Ruth 1 - La Sainte Bible en Langue Yipunu

Maguga mayifumba yiElimelek

¹ Va temu bansonsi bamaruma o Israel, dungosu dunsala dumaba. Dibaala, muisi Bethleem o Juda, amasogama na mugatsi andi na baana bandi babeji bababaala uyetsana o bulongu buMoab.

² Dibaala dieni, diina diandi Elimelek, diina dimugatsi andi Noemi, miina mabaana bandi bababaala Malon na Kilion; jogu bamaba bisi yifumba yiEfrata. Banotola o Moab bamayetsana.

³ Elimelek, mulumi Noemi amafu, Noemi amasiala na baana bandi babeji bababaala.

⁴ Jogu bamawela bagetu baMoab, aguna diina diandi Orpa, ususu, diina diandi Ruth; bamatsana vana yigumi yibilima.

⁵ Malon na Kilion bamafu wandi kabogu Noemi amasiala pinsa.

Ruth uweʼ ewendi na Noemi o Bethleem

⁶ Mbana Noemi amasogama na baboji bandi na ditasa ugusuga o Moab mu mbari amagulu o Moab Fumu amalingula batu bandi na amabavega biguji.

⁷ Jogu na baboji bandi bamagusuga va mbura aji bamatsaninanga na bamayenawenda o Juda.

⁸ Muna nsila, Noemi amatsingula baboji bandi rie: Gabuganu mutu mutu o ndagu nguji andi! Fumu aduvayili maboti dedi mosi nana jenu dumavayila maboti ombu jogu abamafu, nʼombu gami!

⁹ Adubuesi balumi basusu. Mbana amabaganina tumba botsu babeji yika ulila belili.

¹⁰ Jogu rie: Nesi tsiri nana, tuwenda nagu o bulongu buagu.

¹¹ Noemi amawarisa kingu andi rie: Baana bami gabuganganu! Dibandu yi duwendila nami? Nyina baana basusu abobanguga noduwela?

¹² Gabuganu baana bami! Nyimanuna ngomuewelu.

¹³ Ne diurungula uba na mukolu egugu nyusama na nyubura baana bababaala, dubaviva uduwela? Dugerondi uwelana na babaala basusu? Ngetasi. Ka muna munyongu gu nyilabi! Fumu amandiyila nsima, jenu wenu dukota muna?

¹⁴ Mbana botsu babeji bamamuelila na Orpa amaganina boji buandi; tumba Ruth asamagaru ukakana na boji buandi.

¹⁵ Noemi amatsingula Ruth rie: Pala agu amagabuga ombu batu bandi na nsambi andi. Vaga dedi mosi nandi gabuga o bulongu buagu.

¹⁶ Ruth amawaka rie: Guyansotsa ukakana nagu; agu ndeju guwenda aguna nyuwenda; agu ndeju gutsaninanga aguna nyutsaninanga. Batu bagu boba batu bami, Nsambi agu oba Nsambi ami.

¹⁷ Vana gufuila meʼ wami nyufuila vana na nyutsigu vapa wandi. Ka muna maguga ma Fumu ondasa pa nyukakana nagu! Dimosi buandi nyijabi, yika dufu dutukakasana.

¹⁸ Noemi anotsiyisa yiri Ruth agogaru ukakana nandi amamudunda.

¹⁹ Kabogu botsu babeji bamawenda va mosi te na bamatola o Bethleem; bisi musiengi banobalaba bamakambulu. Bagetu bamawivusana rie: Aguna Noemi?

²⁰ Tumba Noemi amabatsingula rie: Duyamuendengilanga Noemi, ndengilinganu Mara (divindugulu diNoemi, maboti; divindugulu diMara, digada.) Mungo mangolu motsu amandasa yika purulu na maguga.

²¹ Ava nyimawendila nyimaba na bipuela tumba Fumu amakabusa miogu na miogu. Dibandu yi dumuendengilanga Noemi? Dugelabi yiri Fumu mangolu motsu amandiyila nsima? Ka muna maguga ma nyilabingi!

²² Anana Noemi na boji buandi Ruth, muisi Moab, bamaruyila o Moab. Bamatola o Bethleem va dibandu didutsonsugu duorsa.