LUKAS 18 - PEJANJIAN EMPAI CERITAU ILUAK

Ceritau randau ngan akim

¹ Udim itu Yesus ngiciakka cuntau ceritau endak ngajagh anak-buaHau, supayau ughangtu maju bedu'a jangan mura puas,

² katauNyau, “Di sebua kuta adau sughang akim diau nidau takut ngan Allah ngan nidau nyanauka jemau.

³ Di kuta itu adau pulau sughang randau diau rajin ngadap akimtu mintak pekaraunyau dibenaghka, kataunyau, ‘Tulungla aku, ngadap lawanku!’

⁴ Empai penembai akimtu enggup nulung randau itu. Anyautu udim-udimau akimtu berupuak, ‘Empuak aku nidau takut ngan Allah lagi nidau nyanauka jemau,

⁵ tapitu randau ini maju datang nyusaka aku, iluakla aku nulung diau. Amun nidau, diau ka maju datang ngeriaka aku!’ ”

⁶ Mangku Tuhan bekatau, “Peratikala setu diau dikiciakka akim diau nidau adil itu!

⁷ Apu Allah nidau ka mbenaghka umatAu diau mintak ngan Diau siang-malam? Apu Diau melambatka masau endak nulung ughangtu?

⁸ Percayaula, Diau ka cepat mbenaghka pekarau ughangtu. Anyautu amun Anak Manusiau datang, apu gi adau jemau di deniauni percayau ngan Diau?”

Ceritau jemau Parisi ngan tukang tagia cuki

⁹ Ceritau ini diceritauka Yesus ngan jemau diau nganggap diriau nidau besala ngan nganggap diriau lebia jak di jemau lain.

¹⁰ Katau Yesus, “Adau ughang duau diau pegi ke Ghuma Allah endak bedu'a. Sughang jak di rumbungan jemau Parisi, sughang tukang tagia cuki.

¹¹ Jemau Parisitu betegak ngadap Allah ngan bedu'a dalam atiau, ‘Allah, aku beterimau-kasia, karnau aku nidau luak jemau lain diau selak, nidau jujur, menaugawia, ngan pulau nidau luak tukang tagia cuki itu.

¹² Akuni puasau duau kali seminggu, ngan pulau ngenjuakka ngan Dighi bagi sepulua sebagi jak di gegalau asilku.’

¹³ Anyautu tukang tagia cuki tadi betegak jejawua ngan nidau pulau beghani ncungak ke langit, sampai mbaduk pala'au diau bekatau, ‘Allah, kesianila akuni, jemau bedusau.’

¹⁴ Nyela nian,” katau Yesus, “Tukang tagia cuki itu baliak ke ghumahau la diterimau Allah, ukan jemau Parisi tadi. Karnau jemau diau nganggap diriau lebia jak di jemau lain nidau ka diregaui. Mangku jemau diau ngensian ka diregaui.”

Yesus sayang ngan budak-budak keciak

¹⁵ Mangku adau pulau jemau diau mbatak anak-ana'au diau gi keciak njenguak Yesus, supayau Diau natap budak-budak keciaktu. Nginak itu anak-buaHau marai ughangtu.

¹⁶ Anyautu Yesus mantau ughangtu mangku bekatau, “Nengkela budak-budak keciak datang njenguak Aku. Jangan dialangi, karnau jemau luak inila Allah pacak njadi rajau dalam idupau.

¹⁷ Ingatkala! Jemau diau nidau nerimau Allah njadi rajau dalam idupau luluak sughang budak keciak diau nidau ka temasuak umat Allah.”

Jemau kayau

¹⁸ Adau sughang pengulu jemau Yahudi, diau betanyau ngan Yesus, kataunyau, “Pak Guru diau iluak, tuapau diau mesti kukerjauka, mangku bulia idup selelamaunyau?”

¹⁹ Timbal Yesus, “Ngapau kaba ngiciakka Aku iluak? Nidau bediau diau iluak lain jak di Allah.

²⁰ Cengki kaba la keruan gegalau perinta Allah: Jangan menaugawia, jangan mbunua, jangan maling, jangan mbu'ung, regauila enduak-bapak kamu.”

²¹ Katau jemautu. “Gegalau perinta itu la kuturuti jak di keciak.”

²² Ndengagh kici'annyautu Yesus bekatau, “Masia adau semecam agi diau mesti kaba kerjauka: Jualkala gegalau retau kaba, enjuakka tanciautu ngan jemau serik, mangku kaba ka bulia retau di sergau. La udim itu datangla ke sini ngikut Aku.”

²³ Ndengagh kici'anNyautu jemau itu kebingungan, karnau diau kayau nian.

²⁴ Mangku Yesus ngina'i jemautu ngan bekatau, “Alaka segaunyau jemau kayau nerimau Allah njadi rajau dalam idupau.

²⁵ Murala sikuak untau masuak tebuak jaghum sangkan jemau kayau masuak sergau.”

²⁶ Mangku jemau diau ndengagh kici'an Yesus itu betanyau, “Amun luak itu, sapau diau pacak selamat?”

²⁷ Yesus bekatau, “Setu diau nidau pacak dikerjauka manusiau pacak dikerjauka Allah.”

Upa ngikut Yesus

²⁸ Pitrus bekatau, “Kina'ila, kamini la ninggalka gegalau retau kami endak ngikut Dighi.”

²⁹ “Percayaula,” katau Yesus, “Jemau diau ninggalka ghumahau, biniau, ading-beghadingau, pejadiau, anak-ana'au, karnau ta'at ngan Allah,

³⁰ jemautu ka nerimau agi lipat gandau masau ini pulau, mangku masau diau ka datang diau ka nerimau idup selelamaunyau.”

Ketigau kaliau Yesus ngiciakka penanggunganNyau

³¹ Yesus mantau duau belas anak-buaHau mangku bekatau ngan ughangtu, “Dengaghkala, mbak kini kitau ngancamka Yerusalim, mangku gegalaunyau diau ditulis nabi-nabi ceritau Anak Manusiau ka ditepati.

³² Diau ka diseraka ngan jemau diau nidau takut ngan Allah. Diau ka dipusiakka, digelakka, diludai,

³³ mangku dibaduki ngan dibunua. Mangku la duau malam Diau ka idup agi.”

³⁴ Anak-buaHau dikit kia nidau terti gegalaunyautu. Reti kici'anNyau tadi diresiauka ngan ughangtu. Ughangtu nidau keruan tuapau diau dikiciakkaNyautu.

Jemau butau di Yiriku dighadui

³⁵ Yesus laka sampai di Yiriku. Di situ adau sughang butau dang duduak mintak-mintak di jalan.

³⁶ Satu diau ndengagh jemau banyak lalu, diau betanyau, “Ngapau ramitu?”

³⁷ Katau ughangtu, “Yesus, jemau Nasarit, lalu.”

³⁸ Mangku jemau butautu tegauk, kataunyau, “Yesus, Anak Daud, sialkala aku!”

³⁹ Ughang diau bejalan di adapanNyau mara ngajung diau diam. Tapitu diau tamba tegauk agi, “Anak Daud, sialkala aku!”

⁴⁰ Yesus gheghadu ngan ngajung jemau butautu dibatak guak Diau mangku betanyau,

⁴¹ “Tuapau kekenda'an kaba?” Jemau itu nimbal, “Tuhan, aku endak pacak nginak agi.”

⁴² Mangku Yesus bekatau, “Nginakla kaba! Kaba la ghadu, karnau kaba percayau.”

⁴³ Masau itu pulau jemautu pacak nginak, mangku diau ngikut Yesus sampai beterimau-kasia ngan Allah. Jemau banyak diau nginak titu ngagungka Allah pulau.