Filemón 1 - Qheshwa Biblia DC

Pabloj napaykuynin

¹ Noqa Pablo, Cristo Jesusrayku carcelpi presochasqa kani. Kay cartata escribimuni hermano Timoteowan, qanman munasqa Filemón, llank'aj masi.

² Ajinallatataj, munasqa hermananchej Apiaman, tinkupi yanapawajninchej Arquipoman, wasiykipi tantakoj iglesiamanwan.

³ Qankunawan kachun khuyakuy, sonqo tiyakuy Dios Tatanchejmanta, Señor Jesucristomantawan.

Filemompa munakuynin fenin ima

⁴ Qanmanta yuyarikuspa graciasta qonipuni, Diosniymanta mañakuspa.

⁵ Uyarerqanipuni qanmanta, munakuyniyki, feniyki ima Señor Jesuspi kasqanta; jinallatataj Diospi creejkunatapis munakusqaykita.

⁶ Diosmanta mañakuni creesqaykirayku creejkunaqa allinta unanchanankuta, tukuy ima qankunapi allinkuna kasqanta Cristonejta.

⁷ Chayrayku ancha kusisqa, sonqo junt'asqataj kani munakuyniykirayku. Qannejta, hermano, ajllasqaspa sonqosninku kallpachasqas karqanku.

Pablo mañapun khuyakuyta Onesimopaj

⁸ Chayrayku, atiymampis Cristopi kamachisuyta, imachus allin kajta ruwanaykita.

⁹ Astawanqa mañakuyki munakuyrayku, noqa Pablo machuña kaspa, presochasqataj kani Jesucristorayku.

¹⁰ Mañakuyki espirituman jina waway Onesimota khuyakunaykita, pitachus kay carcelpi kashaspa creejman tukucherqani. Payqa waway jina.

¹¹ Ujpacha Onesimoqa qampaj mana walejchu karqa; kunanqa qampaj, noqapajpis allin runa.

¹² Kunan kachampuyki. Watejmanta jap'ikapuy noqapis kayman jina.

¹³ Munayman karqa pay noqawan qhepakunanta, yanapanawampaj qampaj cuentaykimanta, evangeliorayku preso kashajtiy.

¹⁴ Mana imata ruwayta munarqanichu, manaraj qanwan parlashaspa, kay khuyakuyniykeqa ama kamachisqa jinachu kanampaj, astawanqa qampa munasqaykiman jina kachun.

^15-16 Ichapis Onesimoqa kaypaj t'aqakusorqa pisi tiempopaj. Kunanqa wiñaypaj jap'ikapuy, amaña wata runata jinachu, astawanqa uj wata runamantapis astawan munakuywan, uj munasqa hermanota jina. Noqa anchata munakuni. Qampis astawan munakuy, mana mayqen runata jinallachu, astawanqa Señorpi.

¹⁷ Chayrayku llank'aj masiykichus kani chayqa, payta jap'ikapuy, noqapis kayman jina.

¹⁸ Ima sajrata ruwasunkiman karqa chaypis, chayri manuyki kanman karqa chaypis, noqa junt'apusqayki.

¹⁹ Noqa Pablo, makiywan kay cartata escribimuyki. Noqa chay manuta qopusqayki. Astawanqa munani yuyarichisuyta qampis noqaman manu kasqaykita.

²⁰ Arí, hermano, kusirichiy sonqoyta Señorpi, kallpachaytaj sonqoyta Cristopi.

²¹ Kayta escribimuyki kasukoj kasqaykirayku, yachaspa kay nisusqaymantapis astawanraj ruwanaykita.

²² Wakichipuway wasita chayakunaypaj; imaraykuchus suyashani jamuyta Diosmanta mañapuwasqaykichejman jina.

Napaykunas

^23-24 Napaykamusunku Epafras, presochasqa masiy Cristo Jesusrayku; evangeliopi yanapawajkuna Marcos, Aristarco, Demas, Lucas ima.

²⁵ Señor Jesucristoj khuyakuynin qankunawan kachun.