San Juan 4 - Qheshwa Biblia DC

Jesús, Jacobpa pujyumpi

¹ Señortaj yacharqa fariseokunaj uyarisqankuta, nejta: Jesusqa, Juanmanta nisqaqa astawan yachachisqasniyoj, astawantaj bautizan.

² Manapis Jesuschu bautizasharqa, manachayqa yachachisqasnillan.

³ Chayta yachaspataj, Judeamanta llojsispa Galileaman ujtawan kutiporqa.

⁴ Chantá Samarianejtapunitaj rinan karqa.

⁵ Chayarqataj Samariapi kaj, Sicar nisqa llajtaman; maypichus Jacobqa churin Joseman chayaqenta qorqa, chay qayllaman.

⁶ Chaypitaj karqa Jacobpa yaku pujyun. Jesustaj purisqampi sayk'uspa, chay pujyu qayllapi tiyarikorqa. Chaupi p'unchay jinaña kasharqa.

⁷ Chayman Samaria llajtayoj warmi jamorqa yakuta wisej. Jesustaj chay warmiman nerqa: Yakuta qoriway ujyanaypaj, nispa.

⁸ Chaykamataj yachachisqasnin llajtaman rerqanku mikhunata rantej.

⁹ Samaritana warmitaj Jesusman nerqa: Imajtintaj judío runa kashaspa, noqa samaritana warmimanta yakuta mañawankiri? nispa. Judiosqa mana allintachu kausanku samaritanoswanqa.

¹⁰ Jesustaj kutichispa nerqa: Diospa regalontachus rejsiwaj; pitajchus yakuta qoway nisunki chayqa; qanraj paymanta mañakuwaj, paytaj kausay yakuta qosunkiman.

¹¹ Warmitaj nerqa: Señor, mana imapis yakuta orqhonaykipaj tiyapusunkichu, pujyutaj allin ukhu, maymantataj chay kausay yaku tiyapusunkiri?

¹² Qanqa Jacob tatanchejmantapis aswan kurajchu kanki? Payqa kay pujyuta saqepuwarqayku, kaymanta pay ujyarqa, wawasnin, uywasnin ima.

¹³ Jesustaj kuticherqa: Pillapis kay yakumanta ujyajqa, ch'akichikonqapuni.

¹⁴ Noqaj qosqay yakuta ujyajqa, manaña jayk'ajpis ch'akichikonqa chu. Noqaj qosqay yakoqa paypi mana ch'akej pujyu jina kanqa; chay yakutaj wiñay kausaypaj phullchenqa.

¹⁵ Warmitaj nerqa: Señor, chay yakuta qoway, amaña ch'akichikunaypaj, nitaj kay pujyuman yakuta orqhoj jamunaypaj.

¹⁶ Jesustaj nerqa: Kunanqa riy qosaykita wajyamuy, kutimuytaj.

¹⁷ Warmitaj kuticherqa: Mana qosay kanchu, nispa.

¹⁸ Jesús nillarqataj: Allinta ninki mana qosay kanchu, nispa. Phishqa qosasniyoj karqanki; kunan piwanchus kashanki chayqa, mana qosaykichu; chaytaqa cheqata parlanki.

¹⁹ Warmitaj kayta uyarispa nerqa: Señor, yuyani profeta kasqaykita.

²⁰ Ñaupa tatasniykoqa kay orqopi Diosta yupaycharqanku, qankuna judiosrí ninkichej, Jerusalenllapi yupaychana kasqanta.

²¹ Jesustaj kuticherqa: Warmi, creeway. Horaqa chayamushanña maypachachus mana kay orqopichu, nitaj Jerusalempichu Dios Tatata yupaychankichej.

²² Samaritanosqa mana yachasqaykichejta yupaychankichej; noqaykurí yachasqaykuta; imaraykuchus salvacionqa judiosmanta jamun.

²³ Hora chayamushanña, kunantaj chay horapi kashanchej. Dios Tatata cheqamanta yupaychajkunaqa, espiritupi cheqapitaj yupaychanqanku. Dios Tataqa, ajinata yupaychanankuta munan.

²⁴ Diosqa Espiritumin; payta yupaychajkunaqa espiritupi cheqapitaj yupaychananku tiyan.

²⁵ Warmitaj nerqa: Yachani Cristo nisqa Mesías chayamunanta; paytaj chayamuspa tukuy imata willawasqayku.

²⁶ Jesustaj nerqa: Noqa chay Cristo kani, parlashaykitaj.

²⁷ Chayllaman, yachachisqasnin chayamuspa t'ukorqanku, Jesusta uj warmiwan parlashajta taripaspa. Manataj mayqenninkupis nerqachu: Imatataj tapushanki?, chayrí imamantataj chay warmiwan parlasharqanki?, nispa.

^28-29 Chantá, warmeqa yaku p'uyñunta pachampi saqerparispa, llajtaman rerqa; chaypitaj runasman nerqa: Jamuychej rikunkichej uj runata. Pay tukuy ima ruwasqasniyta sut'inchawan. Manachu pay Cristo kanman?

³⁰ Chaypacha tukuy runas llajtamanta llojsispa rerqanku maypichus Jesús kasharqa chayman.

³¹ Chaykamataj yachachisqas, Jesusman nerqanku: Maestro, imallatapis mikhurikuy ari, nispa.

³² Jesustaj paykunaman nerqa: Waj mikhuna tiyapuwan, qankunataj chayta mana rejsinkichejchu.

³³ Chantá, yachachisqasqa paykunapura ninakorqanku: Pichus mikhunata jaywarqa?, nispa.

³⁴ Jesustaj paykunaman nerqa: Mikhuyneyqa kachamuwajniypa munayninta junt'anay, ruwanantataj tukuchanay.

³⁵ Qankunaqa ninkichej: Tawa killamantaraj cosecha kanqa; noqarí niykichej: Qhawariychej chajrasta, cosechanapaj poqosqaña kashanku.

³⁶ Pichus ruthojqa pagonta jap'ikaponqa, poqoytataj wiñay kausaypaj tantanqa. Tarpojtajrí, ruthojwan kusikonqa.

³⁷ Kay nisqaqa cheqamanta junt'akun: Uj tarpun, wajtaj poqojta oqharin.

³⁸ Noqa kacharqaykichej, mana tarpusqaykichejta ruthojta; wajkuna llank'arqanku, qankunataj chay llank'asqasninkuman yaykorqankichej.

³⁹ Samaria llajtayojkunamanta Jesuspi ashkhas creerqanku, chay warmej willasqanta uyarispa; imaraykuchus pay nerqa: Tukuy ruwasqasniyta sut'inchawan, nispa.

⁴⁰ Ajinamanta, samaritanosqa Jesusman qayllaykuspa mañakorqanku paykunawan qhepakunanta. Jesustaj iskay p'unchayta chaypi qhepakorqa.

⁴¹ Ashkhastaj creerqanku kikin Jesuspa willasqanta uyarispa.

⁴² Warmimantaj nerqanku: Kunanqa creeyku mana qan willawasqaykuraykullachu. Noqayku kikiyku uyariyku yachaykutaj cheqamanta payqa kay mundota Salvaj Cristo kasqanta.

Jesús thañichin kamachejpa churinta

⁴³ Jesustaj chaypi iskay p'unchayta kaytawan, Samariamanta llojsispa, Galileaman riporqa.

⁴⁴ Kikin Jesús nerqa profetaqa kikin llajtampi mana allimpaj qhawasqa kasqanta.

⁴⁵ Galileaman Jesús chayajtintaj, walejllata reciberqanku. Paykunapis Jerusalempi qhochukuman rillasqankutaj; chaypi, Jesuspa tukuy imata ruwasqanta rikorqanku.

⁴⁶ Chaymantataj, Jesús kutimullarqataj Galileapi Canaman; maypichus yakuta vinoman tukucherqa chayman. Chaypi karqa uj runa reypa sutimpi kamachej. Paypa wawantaj onqosqa karqa Capernaumpi.

⁴⁷ Chay kamachejtaj Judeamanta Galileaman Jesús jamusqanta yachaspa, payta watukoj jamorqa, mañakorqataj wasinman rispa wawanta thañichimunanta; imaraykuchus wañunayasharqaña.

⁴⁸ Chaypachataj Jesús payman nerqa: Qankunaqa mana creenkichejchu manachus señalesta milagrostapis rikuwajchej chayqa.

⁴⁹ Reypa kamachejnintaj nerqa: Señor, rillay ari, amaraj waway wañupushajtin.

⁵⁰ Jesustaj nerqa: Kutipuy, wawaykeqa kausakushan. Chay runataj Jesuspa nisqanta creespa, riporqa.

⁵¹ Wasinman chayashajtintaj, kamachisnin taripaj llojsimuspa nerqanku: Wawaykeqa kausakushan, nispa.

⁵² Paytaj kamachisninta taporqa ima horatachus wawan allinyasqanta; paykunataj nerqanku: Qayna chaupi p'unchaynejta q'oñi onqoy saqeporqa, nispa.

⁵³ Wawaj tatantaj yacharqa chay horatapuni Jesús payman nisqanta: Wawaykeqa kausakushan, nispa. Chantá chay runa, wasimpi tukuy tiyakojkunapis, Jesuspi creerqanku.

⁵⁴ Judeamanta Galileaman kutimuspa chay iskay kaj milagrosta Jesús ruwarqa.