LUKAS 13 - PEJANJIAN EMPAI CERITAU ILUAK

Amun nidau ngubai jak di dusau, nanti benasau

¹ Masau itu adau jemau ngiciakka ngan Yesus ceritau jemau Galilia diau dibunua Pilatus, masau ughangtu dang bekerban ngan Allah.

² Mangku Diau ngiciak ngan ughangtu, “Kamu sangkau, ughangtu dibunua luak itu mbuktika, besakla dusau ughangtu sangkan gegalau jemau Galilia diau lain.

³ Nidau nian. Anyautu ingatkala, amun kamu nidau ngubai jak di dusau, gegalau kamu ka mati luak ughangtu.

⁴ Luak manau pulau ngan delapan belas ughang diau mati ditinggang mubungan ghuma besak pasigh Siluam? Kamu sangkau besakla dusau ughangtu jak di gegalau jemau di Yerusalim.

⁵ Nidau nian. Sekali agi Kukiciakka, amun kamu nidau ngubai jak di dusau kamu, kamu ka mati galau luak ughangtu.”

Cuntau ceritau batang aghau diau nidau bebua

⁶ Mangku Yesus nceritauka cuntau ceritau ini, “Adau jemau diau nanam sebatang aghau di kebunau. Mangku jemautu pegi ndala'i bua di batang aghautu, anyautu nidau bulia sebua kia.

⁷ Mangku diau ngiciak ngan tukang sayia kebunau, ‘Kina'ila, la tigau taun aku ndala'i bua aghau di batang ini, anyautu nidau bulia sebua kia. Tebangla ajau aghau ini. Batan tuapau diau idup endiak bediau gatiau.’

⁸ Timbal tukang kebun, ‘Enangka diau idup setaun agi. Aku ka mangkughi tana di sekitarau ngan mupu'au.

⁹ Asauku taun di mukau ka bebua. Amun nidau, aku ka nebangau.’ ”

Yesus meghadui jemau tinau bungkuak aghi Sabat

¹⁰ Adau saghi aghi Sabat, Yesus ngajagh di ghuma sembayang.

¹¹ Di situ adau sughang jemau tinau diau la delapan belas taun buidapan. Adau rua ja'at di diau, mangku jemau tinautu la bungkuak, nidau pacak betegak agi.

¹² Satu Yesus nginak tinau itu, dipantauNyau, dikiciakka ngan diau, katauNyau, “Idapan dighi la ghadu.”

¹³ Mangku Yesus nepiakka tanganAu di palak tinau itu. Masau itu pulau tinautu betegak lughus, mangku ngagungka Allah.

¹⁴ Kepalak ghuma sembayang itu mara, karnau Yesus meghadui jemau aghi Sabat. Mangku diau bekatau ngan ughang banyaktu, “Adau enam aghi batan endak bekerjau. Amun endak dighaduka, datangla aghi itu, jangan aghi Sabat.”

¹⁵ Tuhan nimbal, “Kapu dighini cak alim! Ukanau kapu dighi meluputka sapi jak di sangkarannyau aghi Sabat, mangku diau pacak minum?

¹⁶ Di sini adau sughang tinau, pengadau Abraham, diau la delapan belas taun dikuasaui iblis. Apu diau nidau bulia dibibaska jak di iblistu aghi Sabat?”

¹⁷ Timbal Yesustu mbuat gegalau musua Yesus maluan nian. Gegalau jemau banyak lain injiak, karnau gegalau kerjau nyelia diau dikerjauka Yesustu.

Ceritau mulan sawi

¹⁸ Mangku Yesus bekatau, “Amun Allah merinta luak manau keadaannyau? Ngan tuapau Aku pacak nyamaukanyau?

¹⁹ Diau umpamau mulan sawi diau tumban di tana. Mulantu tumbua, njadi batang besak, mangku burung-burung mbuat saghang di cangkahau.”

Ceritau ghagi

²⁰ Yesus bekatau agi, “Amun Allah merinta, ngan tuapau aku pacak nyamaukanyau?

²¹ Diau luak ghagi diau diambiak sughang tinau, diundakka ngan ghebuak sekaling enggut kembang.”

Duaghau diau supit

²² Yesus melajuka pejalananNyau ke Yerusalim, Diau melalui kuta ngan dusun sampai ngajagh.

²³ Mangku adau jemau diau betanyau, “Apu gi dikit ajau jemau diau ka diselamatka?”

²⁴ Yesus nimbal, “Beusahala, mangku masuak jalan duaghau supit, karnau ingatkala, banyak jemau ncubau endak masuak, anyautu nidau pacak.

²⁵ Amun tuan ghuma la ngunci duaghau, kamu ka betegak di luagh sampai nggagur duaghau ngan bekatau, ‘Tuan, buka'ila kami duaghau!’ Mangku diau ka nimbal, ‘Aku nidau keruan kamu jak di manau.’

²⁶ Kamu ka nimbal, ‘Kami la makan serempak ngan dighi. Dighi la ngajagh di dusun kami.’

²⁷ Anyautu tuan itu ka bekatau agi, ‘Aku nidau keruan kamu jak di manau. Pegila jak di sini, kamu diau ngerjauka setu diau ja'at!’

²⁸ Kamu ka nginak Abraham, Isak ngan Yakub ngan gegalau nabi keriangan di sergau, mangku kamu ka nangis ngan nerinit gigi, karnau purik kamu dilaratka keluagh.

²⁹ Jemau bangsau lain ka datang jak di sebela matau-aghi idup sebela matau-aghi tumban, jak di utara ngan selatan, mangku ka duduak makan di sergau.

³⁰ Ngenian, adau jemau diau mendian ka njadi dulu sekali, adau jemau diau dulu sekali ka njadi mendian.”

Yesus ka mati di Yerusalim

³¹ Masau itu pulau adau jemau Parisi datang ngiciak ngan Yesus, kataunyau, “Jangan mendam di sini. Pegila ke bada lain, karnau Herudis endak mbunua Kaba.”

³² Yesus nimbal, “Pegila, kiciakka ngan jemau calak itu, ‘Aku ngisitka iblis ngan meghadui jemau buidapan mbak kini ngan pagi. Mangku lusau Aku ka ngudimi kerjauKu.’

³³ Anyautu saghini, pagi ngan lusau Aku mesti neruska pejalananKu, karnau nidau pantas sughang nabi dibunua di luagh Yerusalim.

³⁴ Ui jemau Yerusalim, nabi-nabi kamu bunua, ajungan Allah kamu sipati ngan batu enggut mati. La rajin aku endak nunggalka kamu, luak bai ayam nunggalka ana'au meghekupi di bawa sayapau, anyautu kamu enggup.

³⁵ Ngenian, itula sebapau Allah nidau agi guak kamu. Keruanila, mulai mbak kini kamu nidau ka nginak Aku agi, antak ka kamu bekatau, ‘Tepujila Jemau diau datang dalam namau Tuhan!’ ”