Dulasu 1 - La Sainte Bible en Langue Yipunu

¹ Muna muganda egugu muvu mambu ama Jesus Christ amalasa ombu Jean. Mamamuvegu na Nsambi yiri omalasa ombu basalitsi baNsambi, diwendi rie: mambu amolabana namapapa. Amasindiga yiansa yiandi uyematsingula ombu musalitsi andi Jean.

² Jean amatubula motsu ama amalaba. Muganda egugu la misamu miandi: epalisi Mbembu Nsambi na ngensa ajimamulasu na Jesus Christ

³ Ka muna ubueji gu batu abegulu mbigulu na abededili mambu amamasonu muna bolaba! Mu mbari temu aji mambu meiii molabinina jika bebeli.

Mambolu ombu yisambuali yimabundu

⁴ Menu Jean, nyisoni muganda egugu ombu yisambuali yimabundu amavu o Asie: Nsambi ojivu na omaba na oyiruyi na yisambuali yibinyunyi biandi abetsani o gusu yitsiga yiandi badugabili maboti maNsambi na duvotsu.

⁵ Na Jesus Christ aguvu mbeji jisigama na aguvu tsomi mu abafu na aguvu Fumu bakaga babutamba adugabili bionyi wandi. Jandi eturondi na ava amafuila amatugusulila masumu

⁶ na amatuvaga bavagulitsi bapagu usalila Nsambi, diwendi rie: Taji andi. Ombu Jesus Christ ubi bundumba na mangolu mutubu! Amen!

⁷ Labatianu, uruga eruyi va gari mamungi! Botsu bomulaba ne jogu abamamugomina va kurusu. Botsu bomulila. Anana diubila! Amen!

⁸ Fumu Nsambi mangolu motsu evosi rie: Menu la Alpha na Omega, diwendi rie: dibandu na disukusulu; ojivu na omaba na oyiruyi.

Jean amalaba Christ mu yiriariamu

⁹ Menu la Jean, muana taji enu na tunofubana mirima na Jesus Christ jetu nenu tuji va mosi nesi mu maguga nesi o tsi Durumu duandi nesi ava tuiwarili. Nyimaba o nyingi ajinengulungu Patmos mu mbari nyimasamuna Mambu maNsambi na ngensa aji Jesus Christ amandasa.

¹⁰ Nyimabasa nobueji mu yilumbu yiFumu ava Yinyunyi yiNsambi amakaangila na nyimagulu diufi dineni o nsima ami, nderi diufi dimumbanda.

¹¹ Dimavosa rie: Ama guilabi, masoni mu dibuku na tinda dionyi ombu yisambuali yimabundu: o Ephese no Smyme no Pergame no Thyatire no Sardes no Philadelphie no Laodicee.

¹² Nyiiriageluga ujaba anyi evosi nami. Nyinogeluga nyimalaba yisambuali yimangasa malora.

¹³ Va gari yisambuali yimangasa meni malora vamaba mutu agumaduara yilinga yisakama na munsiyi ulora va tulu.

¹⁴ Nanga tsiandi tsimaba tsivema ve nana mikondu nesi muetsa. Misu mandi mamaba nana milutsu mimuji.

¹⁵ Makulu mandi mamalula nana kunga ajipali o muji. Diufi diandi dimaba dineni nderi diufi dibivela.

¹⁶ Amagaanga yisambuali yibambuelili va dikaka diandi dimabaala na dijenga adimaba mengu yiari na yiari dimapala mu munu andi na yinsi yiandi yimalula nana ava wisi elulili va muangulu.

¹⁷ Nyinomulaba, nyimaberuga va makulu mandi nderi nyimafu kala. Amansakiga dikaka diandi dimabaala novosa rie: Guyalaba goma! Menu la agutega na agusita!

¹⁸ Nyiji monyu, nyibetsi nyifu tumba laba nyiji monyu umutubu. Nyina musuga uotsu udufu nesi mbura jiabafu.

¹⁹ Kabogu sona mambu ama guilabi: ne amavu namunyi ne amoruga o gusu.

²⁰ Gulu divindugulu diyisambuali yibambuelili va dikaka dimabaala. Na gulu wandi divindugulu diyisambuali yimangasa malora. Yisambuali yibambuelili yivu yisambuali yibilumbi biyisambuali yimabundu na yisambuali yimangasa malora yivu yisambuali yimabundu.