MATHIU 1 - SHEEYU BAIBEL (BSI)

Jisu Khrista Puopao

¹ Haihai Jisu Khrista puopao maitao zhih rüthouyu larübvüe. Puh hai David nahpoutue ea David hai Abraham nahpoutue.

^2-11 Khekouhi rüthouyu zhih taosü Abraham hinou David Veo koutevei puopao maitaoe: Abraham, Isak, Jakob, Juda, ea puh thaihou jürai maitao; süthaisü Perez ea Zerah (puhai pfüsü Tamar toue), Hezron, Ram, Amminadab, Nahshon, Salmon, Boaz (puh pfühai Rahab toue), Obed (puh pfü hai Ruth toue), Jesse alia David Veo haitaoe. Khekouhi rüthouyu zhih taosü David Veo hinou Israel maitaoye Babilon hi save beyu koutevei puopao taoe: David, Solomon (puh pfühai vuh lihi Uriah chapfüe), Rehoboam, Abija, Asa, Jehoshaphat, Jehoram, Uzziah, Ahaz, Hezekiah, Manasseh, Amon, Josiah ea Jehoiakin ea puh thaihou jürai maitaoe.

^12-16 Babilon hi beyu thainou Jisu ye nayu koutevei puopao zhih taosü khekouhi rükhaitoue: Jihoiakin, Saltiel, Zerubbabel, Abiud, Eliakim, Azor, Zadok, Akim, Aliud, Eleazar, Mathan, Jakob ea Khrista tea kulouyu Jisu puhpfü Meri ye nalouyu Josef haitaoe.

¹⁷ Sübüa Abraham hinou David koute hai maiphao kiadai bue ea David hinou Babilon hi louyu koute hai maiphao kiadai bue ea Babilon hinou Khrista nayu koute sü maiphao kiadai bue.

Jisu Khristaye Nayu

¹⁸ Jisu Khrista hai haibüa naloure. Puh pfü Meri hai Josef ki towure, ana puhai ve komo jühinou Rako Mashi hilonou puh hai nahtu ali hrülaire touyu sü puhnou süloure.

¹⁹ Josef hai teisanou acheche hinou hrüa buyu mai alie, ana puhnou Meri ye dua sou ahrao nümoe; südonou puhnou apaoyu nahai khei-a soukhore donou bo phoua soudare.

²⁰ Haibüa puhnou tsücho-a buyu hinou mekou hi nou Mapao vei rakivamai alinou puh hi veloua paoe, “David nahpoutu Josef, Meri ye ne chapfü soure hai ne piso. Daiolouzü puhnou pou pfüyu hai Rako Mashi hinoue.

²¹ Puhnou nahpoutu ali nalai ea nenou puh zhih sü Jisu tea salai— daiolouzü puhnou puh maitaoye mah hinou khailupa peilai.”

²² Chuo Mapao nou Rachi paolawo nahi paoyu hai cheche-a panou vetere donou haitao teitei hai paloure:

²³ “Zhukhaio, loumaina alinou poupfüloua nahpoutumai ali nalai ea puh zhih sü Emmanuel, (süvei kowo louzü, ‘Ramai nou Eletaoye koa bue’) tea kulai.”

²⁴ Südonou Josef nou kaishu louyu kisü, Mapao vei rakivamai nou puh hi souo tea paoyu büa puhnou Meri ye naloure.

²⁵ Ana Meri nou nahpoutu süna namo koutesü Josef nou puhye koa sabu sazhü moe. Alia Josef nou puh zhih sü Jisu tea sapeire.