SOFONÍAS 2 - Diospa Simin Qelqa

¹ Mana p'enqakuq runakuna, huñunakuychis, k'umuykukuychis,

² Señor Diospa unanchasqan p'unchay manaraq chayamushasuqtiykichis, ñut'u paja hina manaraq wayrachisqa kashaqtiykichis, Señor Diospa k'arakllaña phiñakuynin manaraq chayamushasuqtiykichis, Señor Diospa k'arak phiñakuynin p'unchay manaraq chayamushasuqtiykichis.

³ Kay pachapi llapa k'umuykukuqkuna, Diospa kamachikusqankunata kasukuqkuna, Señor Diosman kutirikuychis. Chaninkaqta ruwaychis, huch'uyyaykukuychis, ichapas Señor Diospa k'arak phiñakusqan p'unchaypi pakaykusqa kawaqchis.

Hatun suyukunaq muchunanku

⁴ Gaza llaqtaqa mana runayoqmi kapunqa, Askalón llaqtapas raqay-raqayman tukuchisqan kapunqa, Asdod llaqtapi tiyaqkunapas chawpi p'unchaymi qarqosqa kapunqa, Ekrón llaqtapi tiyaqkunapas llapallanmi wikch'usqa kapunqa.

⁵ Yaw mama qocha patapi tiyaq Filistea runakuna, ¡imaynaraqmi kankichis! Yaw Canaán suyu, qanpin Filistea runakuna tiyan, Señor Diosmi qan contra riman: Ñoqan ch'usaqyachisqayki, manan pipas qanpi tiyanqañachu, nispa.

⁶ Chaymi mama qocha pata Filistea suyuqa q'achu pampaman tukupunqa, michiqkunaq michinanman, uywa kanchakunamanwan tukupunqa.

⁷ Chaykunaqa Judá suyu puchuq runakunapaqmi kapunqa, chaypin uywa t'aqakunata michinqaku, Askalón llaqta wasikunapin ch'isinta siriykunqaku, Apu Señor Diosninkun paykunata waqaychaykunqa, hinaspan paykunata wakmanta t'ikarichinqa.

^8-9 Israelpa Tukuy-atiyniyoq Señor Diosninmi nin: Moab suyu runakunaq k'amipakusqantan uyarirqani, Amón suyu runakunaq k'amipakusqantapas uyarirqanin. Paykunan llaqtay runakunata k'amirqanku, suyunku hallp'awanpas hatunyaykurqanku. Chaymi sutiypi jurani, Moabqa Sodoma llaqta hinan kapunqa, Amón runakunapas Gomorra llaqta hinan kapunqa, kisa-kisaman tukuchisqa, kachi-kachiman tukuchisqa, wiñaypaq purunyachisqan kapunqa. Llaqtaymanta puchuq runakunan paykunata llat'ananqa, llaqtaymanta puchuq runakunan suyukunata hap'ikapunqa, nispa.

¹⁰ Paykunaqa anchaykacharqankun, Tukuy-atiyniyoq Señor Diospa llaqtan runakunatan k'amispa asipayarqanku, chaymi chay hinata Diosqa paykunata muchuchinqa. Kay pacha llapa dioskunata thunispan,

¹¹ Señor Diosqa chay runakunata sinchita mancharichinqa. Tukuy hatun suyukunataq payta yupaychanqaku, sapankankupas suyunkupikama.

¹² Qankunapas Etiopía suyupi tiyaqkuna, Señor Diospa espadanwanmi wañuchisqa kankichis.

¹³ Señor Diosqa wichay lado suyuta maqaspan Asiria suyuta thuninqa, Nínive llaqtatan purunyachinqa, ch'inneqta hinan ch'akiman tukuchinqa.

¹⁴ Perqa qatasqa cedro tablakunan mullphayanqa, wasi punkukunapin rumi soqya kanqa, chay raqaykunapin uywa t'aqakuna puñunqa imaymana animalkunapas samakunqa. Hukupas peqpiripas tusa rumikunapin q'esachakunqa, ventanakunamantapas chaykunaq waqasqanmi uyarikunqa.

¹⁵ Chay llaqtaqa mana-llakhi kusisqan karqan, sonqonpin nirqan: ¡Ñoqaqa Diosmi kani! Ñoqamanta wakqa manan kanñachu, nispa. ¡Kunantaq purunyachisqa kapusqa! ¡Phiña animalkunaq tiyananmanmi tukupusqa! Pipas chay qayllanta puriqqa asipayanqan, makinwanmi: ¡Achacháw! ninqa.