HEBREOS 1 - Diospa Simin Qelqa

Diosmi Churinwan rimapayawanchis

¹ Ñawpa tiempopin machulanchiskunaman Diosqa imaymanapi askha kutita profetakunawan*f** rimapayarqan,

² kunantaq kay p'uchukay tiempokunapi Churinwan rimapayawanchis. Churinwanmi Diosqa hinantin pachakunatapas ruwarqan, hinaspa tukuy imaymanayoq kananpaq payta churarqan.

³ Paymi Diospa hatun atiyninpa lliphlli-kaynin, Diospa kikin rikch'ayninpunitaq kanpas, paymi tukuy imaymanatapas atiyniyoq siminwan hap'ishan. Paymi runakunaq huchanta Dioswan pampachachispa hanaq pachapi Diospa pañaneqenpi tiyaykurqan.

Angelkunamanta Churiq aswan kurak kasqan

⁴ Diospa Churinqa angelkunamantapas aswan kurak-kaymanmi ayparqan, paykunaq sutinmantapas aswan qollana sutitapunin chaskirqan.

⁵ Diosqa manan hayk'aqpas mayqen angeltapas nirqanchu: Qanmi Churiyqa kanki, kunan p'unchaymi churiyayki, nispaqa. Manallataq mayqen angelmantapas nirqanchu: Ñoqan Yayanqa kasaq, paytaq Churiy kanqa, nispaqa.

⁶ Phiwi Churinta kay pachaman kachamuspanmi ichaqa nin: Diospa llapallan angelninkuna payta yupaychachunku, nispa.

⁷ Angelninkunamantataq nin: Diosmi angelninkunata wayraman hina tukuchin, kamachinkunatapas rawrashaq ninaman hina tukuchin.

⁸ Churintan ichaqa nin: Qanqa Diosmi kanki, wiñay-wiñaypaqmi lliwta kamachikunki, chaninkaqta ruwaspallapunin kamachikunki.

⁹ Chaninkaqtan munakurqanki, mana chaninkaqtataq cheqnikurqanki, chaymi ñoqa Diosniykiqa wakinkunamantapas kurakta churaspa, aceitewan hawispa kusichirqayki, nispa.

¹⁰ Nillantaq: Qanqa Señormi kanki, qanmi qallariypiqa kay pachata teqsicharqanki, hanaq pachatapas makiykiwanmi ruwarqanki.

¹¹ Chaykunaqa tukukapunqan, qanmi ichaqa kashallankipuni. Llapallanmi chaykunaqa p'acha hina mawk'akapunqa,

¹² huk p'achata hinan chaykunata k'uyuykunki, huk p'acha hinan cambiasqa kanqa, qanmi ichaqa kaqllapuni kanki, kawsayniykipas manan hayk'aqpas tukukunqachu, nispa.

¹³ Diosqa manan hayk'aqpas mayqen angeltapas nirqanchu: Pañaneqeypi tiyaykuy, awqaykikunata chaki sarunaykiman churanaykama, nispaqa.

¹⁴ Llapan angelkunaqa Diospa kamachin ruwaq espiritukunallan kanku, paykunaqa Diospa qespichisqankunaq allinninpaq yanapaqta kachamusqallanmi kanku.