LUKAS 24 - PEJANJIAN EMPAI CERITAU ILUAK

Yesus ngulang idup agi

¹ Pagi di aghiau, aghi Minggu, akap-akap tinau-tinau itu pegi ke kuburan mbatak rerempahan diau la disediaukanyautu.

² Di kuburan ughangtu tekinak batu penukup kuburan la teguliak.

³ Mangku ughangtu masuak dalam kuburantu, anyautu mayat Tuhan nidau tekinak agi di situ.

⁴ Penarau ughangtu gi betegak di situ ngan bingung merupuakkanyau, adau duau ughang betegak guak ughangtu, bajuau besinagh-sinagh.

⁵ Tinau tadi takut kematila, mangku nunduak enggut ke tana. Ughang duautu bekatau, “Ngapau kamu ndala'i jemau idup di guak jemau mati?

⁶ Diautu nidau bediau di sini. Diau la ngulang idup. Ingatkala setu diau dikiciakkaNyau ngan kamu, timpau Diau gi adau di Galilia,

⁷ bansau Anak Manusiau mesti diseraka ngan jemau bedusau, dipakuka di kayu salip, mangku la duau malam Diau ka ngulang idup.”

⁸ Mangku tinautu teghingat kici'an Yesus itu.

⁹ La baliak jak di kuburan tadi, ughangtu ngiciakka gegalaunyautu ngan sebelas anak-bua Yesus ngan gegalau kantin lainau.

¹⁰ Tinau itu Maria Magdalina ngan Yuhana ngan Maria, mak Yakubus. Mangku tinau lainau diau serempak ngan tinau tadi ngiciakkanyau pulau ngan rasul-rasul.

¹¹ Anyautu rasultu sangkau kici'an tinau itu ceritau mbu'ung. Ughangtu nidau percayau ceritau tinau-tinau tadi.

¹² Empuak luak itu, Pitrus betegak belaghi ke kuburan. La sampai di kuburan, diau nyubuak ke dalam, mangku tekinak kain pembalutau ajau di situ. Pitrus kemangan mangku baliak ngan betanyau dalam atiau, tuapau diau la tejadi.

Di tenga jalan ke Imawus

¹³ Aghi itu pulau anak-bua Yesus duau ughang pegi ke dusun Imawus, kekirau bejalan duau jam jak di Yerusalim.

¹⁴ Sampai bejalan ughang duautu ngiciakka gegalaunyau diau la tejadi tadi.

¹⁵ Penarau ughangtu dang ngiciakkanyau, Yesus datang guak ughang duautu, bejalan serempak ngan ughangtu.

¹⁶ Ughang duautu nginak Yesus, anyautu adau diau ngalangi mataunyau, mangku nidau kecinauan Yesus.

¹⁷ Yesus bekatau, “Tuapau kamu kiciakka di tenga jalanni?” Mangku ughangtu mendam ngan mangut.

¹⁸ Keliupas, sughang jak di ughang duautu, nimbal, “Apu Dighi sughang jemau asing di Yerusalim diau nidau keruan setu diau tejadi di situ empai ini?”

¹⁹ “Tuapau titu?” Katau Yesus. Ughang duautu nimbal, “Setu diau tejadi ngan Yesus, jemau Nasarittu. Diau sughang nabi diau ngajagh ngan bekerjau ngan kuasau di adapan Allah ngan manusiau.

²⁰ Imam-imam bepangkat tinggi ngan tuau-tuau bangsau kitau nyeraka Diau endak diukum mati, mangku Diau la mati dipakuka di kayu salip.

²¹ Awuak kami senitu ngaghapka, bansau Diautu jemau diau ka datang endak mbibaska bangsau Israil. Mangku la duau malam jak gegalaunyautu tejadi.

²² Lagi pulau adau tinau-tinau jak di rumbungan kami diau mbuat kami tekejut. Gi akap nian tinautu la ke kuburan,

²³ anyautu mayat Yesus endiak ngina'au agi. Mangku ughangtu baliak ngiciakka, bansau ughangtu la nginak malaikat diau ngiciakka Yesus idup.

²⁴ Adau kantin kami pegi ke kuburan mangku nginak, bansau setu diau dikiciakka jemau tinau tadi nyela luak itu. Anyautu ughang duautu nidau nginak Yesus.”

²⁵ Mangku Yesus bekatau, “Ui, kamuni bigal. Kamuni lambat nian percayau gegalaunyau diau dikiciakka nabi-nabi.

²⁶ Nyela, Rajau Penyelamat mesti meghasauka sengsarau itu kudai mangku diregaui.”

²⁷ Mangku Yesus ngiciak nerangka ngan ughangtu ceritau diau ditulis di Injil ngiciakka diriAu jak di kitab Musa ngan gegalau kitab nabi.

²⁸ Laka sampai ke dusun diau endak ughang duautu tuju, Yesus luak endak maju bejalan.

²⁹ Anyautu ughang duautu ngajak nian, kataunyau, “Temalamla ngan kami, karnau aghi laka malam ngan matau-aghi laka tumban.” Mangku Yesus masuak endak temalam di bada ughangtu.

³⁰ Diau dang duduak makan serempak ngan ughangtu, Diau ngambiak ruti, bedu'a beterimau-kasia, mangku dipiya'Au rutitu, dienjuakkaNyau ngan ughangtu.

³¹ Masau itu pulau ughangtu keruan, bansau Diautu Yesus. Anyautu Diau lengit jak di guak ughangtu.

³² Katau ughangtu sughang ngan diau lain, “Nyela, ati kitau riang tadi, masau Diau ngiciak ngan kitau di tenga jalan tadi, nerangka Injil ngan kitau.”

³³ Masau itu pulau ughang duautu ngelipat ke Yerusalim. Di situ ughangtu betemu ngan sebelas anak-bua Yesus dang betunggal ngan kantin-kantinau.

³⁴ Ughangtu bekatau, “Ngenian, Tuhan idup agi. Simun la ngina'Au.”

³⁵ Mangku duau ughangtu nceritauka setu diau tejadi di tenga jalan tadi, luak manau ughangtu keruan Diau, masau Diau miyak-miyak ruti.

Anak-buahau nginak Yesus

³⁶ Ughangtu gi ngiciakka ceritau itu, Yesus betegak di guak ughangtu ngan bekatau, “Salam damai batan endak kamu!”

³⁷ Ughangtu tegagau ngan penakut, karnau sangkauannyau antu.

³⁸ Anyautu Yesus bekatau, “Ngapau kamu penakut? Ngapau asau-asau?

³⁹ Kina'ila tanganKu ngan ketingKu. Inila Aku nian. Kecakkala Aku ngan kina'ila, karnau antu nidau bedaging ngan nidau betulang luak Aku.”

⁴⁰ Sampai ngiciak luak itu, Yesus nginakka tanganAu ngan ketingAu ngan ughangtu.

⁴¹ Ughangtu masia lum percayau, karnau keriangan igau ngan kemangan, mangku Yesus betanyau, “Apu kamu adau makanan di sini?”

⁴² Mangku dienjuakka ngan Diau panggangan ikan setak.

⁴³ Yesus ngambiak ikantu, dimakanAu di adapan ughangtu.

⁴⁴ Udim itu Yesus bekatau ngan ughangtu, “Inila kici'anKu diau la Kukiciakka ngan kamu, timpau Aku gi seghundak ngan kamu, bansau gegalaunyau diau tetulis dalam kitab Taurat, kitab Nabi ngan kitab Masmur mesti tejadi.”

⁴⁵ Udim itu Yesus mbukakka rupu'an ughangtu, mangku ughangtu ngerti ceritau Injil.

⁴⁶ Katau Yesus, “Dalam Injil tetulis luak ini, ‘Mesias, Rajau Penyelamat, mesti sengsarau, mangku la duau malam ngulang idup jak di mati.’

⁴⁷ Ngan pulau, ‘Atas namau Rajau Penyelamat itu arus dikiciakka ngan gegalau bangsau, bansau manusiau mesti ngubai jak di dusaunyau, mangku Allah endak ngabiska dusaunyau.’ Ceritau itu dikiciakka mulai jak di Yerusalim.

⁴⁸ Kamunila nginak gegalaunyautu, mangku kamu mesti ngiciakkanyau.

⁴⁹ Akuni ka ngighimka ngan kamu, setu diau dijanjika BapakKu. Anyautu kamu mesti nunggu di kuta ini, enggut kamu nerimau kuasau jak di Allah.”

Yesus tuangkat ke sergau

⁵⁰ Udim itu Yesus mbata'i anak-buaHau keluagh kuta pasigh Betania. Diau nyurungka tanganAu mangku ndu'aka ughangtu.

⁵¹ Diau dang ndu'aka ughangtu, Diau tuangkat ke sergau, mangku beceghai ngan anak-buaHautu.

⁵² Ughangtu nunduak nyemba Diau. Udim itu baliak ke Yerusalim ngan injiak nian.

⁵³ Ughangtu maju betunggal di Ghuma Allah sampai ngagungka Allah.