Apocalipsis 10 - Qheshwa Biblia DC

Ángel juch'uy librowan

¹ Waj kallpasapa angeltataj janaj pachamanta uraykamojta rikorqani phuyuwan muyurisqata, k'uychitaj uman patapi karqa, uyantaj inti jina, chakisnintaj nina pilarkuna jina.

² Makimpitaj juch'uy librota jap'isharqa, paña chakintataj mar qocha pataman churarqa, lloq'e chakintataj jallp'a pataman.

³ Sinch'itataj qhaparerqa, leompis waqashanman jina. Qhaparejtintaj qanchis qhon qhonkuna sonasqankuta uyaricherqanku.

⁴ Chay qanchis qhon qhonkuna sonasqankuta uyarichejtinkutaj, ñapis escribejña rishajtiy, janaj pachamanta uyarerqani nimuwajta: Imatachus chay qanchis qhon qhonkuna nimunku, chayta sellay; amataj chaykunataqa escribiychu, nispa.

⁵ Mar qocha patapi, jallp'a patapiwan sayashajta rikusqay chay angeltaj, paña makinta janaj pachaman oqharerqa.

⁶ Jurarqataj wiñay wiñaypaj kausajrayku, pichus janaj pachata ruwarqa, chaypi imaschus kajkunatawan, jallp'atapis, chaypi imaschus kajkunatawan, mar qochatapis, chaypi imaschus kajkunatawan; willarqataj tiempo manaña kananta.

⁷ Manachayqa, qanchis kaj ángel parlamojtin, chay p'unchaykunapi trompetata waqachiyta qallarejtin imataj, Diospa pakasqa munaynin junt'akonqa, imaynatachus pay willarqa kamachisnin profetasman, chayman jina.

⁸ Janaj pachamanta parlamojqa uj kutitawan nillawarqataj: Mar qocha patapi, jallp'a patapi ima uj ángel kashan. Riy jap'imuytaj chay angelpa makinmanta uj kicharisqa librituta.

⁹ Chay angelmantaj rerqani chay librituta qonawampaj. Paytaj niwarqa: Jap'iy, oqoykuytaj; wijsaykitataj jayachisonqa, simiykipitaj misk'i kanqa, lachiwana misk'i jina.

¹⁰ Jap'erqanitaj angelpa makinmanta chay librituta, mikhuykorqanitaj, simiypitaj misk'i misk'i karqa lachiwana misk'i jina; mikhuykojtiytaj wijsayta jayayacherqa.

¹¹ Angelqa nillawarqataj: Ujtawan ashkha llajtasman, runasman, tukuy laya parlayniyojkunaman, reyesman ima sut'inchanaykipuni tiyan, nispa.