လံမၧၫ့ 1 - Pwo Kayin Bible

1

¹ ၦဘၪဆၧစၧၩ့ထၬဝ့ၫ လၧယ့ၫရှူၬဎရံၬအကၠီၩ့စပီ လူၫ,ဒဲထၧၫ့ဖုဝဲခွၫစထံမၥံၫစံၭၦၥၭဘီၩ့, ဒဲၦမၩဎုၬဆၧ လၧပၥိၭစဖလံမၧၫ့လဂၩ,

² ဒဲၦၥၭဘီၩ့နးစဖဲအၫ, ဒဲၦ ၥုၭဖိၪလၧပၥိၭစအၫခံပၧၭ, ဒဲဆၧအီၪကီၪ့အီၪလၧနဂံၪ့ ဖၧၩ့နီၪ,

³ မွဲဆၧအခိးအတၩ,ဒဲဆၧဘၪလိၬအိၭလိၬ လၧပဖါယွၩ, ဒဲကဆါယ့ၫရှူၬဎရံၬအအီၪနီၪ, ဘၪနၥံၪ ဆံၭ.

စဖလံမၧၫ့အဆၧအဲၪဒဲအဆၧဆူဆၧနဲၩ.

⁴ ယနါဂၧၫ့နဆၧနဲၩ, ဒဲနအဲၪကဆါယ့ၫရှူၬ,ဒဲၦဆံၫ့ဎံၪ ကိၭဂၩဒ့ၭၥံၪအဂဲးတၭ,

⁵ ယနၪ့ထၪ့နၧၩလၧယဆၧ ဘၩဆိၪဖၪအဖၧၩ့တၭ, ယစံၭထၪ့အၪ့အူၭယွၩအခိး အတၩလထံၪဎးဘီၩ့ဎး,

⁶ ဘဲၫၥိၭဆၧန့ဎုၬနဆၧနဲၩ နီၪမိမၩဆၧလၩ့ထံးလၩ့ဆ့ၭလၧဆၧအုၩ့လၩ့ကယဲ ဆၧအဂ့ၩအီၪလၧနၥံၪအဖၧၩ့လၧယ့ၫရှူၬဎရံၬအဂး လီၫ.

⁷ အဂဲးဘဲၫယီၩထၧၫ့ဖုဝဲဧ့, ယၥုၪ့ထိၬၥၭထိၬ,ယၥုၪ့ ရှူၪယၥၭမုၬ လၧနဆၧအဲၪဆၧကွံၩအကၠီၩ့ဒိၪမၬလီၫ. အဂဲးဘဲၫယီၩ နမၩမုၬထၪ့ၦဆံၫ့ဎံၪၥံၪအၥၭလီၫ.

ဆၧအၪ့ကံၩ့အၪ့ယၫလၧစအိၫန့စမၧၭအဂး.

⁸ မၩအၥၭဘဲၫနီၪတၭ, ဘဲၫၥိၭနမိမၩဆၧလၧနကြၨၭ မၩဝ့ၫတၭ, ယအီၪက့ၪဒူၩယၥၭလၧဎရံၬအဖၧၩ့တၭ, ယမၪလူၬနၧၩအလးအီၪ,

⁹ မွဲလါနၫ့ဘိၩလၧဆၧအဲၪ အကၠီၩ့နီၪ, ၦဘၪစၧၩ့ထၬဘိၩ့နဲၪ့ယီၩ လၧယ့ၫရှူၬဎရံၬ အကၠီၩ့,ၦၥၭၡါ, ယၧၩ, စပီလူၫယီၩယအၪ့ကံၩ့အၪ့ ယၫနၧၩလီၫ.

¹⁰ ယအၪ့ကံၩ့အၪ့ယၫနၧၩလၧ ယဖိၪခွၫ စအိၫန့စမၧၭလၧယထၪ့ဖိၪဝ့ၫ, လၧယဘၪဆၧစၧၩ့ ထၬအဘိၩ့ဘၭယီၩအဂးလီၫ.

¹¹ လၧအခၪ့ထံၭလၧမီခိၬနီၪ,န့ကၩဆၧလၧနဂးအ့ၬ. အ့ၪမွဲဘိၩ့နဲၪ့ယီၩန့ကၩဆၧလၧနဂးဒဲလၧယဂးလီၫ.

¹² အဝ့ၫဒၪနီၪ ယအၪ့မၧၫ့အထဲၩ့ထဲၩ့လၧနအီၪလီၫ. မၩ အၥၭဘဲၫနီၪတၭ, ဘဲၫယနၫ့ဆါဒၪယဝ့ၫ အၥိၭထိး ဆၧၫ့အဝ့ၫဆံၭ.

¹³ ယဘၪဆၧစၧၩ့ထၬယၧၩလၧဆၧၥၭ ထိၬအပရၧၫ့အကၠီၩ့အဘိၩ့ဘၭတၭ, ယၥၭအီၪလၧအ မိယိထဲၩ့ခွါထဲၩ့ယၧၩလၧနလး,

¹⁴ မွဲလါနၫ့ဘိၩ,ဆၧ လၧနလၥ့ၪယၫဘၪနီၪ, ယလဆိၫ့မၩဘၪဆၧနးမံၩ့, မွဲ ဘဲၫၥိၭနခိးနတၩ လမိအီၪဘၪ ဘဲၫဆၧမၩဆီၪ့ဝ့ၫအ ၥိၭ,အ့ၪမွဲထီးဒၪနၥၭလီၫ.

¹⁵ အဂဲးဘဲၫယီၩဘၪလဘၪ မွဲအစဲၪ့ဖၭလၧနၧၩလဆိ ဖိၪဘဲၫနမိန့ဘၪထဲၩ့ဝ့ၫအဆိၩအကၠၪ,

¹⁶ လမွဲလၧၩ့ဘၪ ဘဲၫဎီးအၥိၭ, မွဲလၧဎီးအဖၫ့ခိၪထၧၫ့ဖုဝဲၥၭဘီၩ့, လၩ့မဲၩဒၪဆၧလၧယဂး, အ့ၪမွဲနဝ့ၫဒၪဒိၪနဲၪ့အနီၪဒံၭ လၧဖံၭလၧယၪအဖၧၩ့, ဒဲလၧကဆါအဖၧၩ့ဆ့လီၫ.

¹⁷ မၩအၥၭဘဲၫနီၪတၭ,နအ့ၪအီၪက့ၪယၧၩ လၧၦန့ဎုၬဆၧ လၧနၧၩ, ထိးဆၧၫ့အဝ့ၫဒၪဘဲၫယနၫ့ဆါအၥိၭဘီၪ.

¹⁸ အ့ၪမၩမၪနၧၩလမံၩ့မံၩ့မွဲဂ့ၩ, အ့ၪနစ့ၩအီၪလၧအစူၪ ဖၧၩ့မွဲဂ့ၩ, အီၪက့ၪထဲၩ့ဆၧနီၪလဖၪလၧ ယလီၩ့ဆံၭ.

¹⁹ ယၧၩ,စပီလူၫယကွ့ၭလၧ ယစူၪဒၪယဝ့ၫလၧ ယမိဖ့ၪ ထဲၩ့ဆၧနီၪလၧနၧၩလီၫ. ယလီၩဘၪနၧၩလၧနဒ့ၪနမါ အီၪဘဲၫၥိၭနကြၨၭဖ့ၪလၫ့ ယၧၩလၧနနၫ့ဆါဒၪနဝ့ၫယ စံၭအ့ၬ.

²⁰ မွဲယူၭ,ထၧၫ့ဖုဝဲဧ့, ဒုၭၥုၪ့ထိၬၥၭထိၬယၧၩလၧက ဆါအဖၧၩ့ဆံၭ. ဒုၭမုၬထၪ့ယၥၭ လၧဎရံၬအဖၧၩ့ ဆံၭ.

²¹ ယၥ့ၪယၫလၧနမိမၩအၪနဲၪ့ယလီၩဘၪနၧၩ တၭ, ယနဲၩလၧနမိခိၭနၪဆၧတၭ, ယကွ့ၭန့နၧၩလီၫ.

ဆၧဆိၫ့ဂ့ၩဆိၫ့ဘွၩလၧခဲၫ့ထုၬ.

²² လၧနီၪအမ့ၬယၫ တဲၩ့ဝဲၩန့အလးလၧယမိအီၪ အဂးဘီၪ. အဂဲးဘဲၫယီၩယယိလါယဝ့ၫ လၧနၥံၪဘၩ ဆိၪဖၪဆၧအကၠီၩ့တၭ, ဆၧမိဖ့ၪထဲၩ့ယၧၩလၧနၥံၪ လီၫ.

²³ ၦဘၪဆၧစၧၩ့ထၬလၧယၥိၭ လၧယ့ၫရှူၬဎရံၬအ ကၠီၩ့စအံၫပၭဖၭ,

²⁴ ဒဲၦမၩဎုၬဆၧလၧယၥိၭစမၫ ကၧၭ,စအၫရံၫစတၫခၧၭ,စဒ့မၭ,စလုကၭၥံၪနီၪ ချဲၩ့ဒုၪ့နၧၩလီၫ.

²⁵ မွဲပကဆါယ့ၫရှူၬဎရံၬ အခိးအတၩအီၪလၧနၥံၪ အၥၭအၥိၭဆံၭ. ဎအၩမံၩ့.ၭ