Gálatas 1 - Popoluca Sayula New Testament

Pablo ija'ygʉs̈ap cupʉcpajyat Galaciajatway

¹ Ʉ̱ Pablo, tʉ-apóstol, mit jayajwat tʉs̈cacupiugawu pa apóstol, mit nejʉmay jayau tʉs̈cayagu pa apóstol, po tʉs̈yajcau Jesucristu mit Dios Nate̱jat jeme i-acjutucta̱cway Jesús mam itsʉ̱nga á̱nimajat.

² Nu'pʉjʉn hermanujat jeme tsʉ̱ngapay mit ʉ̱ tʉnsaluda̱tcap nu'pʉjʉn hermanujat jeme ni-apʉcmujcʉjʉpay Galaciajway na̱s̈.

³ Dios Nate̱jat mit el Señor Jesucristu pi is̈moygac favor mit paz.

⁴ Jesucristu je'yu ni-entrega̱jtʉu pa nas̈chi'tcajáj nu'pʉjʉn mal nawadcaway pa nas̈libra̱tcáj de ayʉ̱́j jinapay tiempu ma̱lway, ni'c we'n iguiwa'n Dios Nate̱jat.

⁵ Namʉjninʉ́mga Dios pa nu'pʉjʉn tiempu. Amén.

Ca-itp jatu'c oyway noticia

⁶ Tʉnigu-épijyʉp ni'c incuyaguigap jaran Dios, mit je' is̈ya̱s̈cau ni'c Cristu is̈wano'jcap, po mijchat insiguia̱tcajap jatu'c noticia tígatsicway.

⁷ Mit ca-itp jatu'c oyway noticia, po una̱c jayajwat is̈trastorna̱tcap mit iwangap iguitigatscajawa'n Cristu i-oyway noticia.

⁸ Po te ʉjtsat o te tu'c ángel tsajpni'cway is̈nʉmgajap tu'c noticia tigatsicway, mit te caje' as̈am ayé oyway noticia tʉnʉmgajaway, ma tsʉ̱na maldiciona̱tic.

⁹ As̈am tʉs̈nʉ́mgaj primeru, jinap tʉnyʉmpatu: Te tu'c jayau is̈nʉmgajap tu'c noticia jeme caje'way as̈am impʉctsougaway, ma tsʉ̱na maldiciona̱tic.

¹⁰ ¿Is̈jawiga tʉnwamp tʉs̈-amigujatcʉs̈wa'n jayajwat o Dios? ¿Is̈jawiga tʉnwamp tʉtsʉ̱nawa'n oy mit jayajwat? Te tʉnwamp tʉtsʉ̱nawa'n oy mit jayajwat, ca-oyáj tʉs̈serviá̱jta Cristu.

Ayé yos̈ iwatpay Pablo

¹¹ Hermanujat, tʉnwamp pi jawiga ni'c jayajwat igawatcawu ayé oyway noticia jeme tʉnyʉmdacyo'ypay,

¹² ne jayajwat tʉs̈camoygawu, mit nejʉmay jayau tʉs̈ca-ajque's̈awu, po tʉs̈actujawiu Jesucristu.

¹³ Inmaraugau nat tʉyo'jy ámbanu cuandu tʉs̈cupʉjc as̈am judíujat, nat tʉs̈po'ctangʉ́s̈a mʉgʉc Dios ijayajwat, mit tʉnwanate ma togoyga.

¹⁴ Mit cuandu tʉcupʉ́gate as̈am judíujat, tʉmpʉctan más may que japu̱t tʉntʉcmayna̱s̈atway jeme itcʉjʉway nije'yu s̈iwit, ni'c más tʉnwano'c ayé costumbrejat iyajcaway tʉnte̱jtat ámbanuway.

¹⁵ Mit Dios tʉs̈cupi̱u antes tʉ-itwa'n, mit tʉs̈ya̱s̈ pa tʉs̈mo'áj favor.

¹⁶ Mit cuandu Dios iguiwajn tʉs̈actu-is̈capáj iway pa tʉs̈nʉmgʉs̈awa'n jeme caje'jatway judíujat, tʉnga-ucyo'tcʉs̈u jayajwat.

¹⁷ Ne tʉganʉcs̈u Jerusalén mam itsʉ̱nga apóstojlat antes ʉ̱ tʉjajt apóstol, po tʉnʉcs̈ pa Arabiajway na̱s̈ mit tʉpitugatu pa nʉ'jcopac Damasco.

¹⁸ I-íjtʉj tu̱gup s̈iwit, tʉnʉcs̈ Jerusalén pa tʉs̈-is̈capwa'n Pedro, mit tʉtan mit je' quince s̈ʉjwat.

¹⁹ Po tʉnga-is̈u jatu'c apóstojlat, solo tʉn-is̈ Jacobo, el Señor ije̱way.

²⁰ Ayʉ̱́j tʉnja'ypay, Dios ijawip ni'c tʉgawe̱tp.

²¹ Mit cʉs̈ tʉnʉcs̈ pa Siria mit Ciliciajway na̱s̈.

²² Mit ʉ̱ tʉs̈ca-is̈capcawu ayé hermanujat jeme ni-apʉcmujcʉjʉpay Judeajway na̱s̈ jeme icupʉjcapay Cristu,

²³ solo imaraugau iguinʉmga: “Ayé jayau jeme nas̈po'ctangaway primeru, jinap inʉmdacyo'yp ni'c jayajwat ma cupʉjca Cristu, mit primeru igawanu ma cupʉjca.”

²⁴ Mit imʉjninʉmgau Dios ni'c tʉcupʉcnup.