JOEL 1 - Diospa Simin Qelqa

Chakrakunata langostaq tukusqan

¹ Kaytan Señor Diosqa Petuelpa churin Joelman rimaykurqan.

² Kurak runakuna, kayta uyariychis, suyuntinpi llapa tiyaqkunapas, maki uyariychis. ¿Hayk'aqpas kay hinataqa rikurqankichischu? ¿Hayk'aqpas kay hinataqa taytaykichiskuna rikurqankuchu?

³ Kayta wawaykichisman willaychis, wawaykichispas wawankuman willachunku, wawankupas wawankuman willachunku.

⁴ Langostan wakwamuspa q'omerkunata mikhurqan, chaykunaq puchuntataq hatun langostakuna mikhurqan, chaykunaq puchuntataq langosta uñakuna mikhurqan, chaykunaq puchuntataq wak langostakuna tukuparqan.

⁵ Yaw machaqkuna, ¡rikch'ariychis! ¡Waqaychis! Yaw vino ukyaqkuna, ¡anchiychis! ¡Manañan upi vinoykichis kanqañachu!

⁶ Kallpasapa askhallaña soldado hinan suyuman langostakuna hunt'aykamurqan, kirunkuqa orqo leonpa kirunkuna hinaraqmi, waqsankupas china leonpa waqsankuna hinaraqmi.

⁷ Uvas chakraytan purunyachirqan, higos sach'aykunatan khaskarqan, llapallantan qaranarqan hinaspa kumparqan, k'allmankunapas yuraq k'aspin kapushan.

⁸ Llaqtay runakuna, waqaykuychis, imaynan sipasqa novion wañuqtin lutokun hina.

⁹ Manañan rurupas vinopas kapunchu Señor Diosman wasinpi haywanapaq, Señor Diospa kamachin sacerdotekunan khuyayta waqaykushanku.

¹⁰ Campon purunyachisqa kashan, chakrakunan sonqo nanay kashan, manañan trigo cosecha kapunchu, uvas yurakunan ch'akipun, olivo sach'akunan naq'epun.

¹¹ Manañan cosechanapaq kapunchu, trigopas cebadapas chinkapunmi, chayrayku, chakrayoqkuna, llakikuychis, uvas chakrayoqkuna, waqaykuychis.

¹² Uvas yurakunan ch'akipun, higos sach'akunan naq'epun, granada mallkipas, palmera sach'apas, manzana sach'apas, campopi llapa sach'apas ch'akipunmi. Runakunaqa manapunin kusikapunkuñachu.

¹³ Yaw sacerdotekuna, yana p'achawan lutokuychis, yupaychana wasi altarpi serviqkuna, anchiychis. Diosniypa kamachinkuna, yupaychana wasiman haykuychis, yana p'achantin waqaspa chaypi illariychis. Manañan rurupas vinopas kapunchu Diosniykichispa wasinpi haywanaykichispaq.

¹⁴ Diospa qayllanpi ayunanapaq llaqta runakunata kamachiychis, Diosmanta mañakunapaq runakunata huñuykuychis Apu Señor Diosniykichispa wasinman hamunankupaq, kurak runakunatapas suyuntinpi llapa tiyaqkunatapas waqyakuychis, hinaspa Señor Diosmanta mañakuychis.

¹⁵ ¡Imayna manchakuyraqmi! ¡Señor Diospa muchuchinan p'unchaymi sispaykamushan! ¡Tukuy-atiyniyoqpa thuninan manchay p'unchaymi chayamunqa!

¹⁶ Qhawashaqtinchismi mikhunata qechupuwarqanchis, Diosninchispa wasinpiqa manañan kusikapunkuñachu.

¹⁷ Muhun k'urpa ukhupi thutapun, manañan trigo kapunchu cosechanapaq, chaymi mikhuy waqaychanakuna kumpasqa kapushan, taqekunan thunisqa kapushan.

¹⁸ ¡Khuyaytan uywakuna waqanku! Khuyaytan waka t'aqakuna purinku manaña q'achu kapusqanrayku, ovejakunapas tulluyapushallantaqmi.

¹⁹ Señor Diosnilláy, qanmanmi waqyakamuyki, ninan q'achu pampata ruphaykapun, ninan campo llapa sach'ata q'olaykapun.

²⁰ Salqa animalkunapas qaparimusunkikun huch'uy mayukuna ch'akipusqanrayku, q'achu pampakunata nina ruphaykapusqanrayku.