San Juan 3 - Qheshwa Biblia DC

Nicodemo watukun Jesusta

¹ Fariseosmanta uj runa karqa, Nicodemo sutiyoj. Paytaj judíos ukhupi atiyniyoj karqa.

² Pay uj ch'isipi Jesusta watukoj jamorqa, nerqataj: Maestro, yachayku Diospa kachamusqan kasqaykita yachachinawaykupaj mana pipis atinmanchu, qan ruwanki chay jina milagrosta ruwaytaqa, Dios mana paywan kajtenqa.

³ Jesustaj kutichispa nerqa: Cheqamanta, cheqamanta niyki, pichus watejmanta mana nacinmanchu chayqa, Diospa reinonta mana rikuyta atinchu.

⁴ Nicodemotaj payman nerqa: Imaynatataj nacinman uj machu runaña kaspari? Ujtawanchu mamampa wijsanman kutiykunman, watejmanta nacinampaj?

⁵ Jesús kutichillarqataj: Cheqamanta, cheqamanta niyki, pillapis mana yakumanta, Espiritumantawan nacinmanchu chayqa, Diospa reinonman mana yaykuyta atinchu.

⁶ Aychamanta nacejqa, aychamin; Espiritumanta nacejpis, espiritumin.

⁷ Ama t'ukuychu nisusqaymanta: Watejmanta nacinayki tiyan, nispa.

⁸ Wayraqa maymantachus munasqanmanta wayramun, sonasqantataj uyarinki, manataj yachankichu maymantachus jamusqanta, nillataj maymanchus risqantapis; chay kikinmin Espiritumanta nacisqa kajqa.

⁹ Nicodemotaj kuticherqa: Imaynatataj chay ruwakunmanri?, nispa.

¹⁰ Jesustaj nerqa: Israelpa maestron kanki, manachu kayta yachanki?

¹¹ Cheqamanta, cheqamanta niyki: Yachasqaykuta niyku, rikusqaykutataj willayku; qankunataj willasqaykuta mana jap'ikunkichejchu.

¹² Kay pachapi kaj imasmanta willajtiy mana creenkichejchu chayqa, imaynatataj creewajchej janaj pacha imasmanta willajtiyri?

¹³ Mana pipis janaj pachaman wicharerqachu. Runaj Churillan janaj pachamanta uraykamorqa; [payqa janaj pachapi kashan.]

^14-15 Imaynatachus ch'in pampapi Moisés katarita warkhorqa; ajinallatataj Runaj Churintapis warkhonqanku; tukuy paypi creej, ama wañunampaj; astawanqa, wiñay kausayniyoj kanampaj.

Diosqa tukuyta munakun

¹⁶ Diosqa chay jinatapuni mundota munakusqanrayku, uj k'ata Churinta qorqa. Ajinamanta pillapis paypi creejqa, mana chinkayman renqachu; astawanqa wiñay kausayniyoj kanqa.

¹⁷ Diosqa, mana mundota juchachanampajchu churinta kachamorqa, manachayqa paynejta mundo salvasqa kanampaj.

¹⁸ Pillapis paypi creejqa mana juchachasqachu; mana creejrí ñapis juchachasqaña, Diospa k'ata Churimpa sutimpi mana creesqanrayku.

¹⁹ Kaytaj chay juchachayqa, kay pachaman k'anchay jamorqa, runakunataj laqhata k'anchaymanta nisqaqa astawan munakorqanku, sajra ruwanaspi kausasqankurayku.

²⁰ Tukuy sajrata ruwajqa k'anchayta chejnin; manataj k'anchayman jamunchu, sajra ruwasqasnin ama sut'inchasqas kanankupaj.

²¹ Cheqan ruwanasta ruwajtaj k'anchayman jamun, ruwasqasnimpi Dios paywan kasqanta yachakunampaj.

Juan Bautista, Jesusmanta willallantaj

²² Chantá Jesús yachachisqasninwan Judea jallp'aman rerqa. Chaypi paykunawan qhepakorqa, bautizarqataj.

²³ Juampis bautizashallarqataj Enompi, Salim qayllapi, imaraykuchus chaynejpi ashkha yaku karqa. Runakunataj payman qayllasharqanku bautizachikunankupaj.

²⁴ Juanqa manaraj carcelpi wisq'asqachu karqa.

²⁵ Chaypachataj churanakorqanku Juampa yachachisqasnin, judioswan, llimphuchakuymanta.

²⁶ Juampaman rispataj nerqanku: Maestro, Jordán chimpapi qanwan kasharqa, pimantachus willarqanki, chay runa bautizashan, tukuy runastaj payman qayllashanku.

²⁷ Juantaj kutichispa nerqa: Mana runaqa imatapis jap'iyta atinchu, manachus Diosmanta qosqa kanman chayqa.

²⁸ Qankunaqa allinta yachankichej nisqayta. Mana noqachu Cristo kani; ñaupajninta kachamusqallan kani.

²⁹ Pichus warmiyoj kajqa qosa; paypa qayllampi kaj kausaqentaj, qosaj parlasqanta uyarispa maytapuni kusikun. Ajinamanta kay kusikuyniy kunan junt'akun.

³⁰ Payqa wiñanan tiyan; noqataj juch'uyyanay tiyan.

Janaj pachamanta jamoj

³¹ Janaj pachamanta jamojqa, tukuypa patampi; jallp'amanta kajtaj jallp'amanta, jallp'a imasmantataj parlan. Janaj pachamanta jamojtaj tukuypa patampi kashan.

³² Chayrayku, uyarisqanta, rikusqantataj willan, runakunataj chay willasqanta mana creenkuchu.

^33-34 Pillapis yachachisqanta jap'ikojqa, willallantaj Diosqa cheqapuni kasqanta, imaraykuchus Diospa kachamusqanqa, Diospa palabranmanta parlan, Diosqa Espiritunta mana tupusqata qosqanrayku.

³⁵ Dios Tataqa Churinta munakun; chayrayku tukuy imata makinman churarqa.

³⁶ Churipi creejqa wiñay kausayniyoj, Churipi mana creejtajrí, kausaytaqa mana rikonqachu; astawanqa Diospa phiñakuynin paypa patampi kashan.