နးအ့စတၧၫအလံၬ. 1 - Pwo Kayin Bible

1 နးဎွၩမုၪဝၭၡတဲၫထၫ့ဒၩစဎွၩအဟၭရှုၫအံရၧၭ အဆၧကိၭ.

¹ တၭဆၧမၩအၥၭ လၧစအဟၭရှုၫအံရၧၭအမုနံၩ လဖၪ, (စအဟၭရှုၫအံရၧၭလဂၩယီၩမွဲၦပၧၩ့ဆၧလၧ အံၪ့ဒအၫဖိးလၧကုၡၫ, လၧခးအဝၩ့ၥံၪလယၩနံၫဆံၫ

² နွ့ၫဝၩ့လဖၪနီၪ,)- လၧမုနံၩလဖၪနီၪ ထီးစဎွၩအဟၭ ရှုၫအံရၧၭဆၧၫ့နၩ့ လၧအဘၩ့အမုးအလးဆီၩ့ဆီအ

³ ဖၫ့ခိၪ, လၧအအီၪလၧနီးရှုၡၫ့အဖၧၩ့နီၪ,- လၧအပၧၩ့ ဆၧၥၧၫ့နံၪ့လနံၪ့တၭ, မွဲအမၩဘိၪ့လၧအၦဒိၪဖၭဒိၪ ထီးအလူၬၥံၪ, ဒဲအခ့ၫအၡၩၥံၪအဂး, ပၧၡၫဒဲမံဒအၫ အစီၩ့အမၩ့, ဒဲၦအီၪလၧအလၩအဖၩ့ၥံၪ, ဒဲခးအဝၩ့

⁴ အၦဒိၪဖၭဒိၪၥံၪအီၪလၧအမ့ၬယၫလီၫ.- ထီးနီၪလဖၧၫ့ အဝ့ၫဒၪဒုၭနဲၪအဘၩ့အမုး လၩဖၩ့ဝ့ၫအဆၧလူဒိၪဎွ့ၩ ဒိၪလဖၪ, ဒဲအနၫ့ဆါအဆၧလၩဒိၪအဖၩ့ဒိၪ အၪနံၩ အၪၥၫ့တၭ, လၧလယၩဎိၭဆံၫၥၫ့ အထးဖၧၩ့နီၪလီၫ.

⁵ ထီးမုနံၩလဖၪနီၪလူၬတၭ, စဎွၩနီၪမၩဆၧအၪ့ဆၧ အီၩလၧကယဲၦၡၩခမျၧးၥံၪ အီၪလၧနီးရှုၡၫ့အဖၧၩ့ ထီးအလူၬအဂး, အဒိၪမွဲဂ့ၩ, အဆံၭမွဲဂ့ၩ, နွ့ၫၥၫ့အ ထးဖၧၩ့, လၧကျိၭဝၩ့ဖၧၩ့ဘၪဆဲၫ့လၧစဎွၩ အနီးနီၪ

⁶ လီၫ.- တၭဆၧလၩ့ဆဲၩလဖၪအဘွၩ, အယ့ၫ,အလၫ, စၧၩ့ထၬဝ့ၫလၧဖျံၩဆၧဘွၩဖျ့ၫလံၬကံၭ, ဒဲလုၭဖုၬလၧ ခွၩ့စ့ၩၥံၪ, ဒဲလၧလိးထုၪ့ၥံၪနီၪလီၫ. တၭလးမံၫၥံၪမွဲ ထီၫ့ဒဲစ့ၩ, အီၪလၧအလးဒၩလၩ့ဝ့ၫ လၧလိးဘဟၭအ

⁷ ဝီၩ,အလၫ,အဘွၩ, ဒဲအၥၧၫ့အဖၫ့ခိၪလီၫ.- တၭဆၧ ဖ့ၪလၫ့အီၩဆၧလၧထွ့ၫထီၫ့ၥံၪအဖၧၩ့, (ထွ့ၫၥံၪနီၪလၩ့ မဲၩလိၬအၥၭ,) လၧစဎွၩအစဘံၭထံၫအၪအၪလ့ၬ,

⁸ ဘဲၫစဎွၩအဆၧအီၪဝ့ၫအၥိၭနီၪလီၫ.- တၭဆၧအီၩဝ့ၫ နီၪမွဲဘဲၫအထူၫအရူၫအၥိၭး ၦအၪ့မၧၫ့ဆီၪ့ဝ့ၫနးဂၩ အ့ၬ.အဂဲးဘဲၫယီၩ စဎွၩမၪလူၬဂံၪ့အၦဒိၪၥံၪလၧအ ဘၪမၩဘဲၫအဘၪၦၡၩအၥၭ ကိၭဂၩဒ့ၭဆုၬဆုၬအ

⁹ ၥိၭနီၪလီၫ.- နးဎွၩမုၪဝၭၡတဲၫနီၪမၩဆၧအၪ့ဆၧအီၩ ဆ့လၧၦမုၪၥံၪအဂး, လၧစဎွၩအဂံၪ့ဘၪဆဲၫ့လၧစဎွၩ အဟၭရှုၫအံရၧၭနီၪလီၫ.

¹⁰ လၧနွ့ၫနံၩလနံၩနီၪ, ထီးစဎွၩအၥၭဎွံၫဝ့ၫလၧစဘံၭ ထံၫနီၪ,မွဲအမၪလူၬစမဟုမၫ့, စဘံဇၥၫ,စဟၫဘိနၫ, စဘံဂၥၫ,ဒဲစအဘၭဂၥၫ, စဇံၥၫဒဲစကၫကၭ, နွ့ၫဂၩ ၥံၪပၧၩ့ဒူၭလဖၪတၭ, မၩဆၧလၧစအဟၭရှုၫအံရၧၭ

¹¹ အမ့ၬယၫနီၪ,- လၧအဘၪဂဲၫၥိၫ့န့နးဎွၩမုၪဝၭၡတဲၫ လၧစဎွၩအမ့ၬယၫအီၪလၧၥရဖူၩနီၪ, ဘဲၫၥိၭအမိဒုၭ နဲၪၦခမျၧးၥံၪဒဲၦဒိၭဖၭဒိၪၥံၪ အဎံၫအလၩနီၪး အဂဲး

¹² ဘဲၫယီၩၦယိအမ့ၬအနၫနီၪဂ့ၩလ့ၬလီၫ.- မွဲလါနၫ့နးဎွၩ မုၪဝၭၡတဲၫလဂၩ, ဘဲၫစဎွၩအဆၧမၪလူၬနီၪ လၧၦ ပၧၩ့ဒူၭၥံၪအစူၪဖၧၩ့အၥိၭတၭ, ဂဲၫဝ့ၫအ့ၬ. အခိးမွဲ စဎွၩနီၪအၥၭထၪ့နၭနၭလ့ၬတၭ, အၥၭထၪ့နီၪလၩ့ဂူၬ လၧအဖၧၩ့လီၫ.

¹³ ထီးနီၪလဖၧၫ့စဎွၩစံၭ ၦလၧအကိၪ့ဆၧၥ့ၪ,လၧအ ၥ့ၪယၫဆၧအဆၧၫ့အထီ, (အဂဲးဘဲၫယီၩ စဎွၩမၩဝ့ၫ ဘဲၫနီၪလၧကယဲၦလၧအၥ့ၪယၫ ဆၧအထူၫအရူၫ,ဒဲ

¹⁴ ဆၧစ့ၩရၫ့တၭ,- ၦအီၪဘူၭလၧအဝ့ၫဒၪ, မွဲစကၫၡံနၫ, စၡံၥၫ,စအၫဒမၭၥၫ, စတၫၡံၭ,စမ့ရံၭ, စမၫစံနၫ,စမံၫ မုကၫ့,ပၧၡၫဒဲမံဒအၫ, အၦဒိၪဖၭဒိၪနွ့ၫဂၩနီၪ,ၦလၧ အဒၪဘၪစဎွၩအမ့ၬ ဒဲဆၧၫ့နၩ့လၧအလးဂ့ၩထုၬလၧ

¹⁵ ဘၩ့မုးအဖၧၩ့နီၪ,)- ဘဲၫဆၧအထူၫအရူၫအၥိၭး မွဲပ ဘၪမၩဆၧလၧနးဎွၩမုၪဝၭၡတဲၫနီၪဘဲၫၥ့ၪလဲၪ. အဂဲး ဘဲၫယီၩစဎွၩအဟၭရှုၫအံရၧၭ အဆၧမၪလူၬလၧၦ ပၧၩ့ဒူၭၥံၪအစူၪဖၧၩ့နီၪ, အဝ့ၫဒၪမၩဝ့ၫအ့ၬ.

¹⁶ တၭစမံၫမုကၫ့နီၪ ချဲၩ့ဆၧၫ့ဆၧလၧစဎွၩဒဲၦဒိၪဖၭ ဒိၪၥံၪအမ့ၬယၫ, နးဎွၩမုၪဝၭၡတဲၫနီၪမၪဘၪန့ၫစဎွၩ လဂၩကၭအ့ၬ. အ့ၪမွဲအမၪဘၪၦဒိၪဖၭဒိၪၥံၪကိၭဂၩ ဒ့ၭ,ဒဲကယဲၦခမျၧးၥံၪ လၧအအီၪလၧစဎွၩအဟၭရှုၫ

¹⁷ အံရၧၭအခးအဝၩ့လဖၪ ထီးအလူၬလီၫ.- အဂဲးဘဲၫ ယီၩနးဎွၩမုၪအဆၧမၩလမံၩ့ယီၩ မိဂၧၫ့ထၪ့ၥၩလၩ့ လၧၦမုၪၥံၪကိၭဂၩဒ့ၭတၭ, အခိးမွဲအဝ့ၫၥံၪအ့ၪနါဂၧၫ့ ဆၧနီၪလၧစဎွၩ အဟၭရှုၫအံရၧၭမၪလူၬ ၦဂဲၫၥိၫ့နး ဎွၩမုၪဝၭၡတဲၫနီၪ လၧအမ့ၬယၫလါနၫ့တၭ, အဝ့ၫဒၪ လဂဲၫဘၪး တၭအဝ့ၫၥံၪမိမၩကြၩ့ထမးအဝၩလဖၪဆ့

¹⁸ လီၫ.- ၦမုၪၥံၪဘၪဆဲၫ့လၧပၧၡၫဒဲမံဒအၫလဖၪ, မုဆၫ လနံၩယီၩ, လၧအနါဂၧၫ့ဆၧလၧနးဎွၩမုၪနီၪ မၩဝ့ၫ တၭ,မိစံၭစဎွၩ အၦဒိၪဖၭဒိၪၥံၪ ဘဲၫနီၪၥိၭဆ့လီၫ. တၭဆၧမၩကြၩ့ထမးဒဲ ဆၧၥၭထၪ့မိအီၪထၪ့အၪလၨၪ

¹⁹ လီၫ.- အ့ၪဘၪစဎွၩအၥၭ, မွဲအဒုၭဂၧၫ့ထၪ့ဆၧမၪလူၬ လမံၩ့လၧစဎွၩအစူၪဖၧၩ့နီၪ, မွဲအဘၪဆၧကွ့ၭဝ့ၫလၧ ၦပၧၡၫဖိၪ, ဒဲၦမံဒအၫဖိၪၥံၪ အထူၫအရူၫအဖၧၩ့ဘဲၫ ၥိၭအထီးဂၭဂီၩ့လဂ့ၩ လၧနးဝၭၡတဲၫနီၪထီးဂဲၫလၧၩ့ လၧစဎွၩအဟၭရှုၫအံရၧၭအမ့ၬယၫလဂ့ၩ. ဒဲအဝ့ၫ ဒၪအနးဎွၩမုၪအလးနီၪ, မွဲစဎွၩဖ့ၪလၫ့ ၦဂူၫဂၩလဂၩ

²⁰ လၧအဂ့ၩနဲၪ့အဝ့ၫနီၪဘီၪ.- တၭထီးစဎွၩအဆၧစ့ၩရၫ့ လမံၩ့နီၪအ့ၪဂၧၫ့ထၪ့ၥၩလၩ့လၧ အဘၩ့အမုးဎံၩ့လ့ၬ နီၪ, (မွဲအဖၭဒိၪဆ့) ကယဲၦမၫၥံၪမိဒူၩယၪ့အဝၩဒၪ ဝ့ၫ,အဒိၪမွဲဂ့ၩ, အဆံၭမွဲဂ့ၩ, ကိၭဂၩဒ့ၭလီၫ.

²¹ တၭဆၧချဲၩ့နီၪဘၪစဎွၩဒဲ ၦဒိၪဖၭဒိၪၥံၪအၥၭတၭ, စဎွၩမၩဝ့ၫဘဲၫစမံၫမုကၫ့ အလူအီၪဝ့ၫအၥိၭနီၪလီၫ.

²² အဂဲးဘဲၫယီၩ မွဲအဖ့ၪယူလံၬ လၧကယဲစဎွၩအခးအ ဝၩ့ထီးအလူၬနီၪ, လၧဝၩ့ဖၧၩ့ကိၭစီၪ့ဒ့ၭ ဘဲၫဆၧကွ့ၭ အၥၭအၥိၭနီၪ, ဒဲဘဲၫၦခမျၧးလဖၪအလၨအီၪဝ့ၫအ ၥိၭ,ဘဲၫၥိၭၦၡၩကိၭဂၩဒ့ၭ မိပၧၩ့အဂံၪ့ဒၪဝ့ၫဆုၬဆုၬ နီၪ,တၭမွဲအဒုၭဂၧၫ့ထၪ့ၥၩလၩ့ဝ့ၫ ဘဲၫၦခမျၧးၥံၪအ လၨအီၪဝ့ၫအၥိၭကိၭစီၪ့ဒ့ၭလီၫ.