San Juan 6 - Qheshwa Biblia DC

Jesús phishqa waranqa runasman mikhuchin

¹ Kay imas qhepata, Jesús riporqa Galilea qochaj chimpanman; chay qochallataj Tiberias nisqa karqa.

² Ashkha runataj Jesuspa qhepanta rerqanku; imaraykuchus rikorqanku onqosqasta milagrosninwan thañichejta.

³ Chantá Jesús uj orqoman wicharispa tiyarikorqa, yachachisqasninwan ima.

⁴ Pascuamantaj qayllaña kasharqa; chay qhochukutaj judiospata karqa.

⁵ Jesustaj qhawarerqa. Ashkha runata payman jamushajta rikuspataj, Felipeman nerqa: Maymanta rantisunchej t'antata, kay tukuy runas mikhunankupajri?

⁶ Chayta nerqa Felipej yuyayninta yachanampaj, imaraykuchus Jesús yacharqaña imatachus ruwananta.

⁷ Felipetaj payman kuticherqa: Iskay pachaj denarios qolqewan t'antata rantimusunman chaypis, manachá sapa ujman uj chhikallatapis qoyta atisunmanchu.

^8-9 Yachachisqasninmanta ujnin kaj, Andrés, Simón Pedroj wauqen, nerqa: Uj yoqallito kaypi kashan. Paytaj phishqa cebada t'antata, iskay challwastawan jap'ishan; imataj chay kanman kay chhika runapajri?

¹⁰ Jesustaj nerqa: Tukuy runas tiyarikuchunku, nispa. Ashkha ch'ikitaj chaynejpi karqa; phishqa waranqa jina qharistaj chaypi tiyarakorqanku.

¹¹ Jesustaj chay t'antasta jap'ispa, Diosman graciasta qorqa. Chantá, yachachisqasninman t'antasta jaywarqa. Paykunataj runasman rak'irarqanku, jinallatataj challwastapis munasqankuman jina.

¹² Sajsakojtinku taj, yachachisqasninman Jesús nerqa: Puchoj t'antasta oqharipuychej, ama usunampaj.

¹³ Oqharispataj, chay phishqa cebada t'antasmanta puchojta, chunka iskayniyoj canastasman junt'acherqanku.

¹⁴ Chay runakunataj, Jesuspa milagro ruwasqanta rikuspa, nerqanku: Cheqamanta kay runaqa, mundoman jamunan karqa, chay profeta.

¹⁵ Jesustaj, reyninku kanampaj payta pusanankutapuni yachaspa, watejmanta sapallan orqoman riporqa.

Jesús purin yaku patata

¹⁶ Ch'isiyashajtintaj yachachisqasnin qochaman uraykorqanku.

¹⁷ Uj boteman wicharispa, qocha chimpaman risharqanku, Capernaum cheqaman. Ñapis laqhaña karqa; Jesustaj manaraj paykunata taripasqachu.

¹⁸ Sinch'i wayra jatarimojtintaj, qocha oqharikusharqa.

¹⁹ Uj legua kurajta jina botepi risqankumantaña, Jesusta rikorqanku yaku patanta boteman qayllaykamushajta, mancharikorqankutaj.

²⁰ Jesús paykunaman nerqa: Noqa kani, ama manchariychejchu.

²¹ Chantá paykuna kusiywan boteman wajyarqanku; chayarqankutaj maymanchus risharqanku chayman.

Runas mask'anku Jesusta

²² Q'ayantintaj qochaj chimpampi qhepakojkuna, yacharqanku yachachisqaslla ripusqankuta uj bote kasharqa chaypi; Jesustaj mana paykunawanchu risqanta.

²³ Chaykamaqa, Tiberias llajtamanta waj botes chayamorqanku, maypichus Señor graciasta qorqa t'antamanta, runastaj mikhorqanku chaynejman.

²⁴ Jinata runas yacharqanku Jesús yachachisqasnin ima, manaña chaypichu kasqanta. Chay botesman yaykuspataj Capernaumman riporqanku Jesusta mask'aspa.

Jesusqa kausay t'anta

²⁵ Runakunataj, qocha chimpaman chayaspa Jesusta tarerqanku, taporqankutaj: Maestro, jayk'ajtaj kayman chayamorqanki?, nispa.

²⁶ Jesustaj kutichispa nerqa: Cheqamanta, cheqamanta niykichej: Qankuna noqata mask'ashawankichej, mana milagrosta rikusqaykichejraykuchu, astawanqa t'antata mikhuspa sajsarqankichej, chayraykulla.

²⁷ Llank'aychej ari, wiñaypaj kaj t'antarayku, ama ari tukukoj t'antaraykullaqa. Chaytaqa Runaj Churillan qosonqachej; paytaqa Dios Tata ajllarqa.

²⁸ Chantá Jesusta taporqanku: Imata ruwaspataj junt'aykuman, Diospa munayninman jina ruwanasnintari?

²⁹ Jesustaj paykunaman kuticherqa: Kaymin Diospa ruwaynenqa; kachamusqan Churimpi creenaykichej.

³⁰ Kantá paykuna taporqanku: Ima milagrostataj qan ruwanki, chayta rikuspa creenaykupaj? Imata ruwankiri?

³¹ Ñaupa tatasniykoqa, ch'in pampapi Maná nisqa t'antasta mikhorqanku. Escriturapi nishan: Dios paykunaman janaj pacha t'antata mikhucherqa.

³² Jesustaj paykunaman nerqa: Cheqamanta, cheqamanta niykichej: Janaj pachamanta kaj t'antataqa mana Moiseschu qorqa; Tataymá qosunkichej janaj pachamanta cheqa kaj t'antataqa.

³³ Janaj pachamanta Diospa t'antan uraykamojqa, mundoman kausayta qon.

³⁴ Chantá nerqanku: Chay t'antata qowaykupuni.

³⁵ Jesustaj paykunaman nerqa: Noqa kausay t'anta kani; noqaman jamojqa mana jayk'ajpis yarqhachikonqachu; noqapi creejtaj, ni jayk'aj ch'akichikonqachu.

³⁶ Nerqaykichejña; qankunaqa rikushawaspapis, noqapi mana creerqankichejchu.

³⁷ Diospa tukuy qowasqan noqaman jamonqa; noqaman jamojtarí, mana qharqosajchu.

³⁸ Mana munayniyta ruwanaypajchu janaj pachamanta uraykamorqani, astawanqa kachamuwajniypa munayninta ruwanaypaj jamuni.

³⁹ Kachamuwajniypa munaynintaj kay jina kashan: Tukuy paypa qowasqanta mana ujtapis chinkachinaychu tiyan. Kay mundoj tukukuynin p'unchaypitaj, payta wañusqamanta kausarichimusaj.

⁴⁰ Tataypa munaynenqa kay: Pillapis Churita rikoj paypitaj creejqa, wiñay kausayniyoj kanqa; noqataj qhepa kaj p'unchaypi payta kausarichisaj.

⁴¹ Chaymantataj judíos, Jesuspaj thutuyta qallarerqanku nisqanrayku: Janaj pachamanta uraykamoj t'antaqa noqa kani, nispa.

⁴² Chantá nillarqankutaj: Manachu kay runaqa Josejpa Churin Jesús? Manachu rejsinchej tatantawan mamantawan. Imaraykutaj janaj pachamanta uraykamuni nishan payri?

⁴³ Jesustaj nerqa: Ama contrayta thutuychejchu, nispa.

⁴⁴ Mana pipis noqaman jamunmanchu, manachus kachamuwaj Tatay pusamunman chayqa, noqataj qhepa p'unchaypi payta kausarichisaj.

⁴⁵ Profetaspa escribisqasnimpitaj jinata nishan: Dios tukuyninman yachachenqa. Jinataj, Dios Tatamanta uyarejkuna, paymanta yachakojkunataj noqaman jamunku.

⁴⁶ Mana ninichu, pi runapis Dios Tatata rikusqanta; Diosmanta jamojlla rikun paytaqa.

⁴⁷ Cheqamanta, cheqamanta niykichej: Pillapis noqapi creejqa, wiñay kausayniyoj.

⁴⁸ Noqa kausay t'anta kani.

⁴⁹ Ñaupa tatasniykichejqa, Maná nisqa t'antata ch'in pampapi mikhorqanku, wañorqankutaj.

⁵⁰ Kaymin janaj pachamanta uraykamoj t'antaqa. Pillapis chaymanta mikhojqa mana wañunchu.

⁵¹ Noqa janaj pachamanta uraykamoj t'antaqa kani. Pillapis kay t'antamanta mikhojqa, wiñaypaj kausanqa. Noqa qosaj chay t'antaqa aychay; chayta qoni mundo kausanampaj.

⁵² Judiostaj paykunapura churanakorqanku: Imaynatataj pay aychanta qowasunman mikhunanchejpaj?, nispa.

⁵³ Jesustaj paykunaman nerqa: Cheqamanta, cheqamanta niykichej: Manachus Runaj Churimpa aychanta mikhunkichej, nitaj yawarnintapis ujyankichejchu chayqa, mana qankunapis kausayniyojchu kankichej.

⁵⁴ Pillapis aychayta mikhoj, yawarniytataj ujyajqa, wiñay kausayniyojña; noqataj payta kausarichisaj qhepa p'unchaypi.

⁵⁵ Aychayqa cheqa mikhunamin, jinallataj yawarniypis cheqa ujyana.

⁵⁶ Pillapis aychayta mikhun, yawarniytataj ujyan chayqa, noqawan kausan, noqataj paywan.

⁵⁷ Imaynatachus kausaj Tata kachamuwarqa, paynejtataj kausani; ajinallatataj noqata mikhuwajqa noqanejta kausanqa.

⁵⁸ Kaymá janaj pachamanta uraykamoj t'antaqa. Manataj tatasniykichej mikhusqanku, Maná nisqa t'anta jinachu. Paykunaqa wañorqanku, kay t'antata mikhojrí wiñaypaj kausanqa.

⁵⁹ Kay imasta Jesús nerqa Capernaum sinagogapi yachachispa.

Wiñay kausaymanta

⁶⁰ Jesuspa parlasqanta uyarispataj, ashkha yachachisqas nerqanku: Kay nisqasnenqa ancha sinch'i. Pitaj uyariyta atinmanri?

⁶¹ Jesustaj chay nisqanmanta rimajta uyarispa, paykunata taporqa: Kay nisqaychu iskayrayachisunkichej?

⁶² Ima niwajchejtaj Runaj Churinta maypichus karqa chayman wicharejta rikuspari?

⁶³ Espiritoqa kausachin, aychaqa mana imapaj walejchu. Noqa parlaykichej chay palabrasneyqa espiritumin, kausaytaj.

⁶⁴ Qankuna ukhupi kanraj mana creejkuna. Jesús yacharqa qallariymantapacha pikunachus paypi mana creesqankuta, jinallatataj yacharqa pichus payta jap'ichinan kasqanta.

⁶⁵ Nerqataj: Mana pipis noqaman jamunmanchu, Dios Tatachus mana wajyanman chayqa.

⁶⁶ Chaymantapacha, ashkha yachachisqasnin ñaupa ruwanasninkuman kutirerqanku, manañataj Jesuswanchu purerqanku.

⁶⁷ Chaypacha Jesús chunka iskayniyoj apostolesta taporqa: Qankunapis ripuyta munankichejchu?, nispa.

⁶⁸ Simón Pedrotaj kutichispa nerqa: Pimantaj riykumanri? Qampallata tiyapusunki wiñay kausay palabra.

⁶⁹ Noqayku creeykuña, yachaykutaj Diospa ajllasqan kasqaykita.

⁷⁰ Jesustaj kuticherqa: Manachu chunka iskayniyojta ajllarqaykichej? Chaykunamanta ujnintaj supay kashan.

⁷¹ Chayta Jesús nisharqa Simompa churin Judas Iscariotemanta, imaraykuchus payqa Jesusta jap'ichinan karqa, chunka iskayniyojmanta ujnin kashaspapis.