San Juan 12 - Qheshwa Biblia DC

Uj warmi Jesusta jawin

¹ Pascuapaj sojta p'unchay kashajtin, Jesús rerqa Betaniaman, chaypitaj Lázaro kasharqa. Payta wañusqamanta kausaricherqa.

² Chaypitaj Jesuspaj cenata wakicherqanku; Martaqa mikhuyta jaywarqa, Lazarotaj Jesuswan mesapi kasharqa, wajkunawan ima.

³ Chaymantaj María apamorqa ashkha valorniyoj nardomanta k'acha q'apaj perfumeta, uj khuskan litrota jina; chaywantaj Jesuspa chakisninta jawerqa, chujchasninwantaj ch'akicherqa. Chay k'acha q'apaytaj wasiman junt'aykorqa.

^4-5 Chaypachataj yachachisqasninmanta ujnin kaj, Judas Iscariote, pichus Jesusta jap'ichinan karqa, chay nerqa: Imaraykutaj chay k'acha q'apayniyoj perfume, mana vendekorqachu kinsa pachaj denario qolqepi? Chay qolqetaj wajchasman qosqa kanman karqa.

⁶ Judastaj chayta nisharqa, mana wajchasta khuyaspachu. Payqa suwa karqa, qolqe wayaqata pay jap'ej, chayman churasqamantataj suwaj.

⁷ Chaypacha Jesús nerqa: Saqey. P'ampakunay p'unchaypaj kayta waqaycharqa.

⁸ Wajchasqa qankuna ukhupi kallanqapuni. Noqarí manaña qankunawanchu kasaj.

Lazarota wañuchiyta munanku

⁹ Ashkha judíos yacharqanku Betaniapi Jesús kashasqanta. Paykunataj rerqanku mana Jesusraykullachu, astawanqa Jesús wañusqamanta kausaricherqa chay Lazarota qhawanankupaj.

^10-11 Chantá kuraj sacerdotes, Lazarotapis wañuchinankupaj yachachinakorqanku, imaraykuchus paynejta t'aqanakuspa ashkha judíos Jesuspi creerqanku.

Jesús Jerusalenman yaykun

¹² Q'ayantintaj ashkha runa Pascuaman jamorqanku, yachaspa Jerusalenman Jesús chayamunanta.

¹³ Palma ramasta jap'ispa, Jesusta taripaj llojserqanku, qhaparerqankutaj: Kausachun! Yupaychasqa kachun Israelpa Reynin, Señorpa sutimpi jamojqa!

¹⁴ Jesús uj malta burrota tarispa, chaypi tiyaykorqa, escribisqa kasqanman jina:

¹⁵ Ama manchachikuychu Siompa ususin; qhawariy Reyniyki jamushan burroj uñampi lloq'asqa.

¹⁶ Qallariypeqa yachachisqasnin mana chay imasta unanchayta aterqankuchu; maypachachus Jesús jatun kayninman oqharisqa karqa, chaypacharaj yuyarikorqanku, paymanta chay imas escribisqa kasqanta; paypitaj junt'akusqanta.

¹⁷ Jesuswan kasharqanku chay runas willasharqanku, imaynatachus pay, Lazarota sepulturamanta wajyaspa, wañusqamanta kausarichisqanta.

¹⁸ Chayrayku runas llojserqanku Jesusta taripaj, imaraykuchus uyarerqanku chay milagrota pay ruwasqanta.

¹⁹ Fariseostaj ninakorqanku: Qhawariychej, manaña imatapis ruwayta atinchejchu, tukuy runa paywan ripushan, nispa.

Griegos Jesusta mask'anku

²⁰ Pascuapi Diosta yupaychaj Jerusalenman rejkunamanta wakin griegos karqanku.

²¹ Chaykunataj qayllaykuspa, Galileamanta Betsaida llajtayoj Felipeman nerqanku: Wiraqochi, Jesusta rikuyta munayku, nispa.

²² Felipetaj rispa Andresman willamorqa; Andrestaj Felipewan Jesusman willamorqanku.

²³ Jesustaj paykunaman kutichispa nerqa: Hora chayamunña Runaj Churin jatunchasqa kanampaj.

²⁴ Cheqamanta, cheqamanta niykichej: Uj trigo mujuchus jallp'aman urmaspa mana wañunman chayqa, sapallan kanman; wañun chayrí, ashkha poqoyta apan.

²⁵ Kausayninta munakojqa, chinkachenqa; kay pachapi kausayninta qhesachajtaj, wiñay kausaypaj waqaychanqa.

²⁶ Pillapis munayniyta ruwajqa qhepayta jamuchun; maypichus noqa kasaj, chayllapitaj paypis kanqa. Tataytaj chay munayniyta ruwajta jatumpi jap'enqa.

Jesús willan wañunanmanta

²⁷ Kunanqa almay ancha phutisqa kashan; ima nisajtajri? Tatáy kunan imachus kananmanta salvaway! Astawanqa, kaypajpuni jamorqani.

²⁸ Tatáy sutiykita jatunchay. Chaypacha janaj pachamanta uj voz yarikorqa: Jatunchaniña, kunantaj ujtawan jatunchasaj, nispa.

²⁹ Ashkha chaypi kajkunataj parlamojta uyarerqanku, nerqankutaj qhon qhon kasqanta; wakinkunataj nerqanku ángel parlamusqanta.

³⁰ Jesustaj paykunaman nerqa: Chay vozqa mana noqaraykuchu karqa, astawanqa qankunarayku.

³¹ Kunan mundopaj juicio chayamun. Kunanmá mundota kamachejqa jawaman qharqosqa kanqa.

³² Noqachus jallp'amanta oqharisqa kasaj chayqa, chaypacha tukuy runata noqaman pusamusaj.

³³ Kayta Jesús nerqa runasman rejsichiyta munaspa, ima wañuywanchus pay wañunanta.

³⁴ Runastaj payman kuticherqanku: Noqayku leypi yacharqayku, Cristoqa wiñaypaj kausananta; imaraykutaj qan Runaj Churin oqharisqa kanqa nishanki? Pitaj chay Runaj Churinri?

³⁵ Chantá paykunaman kuticherqa: Pisi p'unchaytawanraj k'anchayqa qankunawan kashan. K'anchaypi puriychej, laqha ama taripasunaykichejpaj; laqhapi purejqa, mana yachanchu maymanchus rishasqanta.

³⁶ Qankunawan k'anchay kashajtin, k'anchaypi creeychej, k'anchaypa wawasnin kanaykichejpaj. Kay imasta niytawan Jesusqa ripuspa paykunamanta pakaykukorqa.

Judíos mana creenkuchu

^37-38 Chay chhika milagrosta Jesús ñaupaqenkupi ruwashajtimpis, judíos manapuni paypi creerqankuchu, profeta Isaiaspa nisqanqa junt'akunampaj. Pay nerqa: Señor, pitaj willasqanchejta creen? Mayqentaj Señorpa makimpa atiyninta rejsiyta atinri?

³⁹ Chayrayku mana creeyta aterqankuchu. Isaiasqa nillarqataj ari:

⁴⁰ Ñawisninkuta ciegoyacherqa, sonqonkutataj rumiyacherqa; ñawisninkuwan ama rikunankupaj, nitaj sonqonkuwan unanchaspa, noqaman kutirimunankupaj, noqataj paykunata thañichinaypaj.

⁴¹ Isaiasqa kayta nerqa Jesuspa jatun kayninta rikuspa, paymantataj parlarqa.

⁴² Chay tukuywampis, llajtapi ashkha kamachejkuna Jesuspi creerqanku. Fariseosta manchachikuspa lla mana sut'ita paymanta parlajchu kanku; sinagogamanta ama wijch'usqas kanankupaj.

⁴³ Runasllaman allin rijch'ayta munarqanku; manataj Diosmanqa.

Jesuspa parlasqan runasta juzganqa

⁴⁴ Jesús qhaparispa nerqa: Noqapi creejqa mana noqallapichu creen, astawanqa kachamuwajniypi.

⁴⁵ Noqata rikuwajqa kachamuwajniytapis rikullantaj.

⁴⁶ Noqa k'anchay kani. Kay mundoman jamorqani, tukuy noqapi creejkuna ama laqhallapipuni kanankupaj.

⁴⁷ Palabrasniyta uyarispa, mana waqaychajtaqa, mana noqachu juchachasaj; mana mundota juchachajchu jamorqani, astawanqa salvaj jamorqani.

⁴⁸ Pichus noqata qhesachawan, parlasqasniytataj mana jap'ikunchu chayqa, tiyan payta juchachaj; parlarqani chay palabraytaj tukukuy p'unchaypi payta juchachanqa.

⁴⁹ Mana noqallamantachu parlani; kachamuwajniy Dios Tataj kamachiwasqanta parlani, yachachinitaj.

⁵⁰ Yachanitaj paypa kamachiynenqa, wiñay kausay kasqanta. Chayrayku, imatachus parlaspaqa, Tataypa niwasqanman jina parlani.