LEVÍTICO 1 - Diospa Simin Qelqa

Ruphachina sacrificiokunamanta

¹ Señor Diosmi Moisesta waqyaspan Dioswan Tupana Karpamantapacha payta rimapayarqan:

² —Israel runakunata nimuy: Pipas qankuna ukhumanta Señor Diosman ofrendata haywanqa chayqa, qonqan wakatapas ovejatapas cabratapas.

³ Ofrendachus ruphachinapaq waka kanqa chayqa, mana imanasqa orqon kanqa. Dioswan Tupana Karpaman haykunapin haywanqa Señor Dios payta chaskinanpaq.

⁴ Ruphachinapaq sacrificioq patanmanmi makinta churaykunqa, hinan paypaq chaskisqa kanqa huchankunata pampachananpaq.

⁵ Chaypin torillotaqa nak'anqa, Aaronpa churin sacerdotekunataq yawarta haywanqaku, hinaspan Dioswan Tupana Karpaman haykunapi kashan chay altar muyuriq qhataman yawarta hich'aykunqaku.

⁶ Chaymantataq ruphachinapaq nak'asqata ch'utinqa, hinaspan chayta moqonarqarinqa.

⁷ Aaronpa churin sacerdotekunataq altar patapi ninata hap'ichinqaku, hinaspan nina pataman llant'ata churaykunqaku.

⁸ Hinamantataq paykunaqa moqonasqa aychakunata, umanta, ch'unchul wiranta, altar nina pataman wachuchaykunqaku.

⁹ Ch'unchulkunatapas chakan aychakunatapas haywaqmi mayllinqa, hinan sacerdoteqa altar patapi llapallanta ruphachinqa. Chayqa mikhuna ofrendan, q'apayninqa Señor Diospa sonqonmanmi chayan.

¹⁰ Ofrendachus ruphachinapaq ovejapas cabrapas kanqa chayqa, mana imanasqa orqotan haywanqa.

¹¹ Chaytan Señor Diospa ñawpaqenpi altarpa wichay ladonpi nak'anqa. Aaronpa churin sacerdotekunataq altar muyuriq qhataman yawarninta hich'aykunqa.

¹² Chay nak'asqatan haywaqqa moqonarqarinqa, sacerdotetaq moqonasqa aychakunata, umantawan, ch'unchul wiratawan altar nina pataman wachuchaykunqa.

¹³ Ch'unchulkunatapas chakan aychakunatapas haywaqpa mayllisqantañan sacerdoteqa llapallanta haywaspa altar patapi ruphachinqa. Chayqa mikhuna ofrendan, q'apayninqa Señor Diospa sonqonmanmi chayan.

¹⁴ Señor Diospaq ofrendachus ruphachinapaq phalaq animal kanqa chayqa, kullkutapas urpi malqotapas haywanqa.

¹⁵ Chaytan sacerdoteqa altarman apamunqa, umanta p'itirparispan altarpi ruphachinqa, yawarnintataq altar qhataman sut'uchinqa.

¹⁶ Hinaspanmi enqhentapas chaypi kaqtawan horqonqa, chaytataq altarpa inti lloqsiy ladonman wikch'uykunqa, usphaq kasqanman.

¹⁷ Chaymantataqmi iskaynin raphra tupayta kichanqa, ichaqa manan iskayman ch'eqtanqachu. Sacerdotetaq chayta altar patapi ruphachinqa. Chayqa mikhuna ofrendan, q'apayninqa Señor Diospa sonqonmanmi chayan.