JUAN 1 - Diospa Simin Qelqa

Diospa Siminpa runaman tukusqan

¹ Manaraq imapas kamasqa kashaqtinmi Simiqa karqanña, Simitaq Dioswan karqan, Simitaq Dios karqan.

² Payqa maypachamantapas Dioswanmi karqan.

³ Tukuy imatapas paywanmi Diosqa ruwachirqan. Mana paywanqa manan ima kaqpas ruwasqachu karqan.

⁴ Paymantan kawsayqa paqarirqan, chay kawsaytaq runakunaq k'anchaynin karqan.

⁵ K'anchaymi laqhayaqta k'anchan, laqhayaqtaq k'anchayta mana tutayachirqanchu.

⁶ Juan sutiyoq runatan Diosqa kachamurqan.

⁷ Paymi willakuq hamurqan k'anchaymanta willakunanpaq, paypa willasqanwan llapa iñinankupaq.

⁸ Manan Juanchu k'anchayqa karqan, aswanpas k'anchaymanta willananpaqmi hamurqan.

⁹ Llapa runata k'anchaq cheqaq K'anchayqa kay pachamanmi chayamusharqanña.

¹⁰ Chay Simin kay pachapi kasharqan, kay pachataq paypa ruwasqan karqan, runakunataq payqa pichus kasqanta mana repararqankuchu.

¹¹ Payqa llaqtanmanmi hamurqan, llaqta-masinkunataq payta mana chaskirqankuchu.

¹² Payta chaskispa paypi iñiqkunatan ichaqa Diospa wawankunaman tukuchipurqan.

¹³ Diospa wawan kanankupaqqa manan runamantachu nacerqanku, manallataq runaq munayninman hinapaschu nacerqanku, aswanmi Diosmanta nacerqanku.

¹⁴ Chay Simin runa kapurqan, hinaspan ñoqanchiswan tiyarqan. Paymi Yayaq sapallan Churin kaspa ancha musphanapuni karqan, ñoqanchistaq chayta rikurqanchis. Payqa ancha khuyakuqmi karqan, Diospa cheqaq-kaynintataq hunt'asqata rikuchirqan.

¹⁵ Juanmi paymanta willakuspa kunkayoqta waqyakurqan: —Payqa qhepaytaña hamushan chaypas ñoqamantaqa aswan atiyniyoqmi, manaraq naceshaqtiy karqanpuniña chayrayku, nispa.

¹⁶ Yayaq Churinmi ancha khuyakuq kaspa llapanchisman ancha askha saminchata qowarqanchis.

¹⁷ Diosmi Moiseswan kamachikuy simita churachirqan, khuyapayakuyninta cheqaq-kaynintawanmi ichaqa Jesucristowan sut'inchachirqan.

¹⁸ Manan pipas Diostaqa hayk'aqpas rikurqanchu, Yayaq sapallan Churinmi reqsichiwarqanchis, payqa Diosmi, Yayawan kuskataqmi tiyanpas.

Bautizaq Juanpa willasqan

¹⁹ Jerusalén llaqtapi kaq Judío umallikunan sacerdotekunata, sacerdote yanapaq Leví runakunatawan kacharqanku Juanta pichus kasqanta tapunankupaq.

²⁰ Hinan Juanqa iman kaqta sut'inta willarqan: —Manan ñoqachu Diospa Akllasqan Cristoqa kani, nispa.

²¹ Chaymi tapurqanku: —Chhaynaqa, ¿profeta*f** Eliaschu kanki? nispa. Paytaq nirqan: —Manan paychu kani, nispa. Nillarqankutaq: —Diosmi huk profetata*f** kachamunan karqan, ¿chaychu qanqa kanki? nispa. Chaymi nillarqantaq: —Manan chaypaschu kani, nispa.

²² Chaymi nirqanku: —Chay hinaqa, kachamuwaqniykuman willanaykupaq pipunichus kasqaykita willawayku. Qan kikiykiqa, ¿pi kasqaykitan ninki? nispa.

²³ Juantaq nirqan: —Profeta*f** Isaiasmi nirqan: Ch'inneqpin huk kunka waqyakun: Cheqanyachiychis Señor Diospa ñanninta, nispa. Chaymi ñoqaqa kani, nispa.

²⁴ Chay kachasqakunamanta wakinninkuqa fariseokunan*f** karqanku.

²⁵ Paykunan Juanta tapurqanku: —Manataq Diospa Akllasqan Cristopaschu, manataq Eliaspaschu, manallataq Diospa kachamunan karqan chay profetapaschu*f** kashaspaykiqa, ¿imanaqtintaq bautizanki? nispa.

²⁶ Chaymi Juanqa paykunata nirqan: —Ñoqaqa unullawanmi bautizani, ichaqa qankuna ukhupin huk runa kashan, paytan manaraq reqsinkichischu.

²⁷ Paymi chay “qhepaytan hamushan” nisqayqa. Ñoqaqa usut'a watullantapas manan paskanaypaq hinachu kani, nispa.

²⁸ Juanqa Jordán mayu inti lloqsimuy lado Betaniapin bautizasharqan, chaypin chaykuna sucederqan.

Runakunaq huchan pampachaq

²⁹ Qhepantin p'unchaymi Juanqa Jesusta payman hamushaqta rikuspa nirqan: —Qhawariychis, paymi Diosmanta hamuq runa, borrego hina wañuspa runakunaq huchankuta pampachaq.

³⁰ Paymi chay nisqay runaqa. Paymantan nirqani: Payqa qhepaytaña hamushan chaypas ñoqamantaqa aswan atiyniyoqmi, manaraq naceshaqtiy karqanpuniña chayrayku, nispa.

³¹ Ñoqapas manan pichus pay kasqantaqa yacharqanichu, ichaqa Israel runakunaq payta reqsinanpaqmi unuwan bautizashani, nispa.

³² Juanqa nillarqantaqmi: —Santo Espiritutan hanaq pachamanta urpita hina uraykamushaqta rikurqani Jesuspa uman altopi sayaykuqtawan.

³³ Ñoqaqa manaraqmi pichus pay kasqanta yacharqanichu, ichaqa unuwan bautizanaypaq kachamuwaqniy Diosmi niwarqan: Piqpa altonmanchus Santo Espíritu uraykamuspa sayaykuqta rikunki, chaymi Santo Espirituwan bautizaqqa, nispa.

³⁴ Ñoqan chayta rikurqani, hinaspan payqa Diospa Churin kasqanta willarqani, nispa.

Jesuspa ñawpaqkaq yachachisqankuna

³⁵ Qhepantin p'unchaymi Juanqa iskay yachachisqankunawan kashallarqantaq.

³⁶ Hinaspan Jesusta purishaqta rikuspa nirqan: —Qhawariychis, paymi Diosmanta hamuq runa, borrego hina wañuspa huchata qechuq, nispa.

³⁷ Chayta uyarispan Juanpa iskaynin yachachisqankunaqa Jesuspa qhepanta ripurqanku.

³⁸ Hinan Jesusqa kutirimuspa, paypa qhepanta rishasqankuta rikuspa nirqan: —¿Imatan munashankichis? nispa. Paykunataq nirqanku: —Yachachikuq, ¿maypin tiyanki? nispa.

³⁹ Chaymi paykunata nirqan: —Hakuyá, rikumuychis, nispa. Rispataq rikurqanku maypichus tiyasqanta, chay horaqa las cuatro hinañan karqan. Hinaspan paqarisninkama paywan qhepakurqanku.

⁴⁰ Juanpa rimasqanta uyarispa Jesuspa qhepanta iskay riqkunamanta hukninqa Simón Pedroq wawqen Andresmi karqan.

⁴¹ Andresmi ñawpaqta tarirqan wawqen Simonta, hinaspa nirqan: —Mesiastan tarimuyku, nispa. (Mesías sutiqa Diospa Akllasqan Cristo ninantan nin).

⁴² Andresmi Jesusman Simonta pusamurqan. Chaymi Simonta qhawaykuspa Jesusqa nirqan: —Qanqa Juanpa churin Simonmi kanki, kunanmantaqa Cefasmi sutiyki kanqa, nispa. (Cefas sutiqa Pedro ninantan nin).

Felipeta Natanaeltawan waqyasqan

⁴³ Qhepantin p'unchaymi Jesusqa Galileaman puriyta yuyaykurqan. Felipeta tarispataq nirqan: —Qhepayta hamuy, nispa.

⁴⁴ Felipeqa Betsaida llaqtamantan karqan. Chayllamantataqmi Andrespas Pedropas karqan.

⁴⁵ Felipen Natanaelta tarispa nirqan: —Pimantachus Moisesqa kamachikuy simipi qelqarqan, hinallataq profetakunapas*f** qelqarqan chaytan tarimuyku. Paymi Nazaret llaqtamanta Josepa churin Jesusqa, nispa.

⁴⁶ Natanaeltaq payta nirqan: —Nazaret llaqtamantaqa, ¿ima allinpas kanmanchu? nispa. Chaymi Felipeqa payta nirqan: —Haku, rikumunki, nispa.

⁴⁷ Jesustaq Natanaelpa hamusqanta rikuspa nirqan: —Kay hamuqqa cheqaq Israel runan, payqa manapunin pitapas q'otunchu, nispa.

⁴⁸ Natanaeltaq payta nirqan: —¿Imaynapin reqsiwanki? nispa. Hinan Jesusqa nirqan: —Manaraq Felipe waqyamushasuqtiykin, higos sach'a k'uchupi kashaqta rikurqayki, nispa.

⁴⁹ Natanaeltaq nirqan: —Yachachikuq, qanqa Diospa Churinmi kanki, Israelpa Reyninmi kanki, nispa.

⁵⁰ Chaymi Jesusqa payta nirqan: —¿Higos sach'a k'uchupi kashaqtan rikurqayki niqtiychu iñinki? Kaykunamanta aswan musphana ruwasqakunataraqmi rikunki, nispa.

⁵¹ Jesusqa nillarqantaqmi: —Cheqaqtapunin niykichis: Kunanmantan hanaq pachata kicharayashaqta rikunkichis, Diospa angelninkunatapas Diospa Kachamusqan Runaq patayta wichashaqta uraykamushaqtawan rikunkichis, nispa.