RASUL 3 - PEJANJIAN EMPAI CERITAU ILUAK

Jemau lumpua pacak bejalan

¹ Adau sepetang Pitrus ngan Yuhanis pegi ke Ghuma Allah endak sembayang.

² Di situ adau sughang jemau lanang diau lumpua jak di keciak. Idang aghi jemau itu dibata'i ke situ, ditepiakka pasigh mukau lawang Ghuma Allah diau dikatauka Mukau Lawang Alap endak mintak sedeka ngan jemau diau masuak Ghuma Allah.

³ Satu jemautu nginak Pitrus ngan Yuhanis endak masuak, diau mintak sedeka ngan ughang duautu.

⁴ Ughang duautu ngina'i diau, mangku Pitrus bekatau, “Kina'ila kami!”

⁵ Mangku jemautu ngina'i ughang duautu ngaghapka sedeka.

⁶ Katau Pitrus, “Aku nidau bediau tanci dikit kiala. Anyautu tuapau diau adau di aku ka kuenjuakka ngan dighi. Ngan kuasau Yesus Keristus, jemau Nasarit itu, bejalanla!”

⁷ Mangku Pitrus ngecakka tangan kanan jemau lumpuatu, ditegakkanyau. Masau itu pulau ketingau njadi kuat nianan.

⁸ Diautu melumpat betegak ngan mulai bejalan ke situ ke sini, mangku masuak Ghuma Allah serempak ngan Pitrus ngan Yuhanis. Sampai bejalan diau melumpat-lumpat ngan ngagungka Allah.

⁹ Gegalau jemau nginak jemau diau bejalan ngan benyanyi ngagungka Allahtu,

¹⁰ mangku ughangtu jagau, bansau diau itula jemau mintak-mintak duduak pasigh Mukau Lawang Alap di Ghuma Allah. Ughangtu kemangan nian ngan kepagauan nginak setu diau la tejadi ngan diau.

Ketuba Pitrus di Ghuma Allah

¹¹ Jemau tadi maju ngikut Pitrus ngan Yuhanis, mangku gegalau jemau banyak diau kemangan itu datang ngina'i ughangtu di anggung diau benamau Anggung Salumu.

¹² Pitrus nginak jemau banyak itu mangku bekatau, “Ui, kapu dighi. Ngapau kapu dighi kemangan nginak titu? Ngapau kapu dighi ngina'i kami? Apu kapu dighi kirau, kami mbuat jemautu bejalan, karnau adau kuasau di kamini ngan kamini alim nian?

¹³ Allah niniak puyang kitau Abraham, Isak ngan Yakub la ngagungka Buda'Au Yesus. Yesus itula diau kapu dighi seraka ngan penguasau enggup nerimau Diau, empuak Pilatustu endak melepaskaNyau.

¹⁴ Diautu iluak lagi beresia. Anyautu kapu dighi enggup nerimau Diau, mangku ngajung Pilatus, supayau sughang pembunua dilepaskanyau batan endak kapu dighi.

¹⁵ Luak itula kapu dighi mbunua Diau, awuak Diautu pacak ngenjuakka idup nian ngan jemau. Allah la ngidupka Diau jak di mati. Kamini la ngina'Au mangku ngiciakkanyau.

¹⁶ Ngan kuasau namau Yesus itula jemau lumpuatu pacak bejalan. Karnau percayau ngan Yesus, mangku jemautu la ghadu ngan kuat luak kapu dighi la ngina'au.

¹⁷ Na, kapu dighi, aku keruan, kapu dighi ngan tuau-tuau kitau ngerjauka titu, karnau nidau terti tuapau diau dikerjaukatu.

¹⁸ Ngan carau luak itula la ditepati tuapau diau la dikatauka Allah senitu ngan nabiAu, mbak bansau Mesias, Rajau Penyelamat, mesti ka meghasauka sengsarau.

¹⁹ Karnau itu ubaila perembak ngan dusau kapu dighi, datangla ngan Allah, mangku dusau kapu dighi diabiskaNyau.

²⁰ Mangku kapu dighi ka diteguaka Tuhan dalam rua, mangku Yesus ka diajung njenguak kapu dighi, Yesustu diau la ditetapka njadi Rajau Penyelamat batan endak kapu dighi.

²¹ Diau mesti mendam di sergau, enggut gegalaunyau dijadika empai, luak la dikiciakka Allah ngan nabiAu diau beresia senitu.

²² Nyela, Musa la bekatau, ‘Tuhan Allah ka ngajung sughang jak di bangsau kamu njadi Nabi semegi ngan aku: Dengaghkala gegalaunyau diau dikiciakkaNyau ngan kamu.’

²³ Mangku jemau diau nidau ndengagh Nabitu ka diasingka jak di umat Allah mangku benasau.

²⁴ Nabi-nabi diau la nyampaika pesan Allah, mulai jak di nabi Samuil ngan nabi lainau diau datang udim diau, gegalaunyau ngiciakka masau ini.

²⁵ Janji-janji Allah diau la dikiciakka nabi senitu dijanjika batan endak kamu. Dalam janji diau la dibuat Allah ngan niniak puyang kitau Allah bekatau ngan Abraham luak ini, ‘Karnau pengadau kaba Aku ka iluak ngan gegalau bangsau di deniauni.’

²⁶ Itula sebapau Allah netapka Buda'Au mangku ngajung Diau datang dulu guak kapu dighi, mangku Diau iluak ngan kapu dighi ngajung kapu dighi ngubai jak di perembak diau ja'at.”