LUKAS 10 - PEJANJIAN EMPAI CERITAU ILUAK

Yesus ngajung tujua pulua anak-bua lainau

¹ La udim itu Tuhan milia tujua pulua anak-bua agi, diajungAu pegi beduau-duau nduluiNyau ke bilang kuta bilang dusun diau endak dijengu'Au.

² Diau bekatau ngan ughangtu, “Sawa libagh, jemau ngetam dikit. Karnau itu pintakla ngan Allah diau ngempu sawa, mangku Diau ngajung jemau ngetami padiAu.

³ Bejalanla, Aku ngajung kamu pegi luluak anak bebiri pegi di pugan setuau.

⁴ Kamu mbatak tanci jangan, mbatak unjut jangan, mbatak terumpa jangan. Jangan gheghadu ngiciak ngan sughang kia di tenga jalan.

⁵ Amun masuak ghuma, kiciakka kudai, ‘Salam damai batan endak ghuma ini.’

⁶ Amun di situ adau jemau diau endak nerimau salam damaitu, mangku damaitu ka maju mendam ngan diau. Amun endiak bediau, damaitu ka ngulang ke kamu.

⁷ Mendamla di ghuma itu, makanla tuapau diau dienjuakka ngan kamu, karnau jemau diau bekerjau pantas nerimau upa. Jangan ngalia ghuma.

⁸ Amun kamu masuak kuta, mangku di situ kamu iluak diterimau, makanla tuapau diau ditepiakka ngan kamu.

⁹ Mangku ghaduila jemau buidapan di kuta itu, kiciakkala ngan jemau di situ, ‘Allah laka merinta njadi rajau kamu.’

¹⁰ Anyautu amun kamu masuak kuta, mangku nidau diterimau jemau, pegila ke jalan kuta itu, kiciakkala,

¹¹ ‘Debu kuta kamu diau melekat di keting kami, kami kepaska njadi peringatan batan endak kamu. Anyautu keruanila, Allah endak merinta.’

¹² Ingatkala, masau aghi kiamat banyakla tanggungan jemau kuta itu sangkan jemau Sudum.”

Kuta-kuta diau enggup percayau

¹³ “Celakaula kamu, jemau Kurasim! Celakaula kamu, jemau Betsaida. Misalau tandau nyelia diau dikerjauka guak kamu dikerjauka di Tirus ngan Sidun, cengki ughangtu la lamau ngubai peremba'au ngan mbaduki pala'au.

¹⁴ Masau aghi kiamat banyakla tanggungan kamu sangkan tanggungan jemau Tirus ngan Sidun.

¹⁵ Mangku kamu, jemau Kapernaum, apu kamu sangkau kamu ka ditinggika ke sergau? Nidau! Kamu ka dicapakka ke nerakau.”

¹⁶ Mangku Yesus bekatau ngan anak-buaHau, “Jemau diau ndengaghka kamu ndengagh Aku. Jemau diau nidau nerimau kamu nidau nerimau Aku, mangku jemau diau nidau nerimau Aku, nidau pulau nerimau Allah diau ngajung Aku.”

Tujua pulua anak-buaHau la baliak

¹⁷ Tujua pulua anak-buaHautu baliak ngan riang nian sampai bekatau, “Tuhan, iblis pulau tunduak ngan kami, amun kami perintaka makai namau Dighi.”

¹⁸ Yesus nimbal, “Aku nginak pengulu iblis umban jak di langit luluak kilat.

¹⁹ Ingatkala, Aku la ngenjuakka kuasau ngan kamu mijakka ulagh ngan kalau, nguasaui gegalau musua, nidau bediau diau pacak ncelakauka kamu.

²⁰ Empuak luak itu, jangan kamu keinji'an, karnau iblis tunduak ngan kamu. Iluakla kamu injiak, karnau namau kamu la tecatat di sergau.”

Yesus ngagungka Allah

²¹ Masau itu pulau Yesus injiak nianan, karnau dikuasaui Rua Allah sampai bekatau, “Bak, Aku ngagungka Dighi, Tuhan langit ngan deniau, karnau gegalaunyautu Dighi resiauka ngan jemau pintar ngan jemau beilmu. Anyautu Dighi nyataukanyau ngan jemau biasau. Itula diau melemakka ati Dighi.

²² Gegalaunyau la dienjuakka Bapak ngan Aku. Nidau bediau sughang kia diau keruan Anak lain jak di Bapak. Nidau bediau pulau diau keruan Bapak lain jak di Anak ngan jemau diau dikenda'i Anak itu nyataukanyau.”

²³ Udim itu Yesus nulia ke anak-buaHau sampai bekatau ngan ughangtu ajau, “Riangla jemau diau nginak setu diau kamu kinak.

²⁴ Ingatkala, banyak nabi ngan rajau endak nginak setu diau kamu kinak, anyautu nidau kina'an. Ughangtu endak ndengagh setu diau kamu dengagh, anyautu nidau kedengaghan.”

Ceritau jemau Samaria diau iluak atiau

²⁵ Mangku adau sughang guru ukum Taurat datang endak nguji Yesus ngan betanyau, “Guru, tuapau diau mesti kukerjauka, mangku bulia idup selelamaunyau?”

²⁶ Yesus nimbal, “Tuapau ditulis di Injil? Tuapau dighi bacau?”

²⁷ Katau jemautu, “Sayangila Tuhan, Allah kaba ngan sepenua ati kaba, ngan segenap jiwa kaba, ngan segenap kekuatan kaba, ngan segenap akal-budi kaba. Mangku sayangila kantin kaba luak kaba nyayangi diri kaba.”

²⁸ Katau Yesus, “Timbal dighitu benagh. Kerjaukala titu, mangku dighi ka idup.”

²⁹ Anyautu jemau tadi endak mbenaghka diriau, mangku diau betanyau, “Sapau kantinkutu?”

³⁰ Katau Yesus, “Adau sughang jemau diau tughun jak di Yerusalim ke Yiriku. Di tenga jalan diau disamun bandit, diambi'inyau gegalau dandanannyau, dilagauinyau, mangku diau laka mati ditinggalkanyau.

³¹ Betepatan adau sughang imam diau tughun pulau di situ. Diau nginak jemau itu, anyautu diau nyimpang.

³² Luak itu pulau sughang jemau pengadau Liwi sampai di guak bada jemau lukau tadi. Satu diau nginak jemautu, diau nyimpang pulau.

³³ La udim itu adau sughang jemau Samaria dang bejalan sampai ke bada tadi. Mangku satu diau nginak jemau itu tadi, terupuak sial di atiau,

³⁴ mangku dijengu'au jemautu, diubatinyau lukaunyau ngan minyak ngan anggur, mangku dibalutau. La udim itu dinayiakkanyau jemautu ke kudaunyau, mangku dibata'au ke bada jemau temalam ngan disayiau.

³⁵ Pagi di aghiau diau ngenjuakka tanci ngan jemau ngempu ghuma badahau temalam tadi ngan bekatau, ‘Sayiala diauni. Amun tanci ini lum cukup, aku nambainyau, amun aku ngelipat ke sini nanti.’ ”

³⁶ Mangku Yesus ngudimi ceritauNyau ngan betanyau, “Pendapat dighi, sapau jak di ughang tigau itu njadi kantin batan endak jemau diau disamun itu?”

³⁷ Jemautu nimbal, “Jemau diau la nulung jemau tadi.” Katau Yesus, “Pegila, kerjaukala luak itu pulau!”

Marta ngan Maria

³⁸ Yesus ngan anak-buaHau melajuka pejalanannyau, mangku Diau sampai di sebua dusun. Di situ adau jemau tinau, namaunyau Marta. Martatu ngajak Diau ke ghumahau.

³⁹ Marta adau ading tinau benamau Maria. Mariatu duduak guak Yesus ndengaghka kici'anNyau.

⁴⁰ Anyautu Marta banyak kerjau nepi'i mendahautu. Diau masighi Yesus sampai bekatau, “Apu Dighi endiak nyanauka adingku ngenangka aku sughang bekerjau? Ajungla diau nulungi aku.”

⁴¹ “Ui Marta,” katau Yesus, “Kaba ghegak ngan merupuakka ini-itu.

⁴² Sutiak diau penting. Maria la milia diau iluak diau nidau ka diambiak jak di diau.”