San Juan 2 - Qheshwa Biblia DC

Caná llajtapi casaraku

¹ Kinsa p'unchayninmantaj, casamiento karqa Galilea Caná llajtapi; Jesuspa mamantaj chaypi kasharqa.

² Jesús yachachisqasninwan chay casamientoman wajyasqas karqanku.

³ Vino pisiyajtintaj, Jesuspa maman payman nerqa: Vinonku mana kanñachu.

⁴ Jesustaj nerqa: Warmi, ima ruwananchej tiyan noqanchej chaymanta? Manaraj horay chayamunchu.

⁵ Mamantaj kamachisman nerqa: Tukuy ima nisqanta ruwaychej.

⁶ Sojta jatuchaj rumi p'uyñus, chaypi wakichisqas kasharqa, judiospa llimphuchakunankuman jina, sapa p'uyñutaj iskay, chayrí kinsa yuru jich'ay jina karqa.

⁷ Jesustaj kamachisman nerqa: Kay p'uyñusman yakuta junt'arachiychej, nispa. Paykunataj junt'aracherqanku.

⁸ Chantá, Jesús nerqa: Kunanqa wiserqospa kuraj kamachiman rikuchimuychej; paykunataj aparqanku.

^9-10 Kuraj kamachitaj, yakumanta ruwasqa vinota llamirispa, mana yacharqachu maymantachus apamusqankuta. Kamachisqa yacharqanku yakullata wisisqankuta. Kuraj kamachitaj casarakojta wajyarqa. Nerqataj: Mayqen runallapis sumaj vinotaqa ñaupajtapuni jaywan; casarakuman wajyasqas, allin ujyarasqaña kashajtinkutaj, mana walej vinota jaywan. Qanrí, kay qhepakama sumaj vinota waqaychasqanki.

¹¹ Jesús kay milagrosta ruwayta qallarerqa Galilea Caná llajtapi. Ajinamanta atiynimpa lliphipiyninta rikucherqa; yachachisqasnintaj paypi creerqanku.

¹² Chaymantá Jesús uraykorqa Capernaumman, maman, wauqesnin, yachachisqasnintin ima. Chaypitaj mana unaytachu karqanku.

Jesús llimphuchan templota

¹³ Judiospa Pascuanman qayllaña kasharqa. Jesustaj Jerusalenman wicharerqa.

¹⁴ Templopitaj tariparqa wakasta, ovejasta, palomasta ima qhatushajkunata; qolqeta trocajkunatataj tiyashajta.

¹⁵ Jesustaj lazomanta chicoteta ruwaspa, tukuyninkuta templomanta qharqorqa; jinallatataj ovejasta, wakastapis. Trocajkunaj qolqesninkuta pampaman qhallarpayarqa; mesasninkutataj tijrararqa.

¹⁶ Palomasta qhatojkunamantaj nerqa: Kaykunata orqhoychej kaymanta. Tataypa wasintaqa ama qhatuna wasiman tukuchiychejchu.

¹⁷ Chaypacha yachachisqasnin yuyarikorqanku escribisqa kasqanta: Tatáy, wasiykej sinch'i munakuynin tukuchiwan.

¹⁸ Judiostaj kuticherqanku: Ima señalestataj qhawachiwasqayku, kay imasta ruwaspari?

¹⁹ Jesustaj paykunaman kuticherqa: Kay templota urmachiychej, kinsa p'unchaymantataj sayarichisaj.

²⁰ Chantá, judiostaj nerqanku: Kay temploqa, tawa chunka sojtayoj watapi ruwasqa karqa; qanrí kinsa diallapichu sayarichinki?

²¹ Jesustaj, kikin cuerponta templo kasqanta nerqa.

²² Chay nisqanta yachachisqasnin yuyarikorqanku, Jesús wañusqasmanta kausarimorqaña chaypacha. Escrituratataj creerqanku, jinallataj Jesuspa parlasqantapis.

Jesusqa tukuyta rejsin

²³ Pascua p'unchaykunapi Jerusalempi Jesús kashajtin, ashkhas sutimpi creerqanku, milagrosta ruwasqanta rikuspa.

²⁴ Astawanqa Jesús paykunapi mana confiarqachu, imaraykuchus tukuyninkuta rejserqa.

²⁵ Manataj karqachu runamanta imatapis payman willana; payqa yachallarqa imachus runapi kasqanta.