ESTER 1 - Diospa Simin Qelqa

Reina Vastiq Asuerota pisichasqan

¹ Rey Asueron India suyumanta Etiopía suyukama kamachirqan, kamachisqan suyupiqa pachak iskay chunka qanchisniyoq hatun hap'iykunan karqan.

² Chaykunatan kamachirqan suyuq hatun llaqtan Susamanta.

³ Iskay wata kurakña kamachikushaspan rey Asueroqa hatun fiestata wakichirqan, chaymanmi waqyachirqan oficialninkunata, yuyaychaqninkunata, Mediamanta Persiamantawan ejército umallikunata, hatun hap'iy kamachikuqkunata, apukunatawan.

⁴ Payqa munarqanmi qhapaq-kayninta, suyuq ancha hatun kasqanta, atiyninpas ancha musphana kasqantawan paykunaman rikuchiyta. Chay fiestaqa soqta killantinmi karqan.

⁵ Chaymantapas huk fiestatawanraqmi wakichirqan reypa wasin huerta patiopi, hinaspan hatun Susa llaqtapi llapan tiyaqkunata, qhapaqkunata, wakchakunatapas waqyachirqan. Chay fiestan qanchis p'unchaynintin karqan.

⁶ Chay patiopin yuraq qespi rumi tusakuna karqan, tusakuna patapitaq qolqe argollakuna kanichisqa karqan, chay argollakunamanmi yuraqniyoq llawlli-puka algodón cortinakuna linomanta sani chiwiqeñapi warkusqa karqan. Pampantaq waka rumiwan, yuraq qespi rumiwan, perlawan, siwar umiñapiwan mast'aspa llusk'achasqa karqan. Chaypitaq qorimanta qolqemanta ruwasqa puñunakuna churasqa karqan.

⁷ Reyqa allin runa kaqtinmi, vinoqa unu hinaraq karqan, tukuy rikch'aq qori qerukunapin haywachirqan.

⁸ Reymi vino haywaqnin umallikunata kamachirqan pipas mana munaqtaqa ama ukyachinanpaq, aswanpas sapanka ima munasqankuta ukyanankupaq.

⁹ Hinallataq reina Vastipas rey Asueroq wasinpi warmikunapaq fiestata ruwarqan.

¹⁰ Fiesta tukukuy qanchiskaq p'unchaytaq reyqa vinowan sonqopas-sonqo karqan. Chaymi sapaq kamachinpi kaq eunuco qharikunata Mehumanta, Biztata, Harbonata, Bigtata, Abagtata, Zetarta, Karkastawan kamachirqan

¹¹ reina Vastita qayllanman umanpi sumaq pilluyoqta pusamunankupaq. Reyqa munarqan oficialninkunaman llapa runakunamanwan warminpa sumaq rikch'ayninta rikuchiyta, pay sumaq rikch'ayniyoq kasqanrayku.

¹² Reina Vastitaq ichaqa mana kasurqanchu eunuco qharikunawan reypa kamachisqanta. Chaymi reyqa sinchita phiñakuspa rawrarirqan.

¹³ Yachasqañan karqan reypa sasachakuyninkunata kamachikuy simi allin yachaqkunaq t'aqtanankuqa. Chaymi payqa t'aqtay yachaqkunata waqyachimurqan.

¹⁴ Reyta aswan yuyaychaqkunan karqan: Karsena, Setar, Admata, Tarsis, Meres, Marsena, Memukanpiwan. Paykunan karqan Persiapi Mediapi uma kamachikuqkuna, reypa qayllanman haykunankutaqa manataq pipas hark'aqchu, suyupipas ancha chaniyoq runakunan karqanku.

¹⁵ Huñuykusqa kashaqtinkun reyqa tapurqan: —Kamachikuyman hina, ¿imatan ruwasunman reina Vastita eunucokunawan kamachisqayta mana kasuwasqanmanta? nispa.

¹⁶ Hinan kamachikuqkunaq qayllanpi Memukanqa reyta nirqan: —Reina Vastiqa manan rey contrallachu huchallikun, payqa suyuykipi tukuy runakuna contran huchallikun, hinallataq llapa kamachikuqkuna contrapas.

¹⁷ Chay hinaqa llapan warmikuna reinaq ruwasqanta yachaspanku, kasqallantataq qosankuta pisichaspa ninqaku: Reina Vastipas manan kasurqanchu rey Asueroq kamachisqanta, ¿chaychu ñoqanchis kasusunman qosanchista? nispa.

¹⁸ Reinaq ruwasqanta yachaspaqa Mediapi Persiapi oficialniykikunaq warminkunaqa kunanpachan qosankuta rimapakunqaku, ahinapitaq pisichaypas mana allin kawsaypas kanqa.

¹⁹ Chay hinaqa, reyníy, allin rikch'akusunki chayqa, kay hina unanchayta willachiy, hinallataq Persia suyuqpas Media suyuqpas kamachikuynin qelqapi qelqay ama yanqayachisqa kananpaq: Reina Vastiqa manan hayk'aqpas rey Asueroman qayllaykunqañachu, nisqata. Chaymantapas paypa rantinpi huk aswan allin warmita reinata churanki.

²⁰ Ahinapin ancha hatun suyuntinpi qanpa unanchasqayki willasqa kaqtin, llapan warmikuna qhapaqkunapas wakchakunapas qosankuta kasunqaku, nispa.

²¹ Hinan reymanpas yuyaychaqkunamanpas Memukanpa yuyaychasqan allinpuni rikch'akurqan, chaymi reyqa nisqanta hina ruwarqan.

²² Suyupi llapan hatun hap'iykunamantaq qelqakunata apachirqan, sapankaq rimayninku rimaypi qelqayninku qelqapi, llapan qharikuna wasinkupi kamachikunankupaq kamachispa.