Kusikuyniyoj kanqa jaqay kamachi, pitachus patronnin ajinata ruwashajta taripanqa chayqa.

⁴⁴ Cheqamanta niykichej; chay jina kamachitaqa patronnin tukuy kapuyninta qhawajta churanqa.

⁴⁵ Chay kamachichus sonqompi ninman, patronneyqa manaraj chayamonqachu, nispa; qallarinmantaj kamachista jasut'iyta; jinallatataj warmi kamachistapis; manchaytataj mikhunman, ujyanmantaj machanankama chayqa.

⁴⁶ Jinallapi patronnin kutimonqa, mana suyasqan diapi, nitaj yachasqan horapi. Chay kamachitaqa manchayta jasut'ispa puraj uyastawan khuska churaykonqa.

⁴⁷ Jaqay kamacheqa patronnimpa munayninta yachashaspa mana wakichikorqachu, nitaj munayninta ruwarqachu; chayrayku manchay jasut'isqa kanqa.

⁴⁸ Pichus mana yachaspalla juchachakunman chayqa, pisi jasut'isqa kanqa. Chantá ashkhata jap'ikojmantapis, ashkhallatataj mañasqa kanqa; pimanchus ashkha qosqa karqa, chaymantapis ashkhallatataj mañasqa kanqa.

Jesusrayku t'aqanaku

⁴⁹ Noqa jamorqani kay mundopi ninata jap'ichej. Chaynejta maytapuni munani larwananta.

⁵⁰ Uj bautismowan bautizasqa kanay tiyan; manchaytataj llakikushani junt'akunankama.

⁵¹ Yuyankichejchu kay mundoman sonqo tiyasqa kayta apamusqayta? Mana. Astawanqa t'aqanachej jamuni.

⁵² Kunanmanta ñaupajmanqa, phishqa ukhumanta uj wasipi t'aqanakonqanku, kinsa iskaypa contran, iskaytaj kinsaj contran.

⁵³ Tataqa wawampa contran kanqa, wawantaj tatampa contran. Mamaqa ususimpa contran kanqa, ususintaj mamampa contran. Suegraqa qhachunimpa contran, qhachunintaj suegrampa contran kanqa.

Tiemposmanta señales

⁵⁴ Nillarqataj runa tantasqaman: Qankunaqa phuyuta inti yaykuypi oqharikojta rikuspa, paranqa ninkichej; chantá ajinataj.

⁵⁵ Uranejmanta wayramojtintaj ninkichej: Ruphamonqa, nispa; ruphamuntaj.

⁵⁶ Puraj uyas! Sumajta rejsinkichej cieloj rijch'ayninta kay mundojtapis, icharí? Chantá imaraykutaj mana rejsinkichejchu kunan tiempoj señalnintari?

Mana phiñanakunamanta

⁵⁷ Imaraykutaj mana qankuna kikiykichej juzgankichejchu, imachus cheqan kajtari?

⁵⁸ Piwanchus phiñanakuspa quejapi kaspaqa, juezpaman rej jina ñanllapiraj paywan allinyakapuy, ama juezman pusaykusunampaj; paytaj carcelerowan jap'ichisunkiman; carcelerotaj wisq'asunkiman.

⁵⁹ Chayrayku nishayki, chaymantaqa mana llojsimuyta atinkichu, tukuy phataykita paganaykikama.