IBRANI 1 - PEJANJIAN EMPAI CERITAU ILUAK

Allah ngajung Ana'Au ngiciak ngan kitau

¹ Timpau senitu Allah la rajin ngajung nabi-nabi ngiciak ngan niniak puyang kitau makai serbau carau.

² Masau pengabisan ini Diau la ngajung Ana'Au ngiciak ngan kitau. Diau ngajung Ana'Autu njadika langit ngan deniau ngan gegalau isiau, mangku ditetapkaNyau behak nerimau gegalaunyau.

³ Di Diautula tekinak keagungan Allah diau besinagh. Gegalau sipat Allah adau di Diau galau. Diautu pulau nyayia gegalaunyau ngan katauNyau diau bekuasau nian. Diautu dipakuka di kayu salip, mangku dusau manusiau pacak diabiska. Udim itu Diau duduak di sebela kanan Allah diau Mahakuasau di bada diau tinggi.

Keagungan Anak Allah

⁴ Jawua tinggila pangkat Ana'Autu sangkan pangkat malaikat. Mangku kedudukan diau dienjuakka ngan Diau jawua tinggila diau sangkan diau dienjuakka ngan malaikattu.

⁵ Nidau kekela Allah ngiciak luak ini ngan sughang malaikat, “Kaba AnakKu! Saghini Aku njadi Bak Kaba.” ngan pulau, “Aku ka njadi Bapa'Au, Diautu njadi AnakKu.”

⁶ Masau Allah ngajung Ana'Au diau tuautu ke deniau, Diau bekatau, “Gegalau malaikat Allah mesti nyemba Diau.”

⁷ Nceritauka malaikat Allah bekiciak, “Aku mbuat malaikattu njadi luak angin ngan budak-budakKu njadi luak maghak api.”

⁸ Anyautu ngan Ana'Autu Allah bekiciak, “Kabatu Allah, Rajau selelamaunyau! Kaba merinta ngan adil.”

⁹ “Kaba riang ngan setu diau benagh ngan meluatka setu diau nidau benagh. Itula sebapau Aku, Allah Kaba, milia Kaba. Aku meregaui Kaba, mangku riangla Kaba sangkan kantin-kantin Kaba.”

¹⁰ KatauNyau agi, “Empai penembai Kaba, Tuhan, njadika deniau. Diau njadika langit Kabatula.

¹¹ Gegalaunyautu ka abis, ka njadi bughuak luak baju, anyautu Kabatula diau ka maju adau.

¹² Gegalaunyau ka Kaba puntal luak baju, ka Kaba genti ngan setu diau lain. Anyautu Kaba nidau kekela ka beghuba, ka adau selelamaunyau.”

¹³ Nidau kekela Allah ngiciak ngan sughang malaikat, “Duduakla di sebela kananKu, enggut musua Kaba Kutunduakka ngan Kaba.”

¹⁴ Amun luak itu, malaikattu sapau sebenaghau? Ughangtu rua diau bekerjau batan endak Allah, diajungAu nulung jemau diau ka diselamatka.