MATEO 1 - Diospa Simin Qelqa

Jesucristoq machulankuna

¹ Kaykunan Jesucristoq machulankunaq miraynin qelqa. Paymi rey Davidpa mirayninpas Abrahampa mirayninpas karqan.

² Abrahammi churiyarqan Isaacta, Isaactaq churiyarqan Jacobta, Jacobtaq churiyarqan Judata wawqenkunatawan.

³ Judataq churiyarqan Tamar warmipi Faresta Zaratawan, Farestaq churiyarqan Esromta, Esromtaq churiyarqan Aramta,

⁴ Aramtaq churiyarqan Aminadabta, Aminadabtaq churiyarqan Naasonta, Naasontaq churiyarqan Salmonta.

⁵ Salmontaq churiyarqan Rahab warmipi Boozta, Booztaq churiyarqan Rut warmipi Obedta, Obedtaq churiyarqan Isaita.

⁶ Isaitaq churiyarqan rey Davidta, Davidtaq churiyarqan Salomonta Uriaspa warminpi.

⁷ Salomontaq churiyarqan Roboamta, Roboamtaq churiyarqan Abiasta, Abiastaq churiyarqan Asata.

⁸ Asataq churiyarqan Josafat-ta, Josafat-taq churiyarqan Joramta, Joramtaq churiyarqan Uziasta.

⁹ Uziastaq churiyarqan Jotamta, Jotamtaq churiyarqan Ahazta, Ahaztaq churiyarqan Ezekiasta.

¹⁰ Ezekiastaq churiyarqan Manasesta, Manasestaq churiyarqan Amonta, Amontaq churiyarqan Josiasta.

¹¹ Josiastaq churiyarqan Jekoniasta wawqenkunatawan, Babilonia suyuman preso apasqa kasqanku watakunapi.

¹² Babilonia suyuman preso apasqa qhepatataq Jekoniasqa churiyarqan Salatielta, Salatieltaq churiyarqan Zorobabelta.

¹³ Zorobabeltaq churiyarqan Abiudta, Abiudtaq churiyarqan Eliakimta, Eliakimtaq churiyarqan Azorta.

¹⁴ Azortaq churiyarqan Sadokta, Sadoktaq churiyarqan Akimta, Akimtaq churiyarqan Eliudta.

¹⁵ Eliudtaq churiyarqan Eleazarta, Eleazartaq churiyarqan Matanta, Matantaq churiyarqan Jacobta.

¹⁶ Jacobtaq churiyarqan Mariaq qosan Joseta. Mariaqa karqan Cristo sutichasqa Jesuspa mamanmi.

¹⁷ Chay hinan Abrahammanta Davidkama chunka tawayoq miray karqan, Davidmanta Babilonia suyuman preso apasqa-kaykamataq chunka tawayoq miray karqan, Babiloniaman preso apasqa-kaymanta Diospa Akllasqan Cristoq nacesqankamataq chunka tawayoq miray karqan.

Jesucristoq nacesqanmanta

¹⁸ Jesucristoq nacesqanqa kay hinan karqan: Maman Mariaqa Josewan casarakunanpaq rimaykusqa kasharqan. Manaraq kuska tiyashaqtinkun Santo Espirituq atiyninwan wiksallisqa rikhurirqan.

¹⁹ Casarakunanpaq rimaykuqnin Josetaq chanin runa kaspa, mana p'enqaypi rikuchiyta munaspa, ch'inlla saqepuyta yuyaykusharqan.

²⁰ Chayta yuyaykushaqtinmi Señor Diospa angelninqa mosqoypi payman rikhurispa nirqan: —Rey Davidpa miraynin José, ama warmiyki Mariawan casarakuyta manchakuychu, payqa wiksallikurqan Santo Espirituq atiyninwanmi.

²¹ Qhari wawatan wachakunqa, hinaspan sutichanki Jesusta, paymi llaqtanta huchankunamanta qespichinqa, nispa.

²² Llapan chaykunaqa sucederqan Señor Diospa nisqankuna hunt'akunanpaqmi. Paymi profetanwan*f** nirqan:

²³ Doncella sipasmi wiksallikunqa, hinaspan qhari wawata wachakunqa, Emanuel sutiwantaq sutichanqaku, nispa. (Chay sutiqa “Diosmi ñoqanchiswan” ninantan nin).

²⁴ Puñusqanmanta rikch'arispataq Joseqa Señor Diospa angelninpa kamachisqanman hina ruwarqan, hinaspan Mariawan casarakapurqan.

²⁵ Ichaqa manan Mariataqa llamiykurqanchu phiwi qhari wawanta wachakunankama. Chay wawatan Jesusta suticharqan.