RUT 1 - Diospa Simin Qelqa

Rutmantawan Noemimantawan

^1-2 Uma qollanakuna Israel suyupi kamachikushaqtinmi, Judapi kaq Belén llaqtapi tiyarqan Efrata ayllumanta Elimelek, warmin Noemipiwan, Maklón, Kilyón churinkunapiwan. Chay p'unchaykunapin yarqay karqan, chaymi Moab suyupi tiyarimunankupaq rirqanku, Moab suyuman chayaspankutaq chaypi qhepakurqanku.

³ Elimelekmi ichaqa wañupurqan, hinan Noemiqa iskay churinkunallantin qhepapurqan.

⁴ Paykunan Moab suyu warmikunawan casarakurqanku, hukninpa sutinmi karqan Orpa, hukninpa sutintaq Rut. Chunka watata hina chaypi tiyashaqtinkutaq,

⁵ Maklonpas Kilyonpas wañupullarqankutaq, hinan warmiqa qheparqan mana qosayoq mana churiyoq.

^6-7 Moab suyupitaq Noemiqa uyarirqan Señor Diosqa llaqtanta yuyarimuspa mikhuchisqanta, chaymi maypichus kasqanmanta iskaynin qhachuninkunapiwan puririmuspa, Moab suyumanta lloqsipurqan. Judá suyuman kutipushaspataq,

⁸ Noemiqa paykunata nirqan: —Ripuychis, kutikapuychis sapankaykichis mamaykichispa wasinman, Señor Diosmantan mañakuni imaynan wañupuqkunapaqpas ñoqapaqpas ruwasqaykichisman hina khuyapayanasuykichispaq.

⁹ Señor Diosña wakmanta casarachisunkichis, qhepa qosaykichiswan allillan kanaykichispaq, nispa. Hinaspan Noemiqa paykunata much'aykurqan. Paykunataq waqayta kachaykurqanku,

¹⁰ nirqankutaq: —¡Manan! Ñoqaykuqa qanwanmi llaqtaykita ripusaqkupuni, nispa.

¹¹ Noemitaq kutichirqan: —Kutikapuychis, ususiykuna, ¿imaqtaq ñoqawan riwaqchis? Manañan wawakunata wachakuymanñachu qosaykichis kananpaq.

¹² Kutikapuychis, ususiykuna, ripuychis. Ñoqaqa payañan kani casarakunaypaq. Wachakusaqraqmi, nispachus niyman, kunan tutataq qosawan kashayman, wawakunatapas wachakuymanraq chaypas,

¹³ ¿qankunaqa wiñanankukama suyakuwaqchischu? ¿Chayraykuchu manaqa casarakapuwaqchis? Manapunin, ususiykuna, Señor Diosmi muchuchishawan, chayraykun llakikuni ñoqawan kuska muchushasqaykichismanta, nispa.

¹⁴ Hinan paykunaqa wakmanta waqayta kachaykurqanku, chaymantataq Orpaqa suegranta much'aykuspan ripurqan, Rutmi ichaqa suegranwan qhepakurqan.

¹⁵ Chaymi Noemiqa nirqan: —Qhawariy, qhachunmasiykin kutikapun llaqtanman diosninmanwan, qanpas kutikapullaytaq, nispa.

¹⁶ Rut-taq kutichirqan: —Amaña “Saqepuway, t'aqakuway” niwayñachu, maytachus qan rinki, chaytan ñoqaqa risaq, maypichus tiyanki, chaypin ñoqaqa tiyasaq. Llaqtaykin llaqtay kanqa, Diosniykitaq Diosniy.

¹⁷ Maypichus qan wañunki, chaypin ñoqaqa wañusaq, chaypitaqmi p'ampasqapas kasaq. Señor Dios anchata muchuchiwachun, manachus wañuyllaña t'aqanachiwasun chayqa, nispa.

¹⁸ Chaymi Noemiqa paywan ripunanpaq Rutpa yuyaykukusqanta reparaspa, manaña rimapayarqanñachu.

¹⁹ Hinan paykunaqa rispanku Belenman chayarqanku. Paykuna haykuqtinkutaq llaqtallantin kuyurirqan, warmikunataq nirqanku: — ¿Manachu kayqa Noemí? nispa.

²⁰ Noemitaq paykunaman kutichirqan: —Ama Noemí niwaychischu, aswanpas Mara niwaychis, anchatapunin Tukuy-atiyniyoq Diosqa muchuchiwarqan.

²¹ Imaymanantinmi rirqani, Señor Diosmi ichaqa mana imayoqta kutichimpuwan. ¿Imanaqtintaq Noemí niwankichis, Tukuy-atiyniyoq Dios huchachawaspa llakichiwaqtinqa? nispa.

²² Chay hinatan Noemiqa Moab suyumanta kutimpurqan qhachunin Moab suyu warmi Rutwan kuska. Belenmanmi chayarqanku cebada ichhuy qallariyta.