RASUL 1 - PEJANJIAN EMPAI CERITAU ILUAK

Pendulu

¹ Tiupilus diau diregaui. Di kitab aku senitu la kutulis gegalaunyau diau dikerjauka ngan diajaghka Yesus

² enggut aghi Diau tuangkat ke sergau. Antak ka Diau tuangkat, ngan kuasau Rua Allah Diau ngajung rasul-rasul diau la dipilia itu.

³ La udim Diau mati, Diau ngancakka diriAu ngan rasul itu, mangku ngan banyak carau Diau mbuktika, bansau Diau idup nian. Selamau empat pulua aghi Diau rajin ngancakka diriAu ngan nceritauka luak manau kekuasauan Allah.

⁴ Masau Diau betunggal ngan ughangtu, diajungAu luak ini, “Jangan kamu pegi jak di Yerusalim. Tunggula di sini, enggut BapakKu ngenjuakka setu diau dijanjikaNyau diau la Kukiciakka ngan kamu senitu.

⁵ Yuhanis mbaptiska ngan ayiak. Anyautu nidau lamau agi kamu ka dibaptis ngan Rua Allah.”

Yesus tuangkat ke sergau

⁶ Mangku rasul diau betunggal ngan Yesus betanyau, “Apu mbak kini Dighi endak negakka agi pemerinta bangsau Israil?”

⁷ Yesus nimbal, “BapakKu itula netapka masau ngan aghiau. Itu nidau nanti kamu keruani, karnau titu hak Bapak.

⁸ Kamuni ka nerimau kuasau, amun Rua Allah nguasaui kamu, mangku kamu ka nceritauka ngan jemau gegalaunyau diau kamu keruani ceritau Aku. Kebarka ngan kamu di Yerusalim, di gegalau Yudia ngan Samaria enggut sampai ke ujung deniau.”

⁹ La udim ngiciak luak itu Yesus tuangkat ke sergau dikina'i ughangtu, mangku adau aban ngalangi ughangtu ngina'i Diau.

¹⁰ Ughangtu gi nginak ke langit, ngina'i Diau dang tuangkattu, mangku adau duau ughang bebaju putia betegak guak ughangtu

¹¹ sampai bekatau, “Ui jemau Galilia, ngapau kamu ncungak ke langit? Yesus ini diau kamu kina'i tuangkat ke sergautu, ka ngulang agi ngan carau luak diau la kamu kina'i tadi.”

Penggenti Yudas

¹² La udim itu rasul-rasul baliak ke Yerusalim jak di bukit Saitun. Jawua bukittu kekirau sekilu jak di Yerusalim.

¹³ La sampai di kuta, ughangtu nayiak ke bada ughangtu numpang temalam. Rasul itu Pitrus, Yuhanis, Yakubus, Anderias, Pilipus, Tumas, Bartulumius, Matius, Yakubus, anak Alpius, Simun jemau Silut ngan Yudas, anak Yakubus.

¹⁴ Gegalau rumbungan itu maju seghundak ngan rajin bedu'a. Ughangtu bedu'a ngan tinau-tinau, ngan pulau Maria, mak Yesus, ngan ading-beghading Yesus.

¹⁵ Masau itu Pitrus betegak endak ngiciak ngan kantin-kantinau diau dang betunggal itu, kekirau seratus duau pulua ughang. Katau Pitrus,

¹⁶ “Ui, adiak-sanak, setu diau ditulis dalam Injil mesti tejadi. Senitu Rua Allah ngan Daud ngiciakka Yudas diau ngajung jemau nangkap Yesustu.

¹⁷ Diautu senitu kantin kitau, diau pulau dipilia bekerjau serempak ngan kitau.” –

¹⁸ Yudastu la mbeli sebidang tana ngan tanci jak di keja'atannyautu. Diau telabua teterukup, tegebur peghut laju mati.

¹⁹ Gegalau jemau di Yerusalim keruan ceritau itu. Mangku tana itu dinamauka Akaldama, retiau “Tana dagha”. –

²⁰ “Karnau di kitab Masmur ditulis luak ini, ‘Nengkela badahau njadi suni. Jangan sughang kia mendam di dalamau.’ Adau pulau ditulis luak ini, ‘Nengkela pangkatau diambiak jemau lain.’

²¹ Na, kitau mesti milia penggenti Yudas jak di ughang diau maju betunggal ngan kitau, timpau Yesus gi adau di guak kitau.

²² Jemau itu mesti seghundak ngan kitau jak di aghi Yesus dibaptis enggut Diau tuangkat ke sergau, mangku ngiciakka ngan jemau, bansau Yesus ngulang idup jak di mati.”

²³ Mangku jemau diau adau di situ milia duau ughang, diautu Matius ngan Yusup diau dinamauka pulau Barsabas ngan pulau dipantau Yustus.

²⁴ Mangku ughangtu bedu'a, kataunyau, “Tuhan, Dighi keruan gegalau ati jemau. Tunjuakkala ngan kami, sapau jak di duau ughang ini diau Dighi pilia

²⁵ batan endak penggenti Yudas diau la ninggalka tugasau ngan la mati.”

²⁶ La udim itu namau ughang duautu diundi. Diau dipilia Matias, mangku diau njadi rasul seghundak ngan sebelas rasul lain.