RASUL 4 - PEJANJIAN EMPAI CERITAU ILUAK

Pitrus ngan Yuhanis di adapan pengadilan agamau

¹ Penarau Pitrus ngan Yuhanis gi ngiciak ngan jemau banyaktu diau didatangi imam-imam ngan kumandan penjagau Ghuma Allah ngan jemau Saduki.

² Ughangtu mara, karnau Pitrus ngan Yuhanis ngiciakka ngan jemau banyak, bansau Yesus la diidupka jak di mati, mangku titu mbuktika, bansau jemau mati ngulang idup.

³ Ughang duautu ditangkap, mangku dimasuakka di jil. Karnau aghi laka malam, diau mendam di situ enggut pagi di aghiau.

⁴ Jak di jemau diau la ndengagh kici'an rasul tadi banyak diau percayau, mangku gegalau jemau percayau njadi limau ribu ughang.

⁵ Pagi di aghiau pengulu-pengulu ngan tuau-tuau jemau Yahudi ngan guru-guru ukum Taurat betunggal di Yerusalim

⁶ ngan Imam Besak Hanas, Kayapas, Yuhanis, Aliksandar ngan jemau lain diau temasuak pemili Imam Besaktu.

⁷ Mangku Pitrus ngan Yuhanis dibatak ngadap sidang itu, mangku diperisau ngan petanyauan ini, “Luak manau caraunyau kamu meghaduka jemau lumpua itu? Pakai kuasau apau ngan namau sapau kamu ngerjauka titu?”

⁸ Mangku katau Pitrus, “Ui, pengulu-pengulu ngan tuau-tuau bangsau kitau,

⁹ kami saghini diperisau, karnau meghaduka jemau lumpua, mangku kapu dighi endak ngeruani, luak manau titu dikerjauka.

¹⁰ Kapu dighi ngan bangsau kitau pulau mesti keruan galau, bansau jemau ini ghadu karnau kuasau Yesus Keristus, jemau Nasarit itu. Yesus itu diau la kapu dighi pakuka di kayu salip la diidupka Allah jak di mati.

¹¹ Yesus itula batu diau dicapakka tukang negakka ghuma, tukangtu kapu dighitula. Anyautu Diautula njadi batu pelapiak diau penting nian.

¹² Nidau bediau jemau lain diau pacak nyelamatka lain jak di Diautu, karnau di deniau di guak manusiau nidau bediau sughang kia diau dapat kuasau jak di Allah diau nyelamatka lain jak di Yesus Keristus.”

¹³ Jemau diau ngikut sidangtu kemangan nginak Pitrus ngan Yuhanis ngiciak ngan beghani nian, apau agi ughangtu keruan ughang duautu jemau biasau, nidau sekul, mangku ughangtu keruan, bansau ughang duautu kantin Yesus senitu.

¹⁴ Ughangtu nidau pacak ngiciakka tuapau-apau, karnau nginak jemau diau la dighadukatu betegak di guak Pitrus ngan Yuhanis.

¹⁵ Ughang tigautu diajung keluagh jak di bada sidang, mangku jemau sidangtu buijau,

¹⁶ kataunyau, “Tuapau diau ka kitau buat ngan ughangtu? Jemau di Yerusalim la keruan galau, bansau setu diau nyelia dikerjauka ughang duautu. Kitau nidau pacak ngiciakka ‘Nidau bediau’.

¹⁷ Mangku, supayau setu diau tejaditu nidau tesiar agi ke manau-manau ngan jemau banyak, mela kitau ngancam ughang duautu, supayau jangan ngiciak agi ngan sughang kia pakai namau Yesus itu.”

¹⁸ Mangku ughang duautu dipantau masuak agi, dikiciakkanyau, bansau nidau bulia agi ngiciak ngan ngajagh pakai namau Yesus.

¹⁹ Anyautu Pitrus ngan Yuhanis nimbal, “Rupuakkala ngan kapu dighi, tuapau diau benagh di adapan Allah, na'ati perinta kapu dighi, apu na'ati perinta Allah?

²⁰ Karnau kami ini nidau pacak mandak ngiciakka setu diau la kami kinak ngan diau la kami dengagh.”

²¹ Rumbungan sidangtu nidau dapat salahau endak ngukum Pitrus ngan Yuhanis. Ughangtu tamba ngancam duau rasultu mangku dilepaskanyau. Jemau banyak ngagungka Allah karnau kejadian itu.

²² Jemau diau la ghadu ngan tandau nyeliatu umurau la lebia empat pulua taun.

Jemau percayau mintak kuasau ngan Tuhan

²³ La udim dilepaska, Pitrus ngan Yuhanis pegi njenguak kantin-kantinau ngan nceritauka gegalaunyau diau la dikiciakka imam-imam ngan tuau-tuau tadi.

²⁴ Ndengagh ceritau itu, ughangtu bedu'a suati, kataunyau, “Tuhan, Dighitu njadika langit ngan deniau, laut ngan gegalau isiau.

²⁵ Ngan Rua Allah Dighi la ngiciak ngan niniak puyang kami Daud, budak Dighi. Katau Dighi, ‘Ngapau jemau diau nidau keruan Tuhan mara kematila? Ngapau bangsau-bangsau merencanauka setu diau nidau ka buasil?

²⁶ Rajau-rajau deniau bedandan endak beperang. Pengulu-pengulu betunggal endak melawan Tuhan ngan Rajau Penyelamat.’

²⁷ Nyela, rajau Herudis ngan Puntius Pilatus la betunggal di kuta ini ngan jemau diau nidau keruan Tuhan ngan jemau Israil pulau. Ughangtu melawan Yesus, Budak Dighi diau beresia, diau la Dighi tetapka njadi Rajau Penyelamat.

²⁸ Ughangtu betunggal endak ngerjauka gegalaunyau diau la Dighi tetapka jak di senitu, karnau kuasau ngan kendak Dighi.

²⁹ Mbak kini, Tuhan, kina'ila luak manau ughangtu ngancam kami. Beghanikala kami diau njadi budak Dighi ngiciakka ceritau Dighi.

³⁰ Nyataukala kuasau Dighi, mangku jemau buidapan dighaduka ngan tandau nyelia karnau kuasau namau Yesus, Budak Dighi diau beresia itu.”

³¹ La udim ughangtu bedu'a, bada ughangtu betunggal begugak, gegalau ughangtu dikuasaui Rua Allah, mangku ughangtu ngiciakka ceritau Allah ngan beghani nianan.

Carau idup jemau percayau

³² Jemau percayau suati serupu'an galau. Nidau bediau sughang kia diau bekiciak, bansau setu diau adau di diautu retaunyau diau sughang, gegalaunyau sesamau ngempuau.

³³ Ngan kuasau diau besak rasul-rasul ngiciakka ceritau Tuhan Yesus diau ngulang idup, mangku Allah iluak nian ngan gegalau ughangtu.

³⁴ Nidau bediau jemau jak di ughangtu diau kurangan, karnau gegalau jemau diau adau tana ngan ghuma dijualau, mangku tanciau dibatak,

³⁵ diserakanyau ngan rasul, mangku diagiakanyau ngan jemau diau nidau bediau.

^36-37 Luak itula pulau Yusup. Diau pulau njualka tanahau, mangku tanciau dibata'au, diserakanyau ngan rasul. Yusuptu pengadau Liwi, asalau jak di Siprus. Diau pulau diadaki Barnabas, retiau jemau diau meriangka.