GÉNESIS 1 - Diospa Simin Qelqa

Diospa tukuy imaymanata kamasqan

¹ Qallariypin Diosqa hanaq pachata kay pachatawan kamarqan.

² Kay pachataq kasharqan rawisqa ch'usaqtaq, laqhayaqtaq chinkay-chinkay unuta pakasharqan. Diospa Espirituntaq unu patapi muyusharqan.

³ Diosmi nirqan: —K'anchay kachun, nispa. Ahinataq k'anchay karqan.

⁴ Diosmi rikurqan k'anchayqa allin kasqanta, k'anchaytataq laqhayaqmanta t'aqarqan.

⁵ Hinaspan Diosqa k'anchayta “P'unchay” nisqata suticharqan, laqhayaqtataq “Tuta” nisqata suticharqan. Hinan ch'isiyaykurqanpas illarimurqanpas ñawpaqkaq p'unchay.

⁶ Diosmi nillarqantaq: —Unu chawpipi t'aqaq ch'usaq kachun, hinaspa unumanta unuta t'aqachun, nispa.

⁷ Diostaq ruwarqan t'aqaq ch'usaqta, hinan ch'usaq urapi kaq unu t'aqakurqan ch'usaq patapi kaq unumanta. Ahinataq karqan.

⁸ Diostaq t'aqaq ch'usaqta suticharqan “Hanaq Pacha” nisqata. Hinan ch'isiyaykurqanpas illarimurqanpas iskaykaq p'unchay.

⁹ Diosmi nirqan: —Hanaq pacha urapi kaq unu hukllaman huñukuchun, hinaspa ch'aki rikhurichun, nispa. Ahinataq karqan.

¹⁰ Hinaspan Diosqa ch'akita suticharqan “Hallp'a” nisqata, huñusqa unutataq suticharqan “Mama Qocha” nisqata. Diosmi rikurqan allin kasqanta.

¹¹ Hinaspan Diosqa nirqan: —Hallp'a phutuchichun llapa q'omerta: muhuq qorakunata, rurunpi muhuyoq sach'akunata, nispa. Ahinataq karqan.

¹² Hinaqtinmi hallp'aqa phutuchirqan llapa q'omerta: muhuq qorakunata, rurunpi muhuyoq sach'akunata. Diosmi rikurqan allin kasqanta.

¹³ Hinan ch'isiyaykurqanpas illarimurqanpas kinsakaq p'unchay.

¹⁴ Diosmi nillarqantaq: —Hanaq pachapi k'anchaqkuna kachun p'unchaytawan tutatawan t'aqananpaq, hinallataq mita-mitata, p'unchay-p'unchayta, wata-watatapas señalaqpaq.

¹⁵ Kallachuntaq hanaq pachapi kay pachata k'anchamunanpaq, nispa. Ahinataq karqan.

¹⁶ Diosmi iskay hatun k'anchaqkunata ruwarqan, hatunkaq k'anchaqta p'unchay k'anchananpaq, huch'uykaq k'anchaqtataq tuta k'anchananpaq. Ruwallarqantaq ch'askakunatapas.

¹⁷ Hinaspan Diosqa hanaq pachapi k'anchaqkunata churarqan, kay pachata k'anchamunankupaq,

¹⁸ p'unchaypas tutapas k'anchanankupaq, k'anchaytawan laqhayaqtawan t'aqanankupaqwan. Diosmi rikurqan allin kasqanta.

¹⁹ Hinan ch'isiyaykurqanpas illarimurqanpas tawakaq p'unchay.

²⁰ Diosmi nillarqantaq: —Unu wakwachimuchun kawsashaq animalkunata, hallp'a altopitaq phalaq animalkunapas phalachun, nispa.

²¹ Hinaspan Diosqa kamarqan hatuchaq qocha animalkunata, unupi llapa kawsaqkunata, llapa phalaq animalkunatapas. Diosmi rikurqan allin kasqanta.

²² Hinaspanmi Diosqa chaykunata samincharqan: —Askhata miraychis, mama qochaman hunt'aykuychis, phalaq animalkunapas kay pachapi askhayachun, nispa.

²³ Hinan ch'isiyaykurqanpas illarimurqanpas phisqakaq p'unchay.

²⁴ Diosmi nillarqantaq: —Hallp'a rikhurichichun tukuy rikch'aq kawsashaq animalkunata: uywakunatapas, suchuq animalkunatapas, salqa uywakunatapas, nispa. Ahinataq karqan.

²⁵ Hinaspan Diosqa ruwarqan tukuy rikch'aq uywakunata, suchuq animalkunata, salqa uywakunatapas. Diosmi rikurqan allin kasqanta.

²⁶ Hinaspanmi Diosqa nirqan: —Runata ruwasunchis ñoqanchisman rikch'akuqta, rikch'ayninchisman hina. Kamachichuntaq challwakunata, phalaq animalkunatapas, uywakunatapas, suchuq animalkunatapas, kay pachantinpipas, nispa.

²⁷ Hinaspan Diosqa runata kamarqan, Diosman rikch'akuqta payta kamarqan, qharita warmitawan kamarqan.

²⁸ Diostaq paykunata saminchaspa nirqan: —Askhata miraychis, kay pachamanpas hunt'aykuychis, chaypi munayniyoq kaychis, kamachiychistaq challwakunatapas, phalaq animalkunatapas, kay pachapi puriq llapa animalkunatapas, nispa.

²⁹ Diosmi nillarqantaq: —Kayqa mikhunaykichispaqmi qoykichis kay pachantinpi llapa muhuq qorata, llapa rurunpi muhuyoq sach'akunatapas.

³⁰ Hinallataqmi lliw kay pacha uywakunamanpas, lliw phalaq animalkunamanpas, lliw suchuq animalkunamanpas, tukuy kawsaqmanpas qollanitaq llapa q'omer qorata mikhunankupaq, nispa. Ahinataq karqan.

³¹ Diosmi rikurqan llapa ruwasqanta, ancha allin kasqanta. Hinan ch'isiyaykurqanpas illarimurqanpas soqtakaq p'unchay.