LUKAS 16 - PEJANJIAN EMPAI CERITAU ILUAK

Tukang nyimpani tanci diau buakal

¹ Yesus ngiciak ngan anak-buaHau, katauNyau, “Adau sughang jemau kayau diau adau tukang nyimpani tanci. Jemau kayau itu ndengagh kici'an, mbak bansau tukang nyimpani tanci tadi ngabiska tanciau.

² Mangku diau mantau tukang nyimpani tancitu, mangku bekatau ngan diau, ‘Aku la ndengagh ceritau kaba. Mbak kini tulisla galau diau masuak diau ngeluagh, mangku serakala ngan aku. Kaba endiak pacak agi njadi tukang nyimpani tanciku.’

³ Tukang nyimpani tancitu berupuak, ‘Tuapau diau kukerjauka mbak kini? Tuanku endak mandakka aku jak di kerjauku. Mangkugh? Aku endiak kuat. Mintak-mintak? Aku maluan.

⁴ Adau akalku, mangku amun aku dipecat jak di kerjauku nyimpani tanci, adau kawan diau ka nerimau aku di ghumahau.’

⁵ Mangku tukang nyimpani tancitu mantau bilang jemau diau beghutang ngan tuanau. Ngan diau dulu sekali diau betanyau, ‘Beghapau kaba beghutang ngan tuanku?’

⁶ Jemautu nimbal, ‘Seratus guci minyak manis.’ Mangku diau bekatau ngan jemautu, ‘Ini surat utang kaba. Tulisla cecepat limau pulua.’

⁷ Mangku diau betanyau ngan diau lain, ‘Beghapau utang kaba?’ Timbal jemautu, ‘Seratus pikul beghas.’ Diau bekatau ngan jemautu, ‘Inila surat utang kaba. Tulisla delapan pulua.’

⁸ Mangku tuanau tadi muji tukang nyimpani tanciau diau nidau jujurtu, karnau diau buakal. Karnau pacakla jemau deniauni bekundang ngan jemau sangkan jemau diau idup dalam terang.

⁹ Dengaghkala katauKu ini: Pakaila kekayauan deniauni, mangku bulia kantin, mangku amun tancitu nidau begati agi, kamu diterimau di bada jemau mendam selelamaunyau.

¹⁰ Jemau diau pacak dipercayaui kerjau diau keciak, pacak pulau dipercayaui kerjau diau besak. Jemau diau nidau jujur ngan kerjau diau keciak, jemautu nidau pulau jujur ngan kerjau diau besak.

¹¹ Mangku amun ngan kekayauan deniauni kamu nidau pacak dipercayaui, sapau ka endak nyeraka ngan kamu kekayauan diau di sergau?

¹² Amun kamu nidau pacak dipercayaui ngan retau jemau lain, sapau ka nyeraka hak kamutu ngan kamu?

¹³ Nidau sughang kia pacak bekerjau ngan duau jemau, karnau diau ka sayang ngan diau sughang ngan luat ngan diau lain. Diau ka setia ngan diau sughang ngan melalaika kerjau diau lain. Luak itu pulau ngan kamu. Kamu nidau pacak bekerjau batan endak Allah, batan endak retau bendau pulau.”

Yesus nengul jemau Parisi

¹⁴ Jemau Parisi ndengagh gegalaunyau diau dikiciakka Yesus, mangku nawaukaNyau, karnau ughangtu galak tanci.

¹⁵ Mangku Yesus bekatau ngan ughangtu, “Kapu dighini jemau diau endak kina'an benagh di mukau jemau, anyautu Allah keruan isi ati kapu dighi. Karnau setu diau dianggap manusiau iluak diluatka Allah.

¹⁶ Ukum Taurat ngan kitab nabi dituruti enggut masau Yuhanis datang. Jak masau itu ceritau iluak, mbak bansau Allah njadi rajau, maju dikiciakka, mangku jemau endak masau temasuak umat Allah.

¹⁷ Murala langit ngan deniau lengit sangkan sutiak urup dalam ukum Allah dilengitka.

¹⁸ Jemau diau nyagha'i biniau mangku bebunting ngan jemau lain jemautu bebuat ja'at. Jemau diau nika ngan tinau diau la disagha'i bebuat ja'at pulau.”

Jemau kayau ngan Lasarus

¹⁹ “Adau sughang jemau kayau. Diau bebaju alap diau besak regaunyau. Idupau bereruyalan idang aghi.

²⁰ Di mukau duaghau ghumahau adau sughang mintak-mintak, namaunyau Lasarus. Badanau penua ngan bagha.

²¹ Diau endak ngisi busungau ngan ghima diau tumban jak di mija jemau kayau tadi. Lagi anjing datang njilat baghahautu.

²² Jemau serik-sarau itu mati, mangku dibata'i malaikat di guak Abraham. Jemau kayau tadi mati pulau, mangku dikuburka.

²³ Di bada jemau mati diau sengsarau nian. Mangku diau nginak ke atas. Jak di jawua diau nginak Lasarus adau guak Abraham.

²⁴ Mangku diau mintak tulung nian, kataunyau, ‘Bapak Abraham, sialkala aku! Ajungla Lasarus masuakka jaghiau ke ayiak mangku datang mbasai lidaku, karnau aku nanggung nian dalam api ini.’

²⁵ Abraham nimbal, ‘Ingatkala anakku, seumur idup kaba la meghasauka gegalaunyau diau lemak. Lasarus meghasauka gegalau diau madak. Mbak kini diau riang di sini, kaba sengsarau.

²⁶ Lagi di entaghau kaba ngan kami adau badas diau dalam nian, mangku jemau jak di sini nidau pacak ke situ, jemau jak di situ nidau pacak ke sini.’

²⁷ ‘Amun luak itu,’ katau jemau kayautu, ‘Aku mintak nian dighi ngajung Lasarus ke ghuma bak kami.

²⁸ Adau limau beghading agi di ghuma. Ajungka Lasarus ngingatka ughangtu, supayau jangan masuak ke bada sengsarau ini.’

²⁹ Abraham bekatau, ‘Ughangtu la adau kitab Musa ngan kitab nabi-nabi. Nengkela ughangtu nuruti setu diau ditulis dalam kitabtu.’

³⁰ Jemau kayautu nimbal, ‘Itu endiak cukup, Bapak Abraham. Anyautu amun adau jemau datang jak di jemau mati, ughangtu ka ngubai jak di dusaunyau.’

³¹ Anyautu Abraham bekatau, ‘Amun ughangtu nidau nuruti perinta Musa ngan nabi-nabi, cengki ughangtu nidau ka percayau pulau, empuak adau jemau mati ka idup agi.’ ”