Hebreos 1 - Popoluca Sayula New Testament

Namáraugaja Dios iway

¹ Dios imoygʉs̈ ámbanu profetajat ma mucotsca mayo'c viaje nate̱jtat, mit tigatsigo'c iguimucotscʉs̈.

² Po en ayʉ̱́j últimu s̈ʉjwat Dios nas̈mucotscawatu ni'c namáraugaja iway. Mit Dios itumuyac iway ma pʉctsou nu'pʉjʉn, mit je' itumuwat nu'pʉjʉn itpay en ayʉ̱́j mundu.

³ Mit je' tsʉ̱nap oymanac as̈amu Dios itsʉ̱na, mit je' ni-as̈amu mit Dios. Mit je' i-actambʉ'mp nu'pʉjʉn cosajat ni'c ijtʉp poder lo que inʉmpay, mit je'yu oyau nas̈chi'tcajap nu'pʉjʉn mal nawatcaway, mit cʉs̈ nitsʉ̱nda̱jcʉu i-oyimaycʉ'ni'c Dios, mit Dios tsʉ̱nap mʉjninʉmic yucm.

Cristu más mʉjninʉmic que ángejlat

⁴ Mit Dios iway tan más mʉjninʉmic que ángejlat, ni'c Dios iguiyajcau tu'c nʉ'jy más oyninʉmicway que ángejlat, ni'c Dios iguitumuyac nu'pʉjʉn.

⁵ Dios nunca iganajawu nejʉmay ángel: Mi̱j ayé tʉ̱wáy, jinap tʉwayját ʉ̱. Mit nunca iganajawu tu'c ángel: Ʉ̱ tʉs̈te̱tjatáj je', mit je' tʉnwayjatáj.

⁶ Mit cuandu Dios igui-acmijn en ayʉ̱́j mundu iway jeme más oyninʉmicway, inʉmatu Dios ilibruni'c: Nu'pʉjʉn Dios i-ángejlat ma adora̱tca je'.

⁷ Iyacs̈ta'cway Dios inʉm nat itsʉ̱nga i-ángejlat: Ayé ángejlat iguiservia̱tcajap, mit je' i-acyo'ygʉs̈p as̈am s̈e'm, mit as̈am jʉn-ádatsic.

⁸ Po Dios inʉmey ilibruni'c nat itsʉ̱na iway: Mi̱ miDios, mimanda̱táj pa nu'pʉjʉn tiempu, mit mi̱ mimanda̱táj yacs̈ic.

⁹ Mi̱ inwamp lo que iyacs̈ta'cway mit in-amp nu'pʉjʉn ma̱jlat. Jemni'c Dios is̈cupi̱u, mit je' ayé inDios, mit ji'cp injo̱jt más que jatu'c incumpajlat.

¹⁰ Mit inʉmatu ilibruni'c: Mi̱, Señor, antes ichu̱chij nu'pʉjʉn, mi̱ inwat ayʉ̱́j mundu, mit inwat nu'pʉjʉn itpay tsajpni'c.

¹¹ Tsajp mit na̱s̈ togoygáj, po mi̱ mitamp pa siempre. Mit ayé cosajat ampayigáj as̈am tu'c jamuc icu-ampayi.

¹² Mit ayé cosajat in-apitmugáj as̈am tu'c jamuc, mit ayé tigatscap. Po mi̱ mitamp ni-as̈amu, mit nunca migacuna'wayip.

¹³ Dios inajau iway: Tsʉ̱́na mʉjninʉmic tʉn-oyimaycʉ'ni'c, hasta tʉs̈vencia̱twa'n inmutsuguijnat. Po nejʉmay ángel iganajawu we'n.

¹⁴ Ni'c ángejlat ayé espíritujat jeme mandajwatcapay, mit Dios i-acmingʉs̈p pa ma majyiga ijayajwat jeme nisalva̱tcʉjʉ́mpay.