YAKUBUS 5 - PEJANJIAN EMPAI CERITAU ILUAK

Tegughan batan endak jemau kayau

¹ Ui kamu, jemau kayau, dengaghkala katauku ini! Kamu mesti nangis berandaian, karnau kamu ka sengsarau.

² Kekayauan kamu la busuak ngan pekakas kamu la dimakan gegat.

³ Emas ngan pirak kamu la bekarat. Karattu ka nyalaka kamu, ka makan badan kamu luak api. Kamu la melungguakka retau bendau masau pengabisan ini.

⁴ Kamu nidau mbayighi upa jemau diau bekerjau di sawa kamu. Mbak kini dengaghkala sempitan jemau diau ngetam di sawa kamu. Ughangtu mintak tulung, mangku tangisan ughangtu la sampai ngan Allah, Tuhan diau Mahakuasau.

⁵ Kamu la idup miwa ngan bereruyalan di deniau ini. Kamu luak dang mbunguakka kamu batan endak aghi penyembelian.

⁶ Kamu ngukum ngan mbunua jemau diau nidau besala. Ughangtu nidau melawan kamu.

Ngalighla, amun sengsarau

⁷ Karnau itu, ngalighla, enggut Tuhan datang. Kina'ila jemau tani. Ngan ngaligh diau nantika asil diau beregau jak di umaunyau. Ngan ngaligh diau nantika pangkau ujan.

⁸ Kamu mesti ngaligh pulau ngan neguaka ati kamu, karnau Tuhan laka datang.

⁹ Jangan kamu bemumut ngan sangi salaka, mangku kamu nidau diukum. Ingatkala, akim diau ngadili kitau laka datang.

¹⁰ Ingatkala nabi diau ngiciak dalam namau Tuhan. Ughangtu ngaligh ngan ta'an sengsarau. Penaula ughangtu.

¹¹ Ughangtu dikiciakka jemau riang, karnau ughangtu beta'an. Kamu la ndengagh kengalighan Ayub ngan la keruan setu diau ahirau dienjuakka Tuhan ngan diau, karnau Tuhan penyayang ngan iluak atiAu.

¹² Diau penting sekali, jangan kamu besumpa, empuak demi sergau empuak demi deniau empuak demi tuapau kila. Kiciakka ajau “nyela”, amun nyela, ngan “nidau”, amun nidau, mangku kamu jangan diukum.

Bedu'ala batan endak jemau buidapan

¹³ Amun adau jak di kamu diau sengsarau, diau mesti bedu'a. Amun adau diau riang, diau mesti benyanyi ngagungka Allah.

¹⁴ Amun adau diau buidapan, diau mesti mantau pengulu-pengulu jemau Keristen. Mangku ughangtu ndu'aka jemau buidapantu ngan nggusu'i diau ngan minyak dalam namau Tuhan.

¹⁵ Bedu'a ngan Tuhan ngan percayau, mangku jemau buidapantu ka ghadu. Tuhan ka meghadukanyau, mangku amun diau la bedusau, dusaunyau ka diabiska.

¹⁶ Karnau itu kamu mesti sangi aku'i sala ngan sangi du'aka, mangku kamu ghadu. Du'a jemau diau benagh, amun didu'aka ngan yakin adau kuasau diau besak.

¹⁷ Elia manusiau biasau luak kitau. Diau bedu'a ngan ngenian, supayau nidau ujan. Mangku nidau nian ujan di nenggeriau selamau tenga empat taun.

¹⁸ Udim itu diau bedu'a agi, mangku adau ujan mangku umau buasil.

¹⁹ Kantin-kantinku, amun adau jak di kamu diau nidau agi ngikuti ajaghan Allah, mangku adau sughang diau mbuat jemau tadi ngulang ngan Allah,

²⁰ ingatkala, jemau diau mbuat jemau bedusau ngelipat jak di jalanau diau sesat, jemautu nyelamatka jemau diau bedusautu jak di kematian, mangku banyak dusau diabiska.