Josué 9 - Qheshwa Biblia DC

Gabaonitaswan tratota ruwanku

¹ Chay tukuy imas kasqanta yacharqanku kay reyes heteosmanta, amorreosmanta, cananeosmanta, ferezeosmanta, heveosmanta, jebuseosmanta ima. Kay reyesqa tiyakusqanku Jordán mayu cantospi inti yaykunannejpi, chanta chay orqospi, pampasnimpi, Mediterráneo mar qochej cantosnimpi, Líbano jallp'aspi ima.

² Chay tukuynin reyes uj yuyayllaman yaykorqanku, Josuewan, israelitaswan ima maqanakunankupaj.

³ Chaywampis heveos Gabaompi tiyakojkuna yacharqanku Josué imatachus ruwasqanta Jericota, Hai llajtatawan.

^4-5 Paykunataj nerqanku ch'aukiyaspa rinankuta. Chaymanta purirerqanku, burrosninkuman thanta costalesta, thanta vino qara botasta chajnariykukuspa, llik'isqasta, t'irisqastataj; chanta churakorqanku thanta ujut'asta, llik'isqa t'irisqa p'achasta ima. Qoqawitataj churakorqanku ñanta rinankupaj chojru mojoseasqa t'antata.

⁶ Gilgalman chayamuspataj jarampi kashajtin Josueman israelitasmanwan nerqanku: Karu llajtamanta jamuyku, munaykutaj qankunawan uj tratota ruwayta, nispa.

⁷ Israelitastaj heveosman kuticherqanku: Ichapis qankunaqa kay noqayku qayllallamanta kankichej. Imaynatataj qankunawan uj tratota ruwasunmanri?

⁸ Paykunataj Josueman nerqanku: Noqaykoqa qampa kamachisniyki kasqayku. Paytaj taporqa: Pistaj qankuna kankichejri? Maymantataj jamunkichejri?, nispa.

⁹ Paykunataj kuticherqanku: Noqaykoqa karumanta jamuyku, Señor Diosniyki may mentasqa kasqanta uyarispa, yachaykutaj Egiptopi tukuy imata ruwasqanta.

¹⁰ Imaynatatajchus Jordán mayu chimpapi amorreospa iskay reyesninta ruwasqanta, Hesbón rey Sehonta, Basán rey Ogtawan, pischus Astarotpi tiyarqanku.

¹¹ Chayrayku kamachiwajniyku, llajta masisniyku ima niwarqayku: oqharikuychej ñampaj imastachus apakunaykichejta, maypichus paykuna kashanku chaymantaj riychej. Chaypitaj nimuychej, noqayku qankunaj kamachisniykichej kasqayku, qankunawantaj munayku uj tratota ruwayta, nispa.

¹² Maypachachus qankunata mask'aj llojsimorqayku chaypacha, kay t'antapis q'oñillaraj karqa, kunantaj qorwariyasqaña, chojrutaj.

¹³ Kay qara botaspis mosojpacha karqa vinota junt'achishajtiyku, kunantaj kay jina llik'isqasña. Kikillantaj p'achasniyku, ujut'asniykupis kay jina thantasña, karu ñanta unaypi chayamusqaykurayku.

¹⁴ Israelitastaj chay runaspa mikhunasninkuta llamirerqanku, Señorta mana tapurispalla.

¹⁵ Chaymanta Josueqa uj allin yanakuy tratota paykunawan ruwarqa, jinamanta ama wañuchinankupaj, chanta israelita kurajkunapis kikillantataj juraspa nerqanku ama wañuchinankuta.

¹⁶ Kinsa p'unchaymantataj israelitasqa yacharqanku gabonitasqa paykunaj qayllallankumanta kasqankuta, chay qayllallapi tiyakusqankuta.

¹⁷ Chanta israelitasqa gabaonitasta mask'aj llojserqankupacha, kinsa p'unchayninmantaj chaykunaj llajtasninkuman chayarqanku. Chay llajtasqa karqanku Gabaón, Cafira, Beerot, Quiriat-jearim ima.

¹⁸ Israelitasqa mana wañucherqankuñachu, kurajkunasninku Israelpa Diosnin Señorpa sutinrayku jurasqankurayku. Chayrayku israelitasqa kamachejkunasninkoj contranta mayta rimarqanku.

¹⁹ Kurajkunasninkutaj nerqanku: Noqayku jurarqayku Israelpa Diosnin Señorpa sutinrayku, paykunata ama wañuchinanchejpaj. Chayrayku kunanqa mana imanaytapis atisunmanchu paykunataqa.

²⁰ Chayrayku kunanqa mana wañuchisunchu, juramentota ruwasqanchejtachus p'akisunman chayqa, Diosninchej phiñakuwasunman.

²¹ Ajinata israelitaspa kurajkunasninkoqa kamacherqanku: Saqeychej kausajta, paykunaqa kanqanku llant'eros, yakeros ima tukuy israelitaspaj apamunankupaj, nispa. Ajinata kamachejkunaqa junt'arqanku imatachus jurasqankuta.

²² Josuetaj gabaonitasta wajyaspa nerqa: Imaraykutaj karumanta jamuyku nispa ch'aukiyawaykuri, chaypaj qankunaqa kayllamanta kasqankichejpis?

²³ Chayrayku kunan qankunaqa pisipi qhawasqas kankichej, wiñaypaj kamachisllapuni kankichej. Llant'ata ch'ejtankichej, yakuta ima aysamunkichej Diosniypa wasimpaj.

²⁴ Paykunataj Josueman kuticherqanku: Noqayku kayta ruwarqayku qankuna wañuchinawaykuta manchachikuspa, imaraykuchus yachayku Señor Diosniykichej kamachin Moisesman kamachisqanta, kaykunapi tiyakojkunata wañurachispa, qankunaman kay jallp'asta qonasuykichejta.

²⁵ Chaywampis kunanqa makisniykipi kayku; qan noqaykuwan ruwan imachá allin, cheqantaj rijch'asunki chayta.

²⁶ Jinamanta Josueqa mana saqerqachu israelitas gabaonitasta wañuchinankuta.

²⁷ Chay pachamantapacha kunankama Josueqa paykunata churarqa llant'ata apamunankupaj, yakuta aysamunankupaj, israelitaspaj, Señorpa altarnimpaj ima, may cheqatachá Señor ajllakonqa chayman.