Apocalipsis 16 - Qheshwa Biblia DC

Vasos k'ajaj phiñakuywan junt'asqas

¹ Templomanta sinch'ita parlamojta uyarerqani, qanchis angelesmantaj nerqa: Riychej, jich'amuychej jallp'aman Diospa k'aja phiñaynimpa chay qanchis vasosmanta.

² Ñaupaj kaj angeltaj rispa copasmanta jallp'aman jich'aykorqa. Uj asnaj, nanachej ch'upu onqoytaj runasman jamorqa, pikunachus phiña animalpa marcanwan karqanku, lantintapis yupaycharqanku chaykunaman.

³ Iskay kaj angeltaj ma qochaman copamanta jich'aykorqa, qochataj uj wañusqaj yawarninman jina tukorqa. Mar qochapi kausajkunataj tukuynin wañorqanku.

⁴ Kinsa kaj angeltaj mayusman, yaku pujyusman ima copanmanta jich'aykorqa. Chaykunataj yawarman tukorqanku.

⁵ Yakuspa angelnintataj uyarerqani nejta: Cheqanmin kanki, Señor. Qan kanki, karqankitaj santo; imaraykuchus kay imasta ajinata juzgarqanki.

⁶ Paykunaqa ajllasqaspa yawarninta, porfetaspatapis jich'arqanku. Chayrayku qampis yawarllatataj paykunaman ujyachinki. Paykunaqa chay jasut'ipaj jina kanku.

⁷ Altarmantataj wajta uyarerqani, nejta: Arí, Señor Dios, Tukuy Atiyniyoj, juiciosniykeqa cheqa, cheqantaj kanku.

⁸ Tawa kaj angeltaj intiman vasonmanta jich'aykorqa, chaywanqa inti aswan atiyniyoj karqa, runata ninawan ruphachinampaj.

⁹ Runastaj sinch'i k'ajaywan ruphachikorqanku, Diospa sutimpa contrantataj rimarqanku. Qhesacharqanku pitachus aterqa qhechuyta chay jasut'iykunata; manataj Diosman kutirikorqankuchu payta jatunchanankupaj.

¹⁰ Phishqa kaj angeltaj phiña animalpa tiyananman copanmanta jich'aykorqa, reinontaj laqhayaykorqa, nanaywantaj runakunaqa qallusninkuta khanirakorqanku.

¹¹ Janaj pacha Diospaj sajrata rimarqanku nanayninkurayku, ch'upusninkuraykutaj; manataj sajra ruwasqasninkumanta Diosman kutirikorqankuchu.

¹² Sojta kaj angeltaj Eufrates jatun mayuman copanmanta jich'aykorqa, yakuntaj ch'akiporqa, inti llojsimuynejmanta reyespaj ñan wakichisqa kanampaj.

¹³ Rikorqanitaj sierpej siminmanta, phiña animalpa siminmanta, llulla sut'inchajpa siminmantapis, kinsa millay supaykunata llojsejta jamp'atusta jina.

¹⁴ Supaykunaj espiritusnin kanku, pikunachus t'ukunapaj rikuchinasta ruwanku, tukuy kay pachapi reyespaman rinku, paykunata tantamunankupaj maqanakuman, jaqay jatun Tukuy Atiyniyoj Diospa p'unchaynimpaj.

¹⁵ Kayqa, noqa suwa jina jamushani. Kusikuyniyojmin mana puñuspa qhawajqa, p'achantapis jallch'ajqa, ama q'alalla purinampaj, nitaj p'enqayninta rikunankupaj.

¹⁶ Paykunataj tantaykorqanku, hebreo parlaypi Armagedón, nisqa cheqapi.

¹⁷ Qanchis kaj angeltaj wayraman copanmanta jich'aykorqa. Janaj pachapi templomanta, trononmantawan uj sinch'i qhapariy uyarikorqa: Ñapis ruwasqaña, nispa.

¹⁸ Chaypacha, lliuj lliujkuna, qhapariykuna, qhon qhonkuna karqanku. Jallp'aj manchay ikhakuynin karqa; chay jinataqa mana jayk'ajpis jallp'a kuyuykacharqachu, runas kay pachapi kasqankumantapacha.

¹⁹ Jatun llajtataj kinsaman ch'ejtakorqa, gentilespa llajtasninkutaj urmarqanku. Diostaj chay jatun Babiloniamanta yuyarikorqa, k'ajaj phiñakuynimpa vino copanmanta pay ujyanampaj.

²⁰ Tukuy churu jallp'a ayqerqa, orqostaj chinkarerqanku.

²¹ Janaj pachamanta runasman manchay jatuchaj granizos urmamorqanku, uj quintal jina llasas. Runastaj granizoj ñak'arichisqanwan Diospaj sajrata rimarqanku, imaraykuchus chay llakeyqa maypuni karqa.