JONÁS 1 - Diospa Simin Qelqa

Jonaspa Diosmanta ayqekusqan

¹ Amitaipa churin Jonasmanmi Señor Diosqa rimaykurqan:

² Phaway riy hatun Nínive llaqtata, hinaspa chay llaqta contra kunkayoqta willamuy, sinchi mana chanin ruwasqantan yachani, nispa.

³ Jonastaq ichaqa Señor Diospa qayllanmanta España suyuman ayqekunanpaq puririrqan, Jope llaqtaman uraykuspantaq Españaman riq barcota tarirqan. Pasajenta pagaspataq puriq-masinkunawan chayman haykurqan, Españaman Señor Diospa qayllanmanta karunchakunanpaq.

⁴ Señor Diosmi ichaqa mama qochapi sinchita wayrachimurqan, sinchitapunin phoqchiqerqan, chaymi barcopas p'akirqarikunan patapiña kasharqan.

⁵ Barco purichiqkunataq maytapuni mancharikurqanku, hinan diosninkuta sapanka waqyakurqanku. Chaymi barco qasichinapaq tukuy imaymanata mama qochaman wikch'uykurqanku. Chaykamataq Jonasqa barco ukhuman haykuspa chaypi misk'ita puñurqapurqan.

⁶ Hinan barcopi kamachikuqqa Jonasman qayllaykuspa nirqan: —¿Imaynataq puñuykukushanki? ¡Hatariy, diosniykimanta waqyakuy! Ichapaschá pay khuyapayawasunman, manataq wañusunmanchu, nispa.

⁷ Chaykamataq barco purichiqkunaqa ninakurqanku: —Sorteasun, chhaynapi yachasun kay mana allinpi kananchispaq pichus huchayoq kasqanta, nispa. Sortearqankun, chaymi sorteasqaqa Jonasman chayarqan.

⁸ Hinan paykunaqa Jonasta nirqanku: —¡Chay hinaqa willawayku imanaqtinchus kay mana allinpi rikukusqanchista! ¿Imamantaq hamushanki? ¿Maymantataq hamushanki? ¿May suyumantan kanki? ¿May llaqtayoqtaq kanki? nispa.

⁹ Jonastaq kutichirqan: —Hebreo runan kani, Señor Diostan yupaychani, paymi mama qochata hallp'a pachata kamaqqa. Paymi Hanaq Pacha Diosqa, nispa.

¹⁰ Jonasqa willallarqantaq Señor Diospa qayllanmanta ayqekushasqanta, paykunataq chayta yachaspanku sinchita mancharikurqanku. Hinaspan tapuykurqanku: —¿Imaraykutaq chayta ruwarqanki? nispa.

¹¹ Mama qocha aswan-aswanta phiñakuqtintaq, paytaqa tapuykullarqankutaq: —¿Imanasqaykikutaq mama qochaq phiñakuynin thaninanpaq? nispa.

¹² Jonastaq kutichirqan: —Hap'ispa mama qochaman wikch'uykuwaychis, chaymi mama qochaqa thanipusunkichis. Ñoqaqa yachanin huchay hawa kay sinchi wayramusqasuykichista, nispa.

¹³ Chaypas chay runakunaqa barcota hallp'a pataman chayachinankupaqmi tukuy kallpawan lloqenawan qachirqanku, ichaqa manan atirqankuchu, mama qocha paykunapaq aswan-aswanta phiñakuqtin.

¹⁴ Chaymi Señor Diosmanta waqyakuspa nirqanku: ¡Señor Dios, ama kay runa hawa wañuchiwaykuchu, manataqchus huchallikun chayqa wañusqanmanta ama huchachawaykuchu, Señor Dios qanqa maychus munayniykiman hina ruwaqmi kanki! nispa.

¹⁵ Hinaspan Jonasta hap'ispa mama qochaman wikch'uykurqanku, chaymi mama qochaqa manaña phiñakapurqanchu.

¹⁶ Hinan chay runakunaqa Señor Diosta anchatapuni manchakurqanku, hinaspan Señor Diosman sacrificiota haywarqanku, prometekurqanku ima.

¹⁷ Señor Diostaq hatunkaray challwata suyachisharqan Jonasta millp'uykunanpaq, hinan Jonasqa challwaq wiksanpi kasharqan kinsa p'unchay kinsa tuta.