FILEMÓN 1 - Diospa Simin Qelqa

Napaykukuy

¹ Ñoqa Pablon Jesucristo hawa preso kaspa, wawqe Timoteopiwan napaykamuykiku llank'aq-masiyku munasqa Filemonman,

² munasqa pananchis Apiaman, soldado-masiyku Arquipoman, wasiykipi huñukuq iñiq t'aqaman:

³ Dios Yayanchis Señor Jesucristopiwan sumaqta qhawarisunkichis thak-kaytapas qosunkichis.

Filemonpa munakuynin iñiyninpiwan

⁴ Wawqéy Filemón, Diosmanta mañakuspaymi yuyarikullaykipuni, hinaspan Diosniyman graciasta qoni,

⁵ Señor Jesuspi iñisqaykimanta llapa iñiqkunatapas munakusqaykimantawan uyarispay.

⁶ Diosmantan mañakuni iñiq-masiyku kaspayki, Jesucristowan llapa saminchayoq kasqanchista allinta entiendenaykipaq.

⁷ Munakuyniykiwanmi anchatapuni kusikunipas kallpachakunipas. Qanmi, wawqéy, iñiqkunaq sonqonta llanllarichirqanki.

Kamachi Onesimopaq Pabloq valekusqan

⁸ Chayraykun Cristoq apostolnin*f** kaspay imachus ruwanaykita mana manchakuspa kamachiykiman, ichaqa manan chhaynatachu kamachiyki,

⁹ aswanpas munakuywan valekuytan munayki. Ñoqa Pablo, yuyaqña kashaspay, kunanpas Jesucristo hawa preso kashaspa

¹⁰ anchata valekuyki, preso kashaspa tarisqay iñiypi churiy Onesimopaq.

¹¹ Payqa huk tiempopi manan imapaqpas servirqasunkichu, kunanmi ichaqa qanpaqpas ñoqapaqpas allin servicioyoq kapun.

¹² Chaymi ancha munakusqay Onesimota kachampushayki.

¹³ Munaymanmi karqan kaypi ñoqawan qhepakunanta, Cristomanta allin willakuykunata willasqayrayku preso kasqaypi qanpa rantiykipi yanapawananpaq.

¹⁴ Ichaqa manan imatapas mana simiykimantaqa ruwayta munarqanichu, allin ruwasqayki ama kamachisqa hinalla kananpaq, aswanpas munayniykimanta kananpaq.

¹⁵ Ichapaschá Onesimoqa huk tiempo qanmanta t'aqakurqan, kunan wiñaypaq payta chaskikapunaykipaq.

¹⁶ Kunanqa manan kamachillachu kapun, aswanpas kamachimantaqa aswan allinmi kapun, munasqa wawqeñan kapun. Ñoqaqa anchatan paytaqa munakuni, qanqa astawanraqchá munakunki, mana runamasita hinallachu, aswanpas Señorpi iñiq wawqeta hinapuni.

¹⁷ Chhaynaqa, llank'aq-masiykita hinachus qhawariwanki chayqa, ñoqa kikiyta hina payta chaskiykuy.

¹⁸ Ima mana allintapas ruwarqasunki, otaq manuykipas karqan chayqa, ñoqata cobraway.

¹⁹ Ñoqa Pablon makiywanpuni kayta qelqamuyki, ñoqan chay manuta pagapusqayki. Qanpas Cristopi iñiymanta manullaytaqmi kashanki, chaymantaqa manan imaniykipasñachu.

²⁰ Arí, wawqéy, Señorpi iñiq hinapuni valekusqayta uyariykuway, sonqoyta llanllarichiway Cristopi wawqe hinapuni.

²¹ Kasukunaykita allinta yachaspaymi kaytaqa qelqamuyki, nisqaymantapas astawanraq ruwanaykita yachaspa.

²² Hinallataq valekuyki qorpachana wasita wakichipuwanaykipaq, Diosmanta mañakusqaykichis hawa qankuna watukuqta Señorpa kachamuwanantan suyashani.

Tukupay napaykukuy

²³ Jesucristorayku presomasiy Epafrasmi napaykamusunki,

²⁴ hinallataq llank'aq-masiykunapas Marcos, Aristarco, Demas, Lucaspiwan napaykamusunkiku.

²⁵ Señorninchis Jesucristo sumaqta qhawarisunkichis.