DANIEL 1 - Diospa Simin Qelqa

Danielwan wayna-masinkunapiwan Babilonia suyupi kasqanku

¹ Iskay wata kurakña Judá suyu rey Joakim kamachikushaqtinmi, Babilonia suyu rey Nabukodonosorqa Jerusalenman hamurqan, hinaspan llaqtata soldadonkunantin muyuykurqan.

² Señor Diosmi Nabukodonosorwan Judá rey Joakimta hap'ichirqan, hinallataq Diospa wasinpi kaqkunatapas wakinta apachirqan. Hinan chaykunata Babilonia suyuman apaspa diosninpa imaymanankunata waqaychana wasiman churarqan.

³ Reymi oficialkunaq umallin Aspenazta kamachirqan Israel rey ayllumanta allichachaq runakunamanta wakin waynakunata akllamunanpaq.

⁴ Chaykunan kanan qhali waynakuna, sumaq rikch'ayniyoqkuna, imaymana yachaqkuna, usqhaylla yachaqaqkuna, allin yuyayniyoqkuna, reypa wasinpi kusa kamachi ruwaqkuna ima. Paykunamanmi umalli Aspenazqa Babilonia runakunaq qelqaynintapas rimaynintapas yachachinan.

⁵ Reytaq chay waynakunaman sapa p'unchay mikhunan mikhunata ukyanan vinota haywachirqan. Kamachillarqantaq kinsa watantin paykunata yachachinanpaq, hinamantataq reypa kamachin kapunankupaq.

⁶ Chaykuna ukhupin kasharqan Judá waynakuna Daniel, Ananías, Mishael, Azariaspiwan.

⁷ Oficialkunaq umallinmi suticharqan Danielman Belteshasarta, Ananiasman Shadrakta, Mishaelman Meshakta, Azariasmantaq Abed-negota.

⁸ Danielmi ichaqa yuyaykukurqan reypa mikhunanwanpas vinonwanpas mana qhellichakunanpaq.

⁹ Diostaq umalli Aspenazwan Danielta khuyapayachispa sumaqta qhawarichirqan,

¹⁰ chaywanpas Danieltaqa nirqanmi: —Wiraqochay reytan manchakuni, paymi mikhunaykichistapas ukyanaykichistapas t'aqapurqasunkichis. Wayna-masiykichiskunaq uyanmanta aswan q'elluta uyaykichista rikuspan hinan, reyqa qankuna hawa umayta qhoruchiwanqa, nispa.

¹¹ Aspenazmi Danielpaq, Ananiaspaq, Mishaelpaq, Azariaspaqwan mayordomota churasqa. Paytan Danielqa nirqan:

¹² —Valekuykin kamachiykikunata probaykuwanaykikupaq. Chunka p'unchaynintin yuyutawan chaqallullatawan mikhuchiwayku, unullatataq ukyachiwaykupas.

¹³ Hinaspayki uyaykuta tupachinki reyman haywasqa mikhunata mikhuq waynakunaq uyantawan, hinaspa imaynatachá rikuwankiku chayman hina ruwawankiku, nispa.

¹⁴ Hinan mayordomoqa uyakurqan, hinaspan paykunata chunka p'unchayta probaykurqan.

¹⁵ Chunka p'unchaymantataq uyankuqa aswan allin aswan wira rikhurirqan, reypa t'aqapusqan mikhunata mikhuq waynakunaq uyanmantaqa.

¹⁶ Chaymi mayordomoqa paykunapaq t'aqasqa mikhunatapas ukyananku vinotapas mana qopuqñachu, aswanmi yuyuta chaqallutawan paykunaman mikhuchiq.

¹⁷ Chay tawa waynakunamanmi Diosqa qorqan yachayta, imaymana qelqakuna yachayta, imaymana entiendeytawan. Danieltaq imaymana rikhuriypa mosqoypa imachus kasqanta sut'inchayta yachaq.

¹⁸ Waynakunata pusananpaq reypa nisqan p'unchaykuna hunt'akuqtintaq, Aspenazqa paykunata Nabukodonosorman pusarqan.

¹⁹ Reytaq paykunawan rimarqan, hinan llapanku ukhupi mana hukkuna karqanchu Daniel hina, Ananías hina, Mishael hina, Azarías hina, chaymi paykunaqa reypa kamachin kapurqanku.

²⁰ Reyqa imatapas yachayta entiendeyta munaspa tapuykuspanmi, chunka kuti aswan allintaraq paykunata tarirqan suyuntinpi llapan layqakunamantapas watuqkunamantapas.

²¹ Danieltaq reypa kamachin kasharqan rey Ciroq kamachikuyta qallarisqan watakama.