LUKAS 1 - PEJANJIAN EMPAI CERITAU ILUAK

Penduluannyau

¹ Tiupilus diau diregaui. Banyak jemau la nulis ceritau diau la tejadi guak kitau.

² Ughangtu nulis luak diau diceritauka ngan kitau jak di jemau diau la nginak nian ceritau itu tejadi jak di penembaiau, mangku disiarkanyau.

³ La udim diperisau galau neghagi nian jak di penembaiau, pendapatku iluak, amun aku pulau endak nuliska ceritau itu batan endak dighi.

⁴ Mangku dighi keruan, bansau gegalaunyau diau diajaghka ngan dighi benagh nian.

Ceritau Yuhanis Pembaptis ka lahir

⁵ Timpau rajau Herudis merinta nenggeri Yudia, adau sughang imam jak di rumbungan Abia, namaunyau Sakaria. Biniau pulau asalau jak di pengadau Harun, namaunyau Elisabet.

⁶ Ughang duautu melemakka ati Allah, ta'at nian ngan gegalau perinta ngan ukum Tuhan.

⁷ Anyautu ughang duautu nidau bediau anak, awuak ughang duautu la tuau.

⁸ Adau saghi masau rumbungan Abia betugas, Sakaria ngerjauka tugasau imam di adapan Allah.

⁹ Biasaunyau imam-imam nyuntinka endak milia imam diau betugas. Udim disuntinka, Sakaria ditunjuak masuak Ghuma Allah endak nyilap keminyan.

¹⁰ Keminyantu dang disilap, gegalau jemau betunggal di luagh endak sembayang.

¹¹ Penarau itula Sakaria kina'an malaikat Tuhan. Malaikattu betegak di sebela kanan mija bada nyilap keminyan.

¹² Nginak malaikattu, Sakaria tegagau lagi penakut.

¹³ Anyautu malaikat tadi bekatau, “Ui, Sakaria, nidau endak takut, karnau Allah la ndengagh du'a kaba. Elisabet, bini kabatu, ka melahirka sughang anak lanang. Kaba mesti namaukanyau Yuhanis.

¹⁴ Kaba ka riang nian ngan banyak jemau ka riang pulau, amun anak itu la adau nanti.

¹⁵ Diau ka njadi jemau besak di adapan Tuhan. Diau nidau ka minum ayiak anggur ngan minuman diau mabuakka. Jak diau adau diau dikuasaui Rua Allah.

¹⁶ Banyak jemau Israil ngulang agi dibata'inyau njenguak Tuhan Allah.

¹⁷ Diau ka diajung antak ka Tuhan datang. Diau ka kuat ngan bekuasau luak Elia. Bapak ngan anak ka didamaikanyau. Jemau diau nidau ta'at dibata'inyau agi ke jalan diau benagh. Luak itula disediaukanyau umat diau la siap nerimau Tuhan.”

¹⁸ “Luak manau mangku aku keruan titu ka tejadi?” tanyau Sakaria. “Aku la tuau, ngan bini aku la tuau pulau.”

¹⁹ Katau malaikattu, “Akuni Jibrail. Aku bekerjau batan endak Allah. Diautu ngajung aku ngiciak ngan kaba, ngiciakka ceritau iluak itu.

²⁰ Tuapau diau kukiciakka ka tejadi padau masaunyau. Anyautu karnau kaba endiak percayau, kaba ka bisu, nidau pacak ngiciak, enggut setu diau kukiciakka tadi tejadi.”

²¹ Penarau itu, jemau banyak nantika Sakaria. Ughangtu kemangan, ngapau diau lamau nianan di Ghuma Allah.

²² Diau ngeluagh, diau nidau pacak ngiciak ngan ughangtu. Diau makai tandau ajau, karnau maju bisu. Mangku ughangtu ngerti galau, bansau diau la nginak pengina'an di Ghuma Allah.

²³ La abis masau tugasau di Ghuma Allah, Sakaria baliak ke ghumahau.

²⁴ Lum lamau itu, Elisabet ngandung, mangku diau bekurung di ghuma selamau limau bulan sampai bekatau,

²⁵ “Tuhan nulung aku, mbak kini Diau mbuat aku nidau inau agi.”

Ceritau Yesus ka lahir

²⁶ Kandungan Elisabet la enam bulan, Allah ngajung Jibrail pegi ke kuta Nasarit di Galilia.

²⁷ Malaikattu diajung njenguak sughang gadis, namaunyau Maria. Mariatu la tunangan ngan Yusup. Diautu jak di pengadau rajau Daud.

²⁸ Malaikat tadi njenguak Maria, kataunyau, “Ui Maria, kaba diau disayangi Tuhan. Tuhan maju nyertaui kaba.”

²⁹ Ndengagh kici'an itu, Maria tegagau, mangku betanyau dalam atiau, “Tuapau retiau kici'an itu?”

³⁰ Malaikat itu bekatau, “Ui Maria, nidau endak takut, karnau Allah riang ngan kaba.

³¹ Kaba ka ngandung, mangku melahirka sughang Anak lanang diau mesti kaba namauka Yesus.

³² Diau ka njadi jemau besak, mangku Diau ka dikiciakka Anak Allah diau Mahatinggi. Tuhan Allah ka njadika Diau rajau luak rajau Daud, niniak puyangAu.

³³ Mangku Diau ka merinta pengadau Yakub selelamaunyau. KekuasauanNyau nidau ka udim-udim.”

³⁴ “Aku masia gadis,” katau Maria. “Luak manau titu ka adau?”

³⁵ Malaikattu nimbal, “Rua Allah ka datang ke kaba, mangku kuasau Allah diau Mahatinggi ka menui kaba. Itula sebapau Anak diau ka kaba lahirkatu ka dikiciakka suci, Anak Allah.

³⁶ Keruanila, Elisabet sanak kaba itu, la ngandung pulau, la enam bulan, empuak diau la tuau lagi jemau kiciakka nidau ka adau anak.

³⁷ Karnau amun kendak Allah, nidau bediau diau nidau ka adau.”

³⁸ Katau Maria, “Aku ini budak Allah. Nengkela tejadi ngan aku luak diau dighi kiciakka.” Mangku malaikattu pegi.

Maria berayak ngan Elisabet

³⁹ Nidau lamau udim itu, Maria pegi cecepat njenguak kuta di Yudia pasigh gunung.

⁴⁰ Diau pegi ke ghuma Sakaria mangku masuak sampai ngiciak, “Ui, uncu Elisabet.”

⁴¹ Satu Elisabet ndengagh kici'an Mariatu, beghinggut ana'au di kandungannyautu, mangku Elisabet pulau dikuasaui Rua Allah,

⁴² mangku ngiciak, kataunyau, “Allah iluak ngan kaba jak di gegalau tinau. Diau iluak pulau ngan Anak dalam kandungan kaba.

⁴³ Sapau akuni sangkan enduak Tuhan berayak ngan aku?

⁴⁴ Satu aku ndengagh kici'an kaba tadi, anak di kandunganku beghinggut karnau riang.

⁴⁵ Riangla kaba, karnau percayau setu diau dikiciakka Tuhan ngan kaba, itu ka tejadi.”

Maria ngagungka Allah

⁴⁶ Mangku katau Maria, “Aku ngagungka Tuhan.

⁴⁷ Atiku riang nian, karnau Allah Rajau Penyelamatku.

⁴⁸ Diau teghingat aku, buda'Au diau nidau pantas ini. Mulai mbak kini gegalau jemau ka ngiciakka aku tinau diau diregaui,

⁴⁹ karnau Allah diau Mahakuasau la ngerjauka kerjau diau besak batan endak aku. NamauNyau suci.

⁵⁰ Jak di anak enggut ke enta-enta Allah sial ngan jemau diau takut ngan Diau.

⁵¹ Ngan tangan diau kuat Diau ngacauka rencanau jemau geduak.

⁵² Jemau diau bekuasau ditughunkaNyau jak di pangkatau, mangku jemau diau inau ditinggikaNyau.

⁵³ Jemau diau lapagh dikenyangkaNyau ngan serbau diau iluak, mangku jemau diau kayau dilaratkaNyau nidau mbatak tuapau-apau.

⁵⁴ Diau nulung jemau Israil, karnau Diau teghingat janjiAu diau dikiciakkaNyau ngan niniak puyang kitau.

⁵⁵ Tuhan nidau lupau ngan janjiAu, mangku Diau iluak atiAu ngan Abraham ngan pengadaunyau enggut selelamaunyau.”

⁵⁶ Maria betunggal ngan Elisabet kekirau tigau bulan, mangku baliak ke ghumahau.

Yuhanis Pembaptis lahir

⁵⁷ La sampai bulanau Elisabet merunggu, mangku adau sughang anak lanang.

⁵⁸ Jemau sedusun ngan sana'au ndengagh, bansau Tuhan iluak nian ngan Elisabet, mangku ughangtu riang pulau.

⁵⁹ Kupiak itu la beumur delapan aghi, ughangtu datang endak nyunatka diau, endak dinamaukanyau Sakaria luak namau ba'au.

⁶⁰ Anyautu katau endu'au, “Jangan, diau mesti dinamauka Yuhanis.”

⁶¹ “Endiak bediau sughang kiala jak di sanak kapu dighi benamau luak itu,” katau ughangtu.

⁶² Mangku ughangtu makai tandau endak betanyau ngan Sakaria, “Sapau batan namau anak dighitu?”

⁶³ Sakaria mintak batu tulis, mangku nulis luak ini, “Namaunyau Yuhanis.” Ughangtu kemangan galau.

⁶⁴ Masau itu pulau Sakaria pacak ngiciak agi, mangku diau ngagungka Tuhan.

⁶⁵ Jemau dusunau penakut ngan kemangan galau. Mangku ceritau itu tesiar di ngepungan gunung Yudia.

⁶⁶ Gegalau jemau diau ndengaghka ceritau itu merupuakkanyau mangku betanyau, “Njadi tuapau budak keciak itu nanti?” Karnau kuasau Tuhan nyertauinyau.

Sakaria ngagungka Allah

⁶⁷ Sakaria, bapa'au, dikuasaui Rua Allah, mangku ngiciak luak sughang nabi, kataunyau,

⁶⁸ “Tepujila Allah, Tuhan Israil, karnau Diau datang nulung umatAu ngan mbibaskanyau.

⁶⁹ Mangku Diau ngenju'i kitau sughang Penyelamat diau bekuasau jak di pengadau Daud, buda'Autu,

⁷⁰ luak dijanjikaNyau ngan kitau, mangku dikiciakka nabi-nabi senitu diau dipiliatu.

⁷¹ Tuhan njanjika endak nyelamatka kitau jak di musua kitau, jak di kuasau jemau diau meluatka kitau.

⁷² Diau endak nginakka keilu'an atiAu ngan niniak puyang kitau. JanjiAu diau suci ka ditepatiNyau.

⁷³ Diau la besumpa ngan bejanji ngan niniak puyang kitau Abraham,

⁷⁴ endak nyelamatka kitau jak di musua kitau, mangku kitau nidau takut nyemba Diau,

⁷⁵ kitau diau ta'at ngan melemakka atiAu seumur idup.

⁷⁶ Mangku kaba, ui anakku, kaba ka dikiciakka nabi Allah diau Mahatinggi, karnau kaba ka bejalan diduluka Tuhan endak nyediauka jalan batan endak Diau.

⁷⁷ Kaba diajung ngiciakka ngan umatAu, bansau ughangtu ka diselamatka, karnau Allah ka ngabiska dusau-dusaunyau.

⁷⁸ Karnau Allah iluak atiAu lagi penyayang, Diau ka datang nyelamatka kitau luak matau-aghi tumbua akap-akapan.

⁷⁹ Luak itula Diau endak ngenjuak terang ngan jemau diau idup dalam keleman ngan takut ka mati. Diau endak mbimbing kitau ke jalan damai.”

⁸⁰ Anak Sakaria itu tamba besak tamba kuat wata'au. Mangku diau mendam di padang bungin enggut sampai masaunyau diau nyatauka diriau ngan jemau Israil.