NAHÚM 1 - Diospa Simin Qelqa

¹ Kaytaqa Diosmi Elkos llaqtayoq Nahumman Nínive llaqtamanta rikuchirqan, chaymantan qelqasqa Karqan.

Nínive llaqtapaq Diospa phiñakusqan

² Señor Diosqa sienteq Diosmi, payqa aynita kutichiqmi sinchi phiñakuqmi. Awqan sayariqkunamanmi aynita kutichin, awqankunapaqmi k'arakta phiñakushallan.

³ Señor Diosqa manan usqhayllachu phiñakun, payqa ancha atiyniyoqmi, huchallikuqtaqa muchuchinqapunin. Señor Dios puriqtinqa tutuka wayran phawarin, muyuq wayran sayarin, phuyukunapas ñut'u hallp'a hinan hatarin.

⁴ Paymi mama qochata phiñarin, chaymi ch'akipun, llapa mayutapas ch'akichinmi. Basán campopas Carmelo orqopas naq'epunmi, Líbano orqo-orqopi t'ikapas t'awipunmi.

⁵ Orqokunan ñawpaqenpi khatatatan, moqokunan ñawpaqenpi chullurin, hallp'a pachan qayllanpi chhukukukun, teqsimuyupas lliw chaypi tiyaqkunapas chhaphchikunmi.

⁶ Pay phiñakuqtinqa, ¿pitaq ñawpaqenpi sayanman? K'arakta phiñakuqtinqa, ¿pitaq aguantanman? K'arak phiñakusqanqa nina hinan aqarin, paypa qayllanpin qaqakuna ch'eqtakun.

⁷ Señor Diosqa allinmi, llaki-phutiy p'unchaypin runankunataqa pakaykun, payman hap'ipakuqkunatan waqaychan.

⁸ Ichaqa millp'uq unuwan hinan awqankunataqa wañuchinqa, awqan sayariqkunataqa laqhayaqmanmi qatiykunqa.

⁹ ¿Imatan Señor Dios contra yuyaykushankichis? Payqa llapallaykichistan tukurparisunkichis, manañan sarunchayqa kanqañachu.

¹⁰ Rawisqa khiska chawpipi hinan kankichis, t'ili machasqa hinan kankichis, ch'akillaña ichhu hinan ruphaykachisqa kankichis.

¹¹ Nínive llaqta, qanmantan huk runa sayarirqan, paymi millay kaqkunata Señor Dios contra yuyaykurqan, paymi hukkunata yuyaycharqan mana chaninkaqta ruwanankupaq.

¹² Señor Diosmi llaqtan runakunata nin: Asiria runakunaña kallpasapa askhallaña kanku chaypas, wañuchisqan kanqaku, chinkapunqakun. Llakichirqaykichisña chaypas, manañan llakichisqaykichisñachu.

¹³ Kunanqa munaychakusqasuykichistan chinkachisaq, watasqasuykichistan p'itisaq, nispa.

¹⁴ Nínive llaqta, Señor Diosmi qanpaq kamachikun: Mirayniykikunaqa manañan kapunqachu, ahinapin sutiykiqa chinkapunqa. Diosniykikunaq wasinpi kaq k'ullu idolokunatapas unuyachispa hich'asqa dioskunatapas ñut'usaqmi. Qanqa mana munanan kashanki, chaymi p'ampasqa kanaykipaq t'oqota ruwasaq, nispa.

¹⁵ ¡Qhawariychis! Orqo patakunatan chaski hamushan, payqa allin willakuykunatan apamushan, payqa allillan kawsanankutan willakushan. Judá suyu runakuna, Dios yupaychana fiestaykichiskunata ruwaychis, Diosman prometekusqaykichiskunata hunt'aychis. Manañan hayk'aqpas chay millay runakunaqa suyuykichisman hunt'aykunqakuñachu, llapallanmi wañuchisqa kapunqaku.