AMÓS 1 - Diospa Simin Qelqa

¹ Amosqa Tekoa llaqtapi michiqmi karqan. Judá suyupi rey Uzías kamachishaqtin, Israel suyupitaq Joaspa churin rey Jeroboam kamachishaqtin, iskay wataraq pacha chhaphchikunanpaqpas kashaqtinmi, Diosqa Amosta rimaykuspa Israel suyumanta rikuchirqan. Chaymi payqa tukuy kaykunata willarqan.

² Amosmi nirqan: Señor Diosmi Sionmanta kunununumun, Jerusalenmanta manchakuyta qaparimun, michiqkunaq michinantaqmi naq'epun, Carmelo orqo patataqmi ch'akipun, nispa.

Israelpa suyu-masinkunata Diospa huchachasqan

³ Señor Diosmi nin: Damasco runakunaqa sinchitañan huchallikun, paykunataqa muchuchisaqpunin, Galaadpi tiyaqkunatan fierro kiruyoq saruchinawan sarurqanku.

⁴ Chaymi rey Hazaelpa wasinta ninawan hap'iykachisaq, rey Ben-Hadadpa qhapaq wasinkunatataq ruphaykunqa.

⁵ Damasco punkukunatan kicharparisaq, Avén wayq'opi tiyaqkunatan wañurqarichisaq, Bet-Edenpi kamachikuqtan sipirqarisaq. Siria suyu runakunapas Kirmanmi preso apasqa kanqa, nispan nin Señor Diosqa.

⁶ Señor Diosmi nin: Gaza runakunaqa sinchitañan huchallikun, paykunataqa muchuchisaqpunin, llaqtallantinta presota aparqanku Edom runakunaman kamachipaq vendenankupaq.

⁷ Chaymi Gaza muyuriq perqata ninawan hap'iykachisaq, qhapaq wasinkunatataq ruphaykunqa.

⁸ Asdodpi tiyaqkunatan wañurqarichisaq, Askalonpi kamachikuqtan sipirqosaq. Ekrón llaqtatan muchuchisaq, puchuq Filistea runapas wañunqan, nispan nin Qollana Señor Diosqa.

⁹ Señor Diosmi nin: Tiro runakunaqa sinchitañan huchallikun, paykunataqa muchuchisaqpunin, Edommanmi llaqtallantinta kamachipaq hap'iykachirqanku, wawqe pura rimanakusqankuta pisichaspanku.

¹⁰ Chaymi Tiro muyuriq perqata ninawan hap'iykachisaq, qhapaq wasinkunatataq ruphaykunqa, nispa.

¹¹ Señor Diosmi nin: Edom runakunaqa sinchitañan huchallikun, paykunataqa muchuchisaqpunin. Wawqen Israelwan ayllu kasqanta negaspan espada makintin qatiykacharqan. K'araktataq phiñapayashallarqanpuni, manataq hayk'aqpas phiñakuyninqa thanirqanchu.

¹² Chaymi Temán llaqtata ninawan hap'iykachisaq. Bosrapi qhapaq wasikunatataq ruphaykunqa, nispa.

¹³ Señor Diosmi nin: Amón runakunaqa sinchitañan huchallikun, paykunataqa muchuchisaqpunin, hallp'ankuta hatunyachinapaqmi wiksallisqa Galaad warmikunata wiksanta khallarqanku.

¹⁴ Chaymi Rabá muyuriq perqata ninawan hap'iykachisaq, qhapaq wasikunatataq ruphaykunqa, awqa-tinkuy p'unchaypi qaparkachaywan, muyuq wayra p'unchaypi manchay wayrawan.

¹⁵ Reyninpas llapa uma runakunapas wak suyuman preso rinqa, nispan nin Señor Diosqa.